Gilbert Perdez

Kumpiyansa ang liderato ng Philippine Military Academy o PMA na hindi makakaapekto sa recruitment process ng military school ang kaso ng pagkamatay ni Cadet Fourth Class Darwin Dormitorio.

Bagama’t nagdulot ng takot sa mga magulang ang sinapit ni Dormitorio, tiniyak ni Major Reynan Afan sa mga ito na inaalagaan ang kanilang mga anak sa PMA.

Dagdag ni Afan, patuloy na umiiral ang regulasyon sa akademya at bukas sila sa lahat ng klase ng imbestigasyon ukol sa naturang usapin.

Magugunitang natagpuang walang malay si Dormitorio sa kanyang kwarto at idineklarang dead on arrival sa isang ospital noong Setyembre 18.

Samantala, tinawag naman ni Armed Forces of the Philippines Chief Lieutenant General Noel Clement ang pagkamatay ni Dormitorio na isang isolated case sa loob ng military school.

Anim na sasakyan ang nasunog, kabilang ang dalawang bus, makaraang magkarambola sa Governor’s Drive sa Carmona, Cavite.

Ayon kay Police Maj. Rommel Carcellar, Hepe ng Carmona Police, nagtamo ng minor injuries ang hindi pinangalanang driver ng dump truck habang wala pang naiuulat na ibang sugatan sa aksidente.

Sa inisyal na imbestigasyon, sumalpok ang truck sa bus makaraang mawalan ng preno hanggang sa umapoy ito at maging ang nabanggang bus.

Samantala, maging ang isa pang bus at isang truck na may kargang bakal ay nagliyab din.

Agad namang naapula ang apoy habang patuloy ang imbestigasyon sa nabanggit na aksidente.

Nagbalik-loob sa pamahalaan ang 3 miyembro ng Abu Sayyaf terror group sa Basilan.

Sina Khadaffy Kalitut, Aliman Langkasan at Jiyad Arabin ay nagtungo sa 18th infantry battalion sa bayan ng Ungkaya Pukan para isuko ang kanilang mga sarili at ang mga bitbit nilang baril.

Sinasabing naisagawa ang matagumpay na pagbaba ng armas ng 3 ASG members sa tulong ng isang barangay chairman.

Ayon kay Lt. Col. Ivan San Jose, commander ng 18th infantry battalion, masaya sila sa pagsuko ng mga miyembro ng abu sayyaf kabilang na si Kalitut na isang sub-leader ng grupo lalo pa’t kapwa sila ay naghahangad ng mapayapang pamumuhay kasama ang kanilang mga pamilya .

Binalaan ni Davao City Health Officer Josephine Villafuerte ang mga dabawenyos na iwasan munang mag-swimming sa Davao River, gayundin sa mga public swimming pools sa lungsod.

Ginawa ni Villafuerte ang babala makaraang magpositibo sa polio virus ang nabanggit na ilog.

Magugunitang kinumpirma ng Research Institute for Tropical Medicine (RITM) ang presensya ng polio virus sa Davao River kasunod ng ginawang sampling at testing noong Agosto 22 ng taong kasalukuyan.

Dahil dito, puspusan ang ikakasang information drive ng city health office upang mailayo sa panganib ang mga residente laban sa naturang virus.

Kusangloob na isinuko ng isang magbababoy o hog raiser sa lokal na pamahalaan sa Malolos, Bulacan ang kanyang 52 alagang baboy matapos mamatay ang 33 iba pa na hinihinalang dinapuan ng African Swine Fever (ASF)

Ayon kay Alejandro Roque, isinurender na niya sa City veterinary office ang kanyang mga alaga sa takot na baka magkaproblema pa siya kung paano i-dispose ang mga ito sakaling mamatay din katulad ng iba.

Walang ipinangakong bayad ang City Government kay Roque pero sinabihan umano siya ng isang Barangay Chairman na makakatanggap siya ng 3,000 piso bilang kompensasyon.