Gilbert Perdez

Ipinag-utos ni Manila Deputy Prosecutor Joselito Obejas sa Manila Police District o MPD na palayain ang apat na suspek sa pagpatay kay Batuan, Masbate Vice Mayor Charlie Yuson III.

Sa kanyang resolusyon, inatasan ni Obejas ang mga awtoridad na imbestigahan munang mabuti ang kasong murder at dalawang bilang ng frustrated murder laban sa mga respondents.

Matatandaang nag-aalmusal si Yuson sa Sampaloc kasama ang dalawang iba pa nang pagbabarilin ng hindi pa nakikilalang mga salarin na ikinasawi ng bise-alkalde.

Kalaboso ang isang pekeng traffic enforcer dahil sa umano’y pangongotong sa isang truck driver na pumapasada sa La Loma, Quezon City.

Sinasabing naka-uniporme pa ng Metropolitan Manila Development Authority o MMDA nang maaresto ang suspek na si Christopher Delos Santos.

Kuwento ng mag-amang truck driver at pahinante, pinara sila ni Delos Santos at hiningan ng 300 piso pero may dumaang pulis kaya isinumbong nila ito.

Ngunit nang komprontahin ng pulis si Delos Santos, binanggit nitong awol na siya sa MMDA.

Sasampahan ang suspek ng mga kasong Robbery-Extortion at Usurpation of authority.

Inihayag ng Department of Interior and Local Government o DILG na ikinu-konsidera nito ang lahat ng mga posibilidad sa ginagawang imbestigasyon hinggil sa alegasyon na nanghimasok si PNP Chief Police General Oscar Albayalde sa kaso ng mga “ninja cops” noong siya’y nanungkulan bilang Pampanga police provincial director.

Ayon kay DILG Undersecretary Jonathan Malaya, maliban sa alegasyon na protektor ng mga tiwaling pulis si Albayalde, sisilipin din ng kanilang tanggapan ang isiniwalat ng PNP chief na may kinalaman ang mga atake sa kanya sa nalalapit niyang pagreretiro.

Gayunman, tiniyak ni Malaya na magiging batas at ibabase lamang sa mga makakalap na ebidensya ang imbestigasyon nila kaugnay ng naturang usapin.

Humingi na ng paumanhin si Quezon City Discipline Task Force Chief Ariel Inton sa may-ari ng sasakyan na nabasagan niya ng salamin dahil sa illegal parking sa Timog Avenue.

Sa kabila nito, desidido pa rin umano ang motorista na sampahan ng kaukulang kaso si Inton bunsod ng nangyari sa kanyang sasakyan.

Magugunitang nagsasagawa ng operasyon ang task force nang makita ang sasakyan na iligal na nakaparada pero walang lumitaw na may-ari nang ipatawag ito ni Inton kaya’t sa galit niya ay binasag niya ang salamin nito.

Aminado naman si Inton na nawala siya sa tamang diskarte na humantong sa nabanggit na pangyayari.

Nagkasa na ng hiwalay na imbestigasyon ang lokal na pamahalaan ng lungsod ng Quezon City hinggil sa naturang insidente.

Patay ang isang taxi operator at isang driver makaraang pagbabarilin ng mga lalaking magka-angkas sa motorsiklo sa St. Joseph St., Brgy. Payatas, Quezon City.

Kinilala ni Lt. Col. Joel Villanueva, hepe ng Batasan Police Station, ang mga biktima na sina Jordan So at Roger Soquita.

Naglalakad lamang sa St. Joseph Street ang mga biktima nang sumulpot ang mga salarin at pinagbabaril ang mga ito bago tumakas sa hindi matukoy na direksiyon.

Patuloy ang imbestigasyon sa insidente.