Gilbert Perdez

Nadagdagan pa ang COVID-19 infections sa mga pasilidad at piitan na nasa ilalim ng Bureau of Jail Management and Penology (BJMP).

Katunayan, sa Laging Handa media briefing, binanggit ni BJMP Spokesperson Xavier Solda na tumuntong na sa 1,151 ang bilang ng mga inmates na tinamaan ng COVID-19 kung saan 175 dito’y sumasailalim ngayon sa gamutan.

Sinasabing nakatulong naman sa pag-contain ng virus transmission ang ginawang pagsuspinde sa face-to-face visits mula noong Marso dahilan upang makarekober ang 900 bilanggo.

Samantala, nasa 1,501 vulnerable inmates ang pinalaya ng BJMP upang maiwasan ang pagkalat ng impeksiyon.

Kasama sa mga pinalaya ang mahigit 500 matatanda, halos 1,000 may malalang sakit at 32 buntis.

Muling nagpaalala sa publiko ang Anti-Money Laundering Council (AMLC) na mag-ingat at maging mapagmatyag tuwing gagawa ng digital financial transactions.

Ayon kay AMLC executive director Mel Racela, umakyat kasi sa 400,000 ang mga naisumiteng kahina-hinalang transaksiyon sa loob lamang ng ilang buwan ngayong taon na katumbas ng dami ng mga naitala sa buong taon ng 2019.

Dahil dito, nagbabala sa publiko si Racela na tiyaking hindi nagagamit sa panggagantso o fraud ang mga pinapasok nilang online platform.

Ngunit nilinaw naman ng AMLC na suspicious transactions lamang ang mga naireport sa kanilang tanggapan kaya’t hindi masasabing lahat ng ito ay cybercrime.

Muling tumaas ang kabuuang bilang ng kumpirmadong coronavirus disease (COVID-19) cases sa Pilipinas habang patuloy ang implementasyon ng general community quarantine (GCQ) sa Metro Manila.

Sa pinakahuling case bulletin ng Department of Health (DOH), nadagdagan pa ito ng 4,040 dahilan upang sumirit sa 252,964 ang kabuuang viral infections sa bansa.

Ito ang ika-apat na magkakasunod na araw na nakapagtala ang DOH ng mahigit 3,000 kaso.

Sa nabanggit na bilang, halos 2,000 ay mula sa National Capital Region (NCR).

Pumalo naman sa 186,606 ang total recoveries kasunod ng paggaling ng mahigit 500 COVID-19 patients habang sumampa na sa 4,108 ang death toll matapos pumanaw ang mahigit 40 pasyente.

Isa na namang empleyado ng House of Representatives ang dinapuan ng coronavirus disease 2019 (COVID-19) dahilan upang umakyat na sa 69 ang bilang ng mga nagpositibo sa virus sa Mababang Kapulungan.

Ayon kay House Secretary-General Jose Luis Montales, ang pinakahuling tinamaan ng coronavirus ay isang babaeng congressional staffer na huling pumasok sa trabaho noong Setyembre 2.

Sinabi ni Montales na nagsasagawa na ngayon ng contact tracing sa mga nakasalamuha ng naturang empleyado

Isinusulong ngayon ni Sen. Sonny Angara ang pagkakaroon ng mas mabilis na serbisyo sa pribado at pampublikong sektor sa pamamagitan ng digitalization.

Ayon kay Angara, bagama’t bahagyang tumaas ng 27 hanggang 30%  ang digital payments sa Pilipinas ay maliit pa rin ito sa inaasahang P2.5 billion payments kada buwan.

Una rito, ibinunyag ng Bangko Sentral ng Pilipinas (BSP) na mababa lamang ang porsiyento ng mga nagbabayad gamit ang nabanggit na sistema dahil kakaunti lamang ang mga nagbubukas na bangko habang marami ring Pinoy ang walang bank accounts.

Dahil dito, sinabi ni Angara na ito ang dahilan kung bakit inihain niya ang Senate Bill 1764 o ang “Use of Digital Payments Act of 2020” upang maranasan naman ng bawat Pilipino ang benepisyo ng cashless transactions.

Mas mataas ng P8 bilyong ang makukuhang pondo ng Armed Forces of the Philippines (AFP) sa susunod na taon para sa kanilang Modernization Program.

Paliwanag ni Deputy Speaker at Surigao del Sur Rep. Johnny Pimentel, nabawasan kasi ang pondo ngayong taon ng AFP dahil ginamit ito sa paglaban kontra coronavirus disease 2019 (COVID-19).

Sinabi ni Pimentel na ibabalik ang buong funding support sa modernisasyon ng Sandatahang Lakas bunsod na rin ng bantang panlabas na nararanasan ng bansa sa West Philippine Sea.

Dahil dito, ayon sa mambabatas, sa halip na P25 tulad ng nakasanayang annual allocation ay P33 na ang magiging pondo ng AFP sa susunod na taon.

Sumipa na sa 184,687 ang bilang ng mga nakarekober mula sa coronavirus disease 2019 (COVID-19) sa Pilipinas makaraang makapagtala ang Department of Health (DOH) ng 23,074 na bagong recoveries.

Ayon sa DOH, umakyat naman sa 237,365 ang COVID-19 cases sa bansa dahil sa 2,839 na bagong impeksiyon sa loob lamang ng 24 oras.

Sa bilang na ito, sinasabing 48,803 lamang ang mga aktibong kaso habang pinakamarami pa rin ang mga positibo sa National Capital Region (NCR)

Samantala, sumirit naman sa 3,875 ang death toll sa bansa kasunod ng pagpanaw ng walumpu’t lima pang pasyente na dinapuan din ng coronavirus.

JUST IN: Kaso ng COVID-19 sa bansa, nadagdagan pa ng 2,839 ngayong Linggo, Setyembre 6.

Pumalo na sa kabuuang 237,365 ang bilang ng kumpirmadong kaso ng COVID-19 sa bansa. Mayroon namang 48,803 naitalang active cases. | https://t.co/HHOy7zaafm pic.twitter.com/tl2XU5Z1dN

— DWIZ Newscenter (@dwiz882) September 6, 2020