Gilbert Perdez

Pitong kasunduan ang nilagdaan nina Pangulong Ferdinand Marcos Jr. at Prime Minister Fumio Kishida.

Sa kanilang pagpupulong, nagpahayag ng kanyang suporta si Kishida sa pagpapanatili ng kapayapaan sa bansa at sa pag-abot ng Pilipinas sa mas mataas na income status pagdating ng 2025.

Maliban dito, nagkaroon din ng joint statement ang dalawang lider kung saan iginiit nila ang pagpapaigting ng relasyon at pagtutulungan ng magkabilang panig sa iba’t ibang larangan.

Ayon naman kay Kishida, suportado ng Japan ang layunin ng bansa na makamit ang estado na Upper Middle Income Country o UMIC.

Nagkasundo rin sina Pangulong Marcos at Kishida na palawigin pa ang kooperasyon nila sa mga sektor ng imprastraktura, agrikultura, at seguridad.

Hinirang ni Pang. Ferdinand Marcos Jr. si Brig. Gen. Leonel M. Nicolas bilang bagong hepe ng Intelligence Service ng Phil. Army.

Kinumpirma naman ni Presidential Communications Office Sec. Cheloy Velicaria-Garafil ang appointment ni Nicolas.

Itinalaga rin ni Pang. Marcos si Atty. Ella Blanca Lopez bilang Commissioner ng National Telecommunications Commission o NTC.

Sa hiwalay na appointment papers, iniluklok ni PBBM bilang Deputy Executive Director IV ng Government Procurement Policy Board-Technical Support Office sa ilalim ng Department of Budget and Management o DBM sina Ma. Jozzenne Claire Beltran-Carandang at Maria Dionesia Rivera-Guillermo.

Samantala, ipinuwesto naman ni Pang. Marcos bilang mga bagong miyembro ng National Tripartite Industrial Peace Council o DOLE sina Arturo Baesa, Annie Geron, Angelita Señorin at Jesus Villamor na kumakatawan sa labor sector.

Kasabay nito, naglagay din ang Presidente ng mga bagong miyembro ng Regional Tripartite Wages and Productivity Commission.

Kabilang sa mga bagong appointees sina Juan Johnny Dela Cruz at Alfonso Lao na kumakatawan sa Employers Sector ng Regional Tripartite Wages and Productivity Board sa CAR habang magiging kinatawan naman ng Employers Sector ng Region 13 si Romeo Sustiguer Jr.

Nagtalaga si Pang. Ferdinand Marcos Jr. ng mga bagong opisyal ng Department of Agriculture at Department of Agrarian Reform (DAR).

Ayon kay Presidential Communications Office Sec. Cheloy Velicaria-Garafil, itinalaga ni PBBM si Karen Kristine Roscom bilang Director IV ng Bureau of Agriculture and Fisheries Standards o BAFS na nasa ilalim ng pamamahala ng DA.

Ipinuwesto rin si Paul Limson bilang Director IV ng Bureau of Animal Industry o BPI.

Hinirang naman bilang Director IV ng DAR si Romeo Reyes habang kapwa Director III naman sina Josemari Hernando at Lita Rosales.

Nabatid na kapwa in-appoint ang mga bagong opisyal noong Pebrero 7 ngayong taon, batay na rin sa kanilang appointment papers.

Mas maliit ang budget na inilaan ng gobyerno para sa pagpapatuloy ng service contracting program ngayong taon.

Bunga nito, sinabi sa laging handa public briefing ni LTFRB Exec. Director Joel Bolano na kailangan nilang pagkasyahin ang pondo para sa libreng sakay.

Nilinaw ni Bolano na patuloy ang pagpoproseso ng mga dokumento para sa implementasyon ng proyekto kaya’t wala pa silang masabing petsa kung kailan ito muling ipatutupad.

Aniya, marami pang pinag-uusapan o pinaplantsa para sa paraang gagamitin sa programa.

Kung matatandaan, sa mga nakalipas na pag-iral ng programa ay libreng sakay o walang pamasaheng binabayaran ang publiko sa pagsakay sa bus carousel sa Edsa.

Dahil dito, mapuno man o hindi ang mga nakapilang bus sa carousel, bayad o tumatanggap ng sahod ang mga driver nito.

Nabatid naman na sa mga naunang panukala, maaaring magpatupad na lamang ng diskwento o discounted fare o nangangahulugang may babayaran na ang mga mananakay.

Muling kinilala ni Pang. Ferdinand Marcos Jr. ang kahalagahan ng tulong ng Japanese government sa Pilipinas sa pagsulong ng usapang pangkapayapaan, partikular sa katimugang rehiyon ng bansa.

Sa isang courtesy call sa mga miyembro ng Japanese parliament, nagpasalamat si PBBM sa Japan sa aniya’y hindi natitinag nitong suporta sa peace process at sa halos hindi mabilang na development assistance sa mga Pinoy.

Particular na tinukoy ni Pangulong Marcos ang J-BIRD Program o ang Japan-Bangsamoro Initiatives for Reconstruction and Development na nagbibigay ng pangmatagalang suporta para sa pamamahala, decommissioning at socio-economic development sa rehiyon.

Matagal na aniyang sumusuporta ang Japanese government sa peace processes sa bansa pamamagitan ng iba’t ibang mekanismo, partikular na ang International Monitoring Team o IMT, International Contact Group o ICG at ang Independent Commission on Policing o ICP.

Batay sa datos, mula 2002 hanggang 2019 ay pumalo na sa 51 billion Japanese yen ang halaga ng Official Development Assistance o ODA ng Japan para sa kapayapaan at kaunlaran sa Kamindanawan. Kasalukuyang nasa five-day working visit sa Japan si Pangulong Marcos, kasama ang ilang matataas na opisyal ng gobyerno at business leaders.

Iminungkahi ni Pangulong Ferdinand Marcos Jr. ang pagsusulong ng educational tourism sa pagitan ng Japan at Pilipinas na nakatutok sa pagpapalitan ng mga estudyante at professionals sa mga institusyon na may kinalaman sa turismo.

 Sa isang roundtable meeting kasama ang mga tourism stakeholders sa Tokyo, inanyayahan ni Pangulong Marcos Jr. ang mga Japanese students na mag-aral ng Ingles sa bansa.

 Sa ilalim ng kanyang administrasyon, sinabi ni PBBM na ang industriya ay hindi lamang nakatuon sa trabaho nito bilang isang promotion arm ng gobyerno kundi maging sa pagtiyak na magiging maginhawa, konektado at pantay-pantay ang biyahe para sa mga mananakay, gayundin sa mga mamamayan na naninirahan at nag-iingat sa mga mahahalagang destinasyong panturismo.

 Para umunlad pa ang turismo, inihayag ng Pangulong Marcos Jr. na titiyakin ng pamahalaan made-develop nang mabuti ang mga imprastraktura mula sa mga kalsada at tulay hanggang sa mga medical facilities, malinis na water supplies at magiging ito accessible sa mga turista at mamamayan.

 Matatandaan na sa kanyang kauna-unahang State of the Nation Address (SONA) ay tinukoy ni PBBM ang turismo bilang isa sa mga prayoridad ng kanyang administrasyon.

Nakakuha si Pangulong Ferdinand Marcos Jr. ng bilyun-bilyong pisong halaga ng investment pledges mula sa mga kompanya sa Japan na gumagawa ng mga semi-conductors, electronics at wiring harness.

 Ayon sa economic team ng Pangulo, inaasahang lilikha ito ng mahigit sampung libong trabaho para sa mga Pilipino.

 Sa roundtable meeting na pinangunahan ni PBBM, nangako ang mga negosyante na plano nilang palawakin ang kanilang operasyon sa bansa.

Nabatid na ang aktwal na halaga ng investment commitment ay bukas pa malalaman, Pebrero 10, sa isasagawang signing ng ‘letters of intent’ ng mga Japanese companies.

 Sa kanyang talumpati, ipinahiwatig naman ni Pangulong Marcos Jr. na hangad niyang maging regional hub ng mga printer, wiring harnesses at iba pang electronic goods ang ating bansa.

 Kabilang naman sa mga dumalo sa meeting ang mga matataas na opisyal ng Japan Aviation Electronics Industry, Ltd.; Yazaki Corporation; Yokowo Manufacturing of the Philippines; Sumitomo Electric Industries, Ltd.; Brother Industries, Ltd.; IBIDEN Co., Ltd.; Seiko Epson Corporation; NIDEC-SHIMPO Corporation; at TDK Corporation.

Wala pang pormal na usapan sa pagitan ng Pilipinas at Japan ukol sa Visiting Forces Agreement (VFA).

Ito ang nilinaw ni Pangulong Ferdinand Marcos Jr. matapos matanong ng media tungkol sa panukalang pagpapalakas ng ugnayang pangdepensa sa matagal na nating kaalyadong bansa.

 Bagama’t wala pang formal dialogues hinggil sa VFA, ipinaliwanag ni PBBM na tumutulong na ang Japan sa Philippine Coast Guard (PCG) sa usapin ng ‘capacity-building’, kabilang ang pagkakaloob dito ng mga kagamitan o equipment.

 Naniniwala rin si Pangulong Marcos Jr. na tutulong ang Tokyo sa pagpapaganda o rehabilitasyon ng Coast Guard Station sa Subic sa Zambales.

 Layunin aniya nito na matiyak ang ‘freedom of passage’ sa South China Sea.

 Nais naman ni PBBM na mas tumibay pa ang relasyon ng bansa sa Japan sa pagbisita niya simula  kahapon, Pebrero 8, hanggang Pebrero 12.

 Mahigit dalawang daang libong mga Pilipino na ang naninirahan at nagtatrabaho sa Japan sa 67 na taon na diplomatikong relasyon ng Pilipinas sa naturang bansa.

Makikipagpulong si Pangulong Ferdinand Marcos Jr. sa Filipino community sa Japan.

Ayon kay Presidential Communications Office (PCO) SEC. CHELOY GARAFIL, gagawin ito ng presidente bago umuwi ng Pilipinas pagkatapos ng limang araw na working visit sa nasabing bansa.

Kabilang sa mga mahahalagang aktibidad na sasalangan ni PBBM hanggang Pebrero 12 ay ang meeting nila ni Japanese Prime Minister Fumio Kishida kung saan bibigyan din ito ng imperial audience nina Emperor Naruhito at Empress Masako.

Isusulong din ni Pangulong Marcos Jr. ang interes ng bansa bilang magandang destinasyon ng pamumuhunan, pagpapatibay ng relasyong Pilipinas-Japan, sa pakikipagpulong niya sa Japanese business leaders.

Paplantsahin ng Pilipinas at Japan ang ilang proyekto na naudlot dahil sa pandemya.

Ito ang naging pahayag ni Pangulong Ferdinand Marcos Jr. sa panayam sa kanya ng media delegation na kasama niya sa Flight PR001 patungong Japan.

Sinabi ng Presidente na “well developed” ang interaksiyon ng dalawang bansa partikular na sa Government-to-Government (G2G) na usapin at kahit sa mga commercial ventures.

Kasalukuyang nasa Japan si Pangulong Marcos Jr., kasama ang Unang Ginang Louise Araneta-Marcos at ang delegasyon ng Pilipinas para sa kanyang limang araw na working visit sa imbitasyon din ni Japanese Prime Minister Kishida Fumio.