Gilbert Perdez

Hinamon ni Pang. Ferdinand Marcos Jr. ang Bureau of Internal Revenue (BIR) na magtrabaho nang naaayon sa pinakamataas na pamantayan ng integridad, kakayahan at kahusayan upang matamo ang kumpiyansa ng publiko sa tax system ng Pilipinas.

Sa kanyang talumpati sa 2023 National Tax Campaign Kickoff ng BIR na ginanap sa Philippine International Convention Center sa Pasay City, nagpahayag ng kumpiyansa si PBBM na patuloy na makikiisa at makikipagtulungan ang mga Pinoy sa pagpapabuti ng sistema ng pangongolekta ng buwis.

Pinuri ni Pangulong Marcos ang mga nagawa ng BIR noong nakaraang taon, partikular ang mas pinaigting na implementasyon ng Run After Tax Evaders (RATE) na nagresulta sa pagsasampa ng labindalawang kaso sa Department of Justice (DOJ) na may kinalaman sa 5.1 billion pesos na tax liability.

May 38 ring kaso na kasalukuyang nakabinbin sa Court of Tax Appeals (CTA) dulot ng hindi pagbabayad ng buwis na tinatayang nagkakahalaga ng 5.32 billion pesos.

Dahil naman sa Oplan Kandado program ng BIR, sinabi ng Presidente na nakapag-remit aniya ang tax agency ng mahigit 550 million pesos sa kaban ng bayan.

Samantala, kamakailan ay nagsampa rin aniya ang ahensya ng pitumpu’t apat pang tax evasion cases sa DOJ laban sa ilang indibidwal at kompanya.

Tutulak na patungong Japan si Pangulong Ferdinand Marcos Jr. ngayong araw.

Ayon sa Presidential Communications Office (PCO), pasado alas-dose ng tanghali o ala-una ng hapon ay aalis ng Villamor Airbase ang eroplanong sasakyan ng Pangulo kasama ang kanyang delegasyon.

Ngunit bago ito ay magsasagawa muna ng press briefing ang Presidente malapit sa Officers’ Club Building.

Una nang sinabi ni Philippine Ambassador to Japan Mylene Garcia-Albano na inaaasahang mag-uuwi si Pangulong Marcos Jr. ng 150 bilyong investment pledges na magbibigay sa mga Pilipino ng tinatayang walong libong trabaho.

Bukod kay Japanese Prime Minister Fumio Kishida at iba pang Japanese officials, sinabi ni Garcia-Albano na inaasahang makakapulong din ng Pangulo ang ilang kinatawan ng mga malalaking kumpanya na gumagawa ng mga electronics, semiconductors, printers at wiring harness.

Ang working visit ni PBBM sa Japan ay mula ngayong araw, Pebrero 8 hanggang 12, 2023.

Inanunsiyo ni Pangulong Ferdinand Marcos Jr. na magpapadala ng tulong ang Pilipinas sa Turkey matapos itong yanigin ng magnitude 7.8 na lindol.

Sa panayam ng media sa kanyang pagdalo sa National Tax Campaign Kickoff ng Bureau of Internal Revenue (BIR), sinabi ng pangulo na isang grupo na may 85 personnel ang binuo para pangunahan ang paghahatid ng tulong sa Turkey.

Kabilang sa mga ihahatid ay ang mga kumot at winter clothing para sa mga apektado ng lindol.

Magpapadala rin aniya ang Pilipinas ng mga engineer at health workers para umagapay sa mga biktima.

Ayon sa pangulo, kumikilos na ang Office of Civil Defense (OCD) at National Disaster Risk Reduction and Management Council (NDRRMC) para pangunahan ang search and rescue contingent ng bansa na sasamahan nga ng mga personnel mula sa Department of Health (DOH), Philippine Army, Philippine Air Force, at Metro Manila Development Authority (MMDA).

Samantala, nagbigay na rin aniya ng katiyakan ang Turkish Airlines na ihahatid nito ang mga equipment at grupo ng mga Pinoy na magtutungo sa naturang bansa.

Nakakuha si Pangulong Ferdinand “Bongbong” Marcos Jr. ng panibagong commitment mula sa isang international company.

Ito’y inaasahang makatutulong sa pagpapalakas ng supply ng asukal at produksyon ng ethanol sa bansa.

Kasunod ito ng pakikipagpulong ng Pangulo sa mga opisyal mula sa Department of Agriculture (DA), Sugar Regulatory Administration (SRA), DATAGRO, at mga miyembro ng Private Sector Advisory Council (PSAC), sa Malacañang.

Binanggit sa meeting ng Punong Ehekutibo na tiwala siyang posible sa Pilipinas ang isang long-term program upang mapataas ang produksyon at kita sa sugar industry.

Sinasabing ang DATAGRO ay isang Brazilian firm na nakatulong sa pag-develop ng sugar industry sa Brazil, na itinuturing na world’s largest producer and exporter ng asukal at ethanol.

Sa panig ng kumpanya, ipinanukala na simulan ang pilot testing sa Negros at Panay Islands gamit ang DATAGRO Tech Transfer and Assisted Managament Project.

Isinulong din na dapat ibahin ang sugarcane milling operations sa pamamagitan ng pag-convert asukal sa molasses patungong ethanol.

Pahayag ng DATAGRO, ang pag-convert ng asukal sa ethanol ay makatutulong upang mabawasan ang sugar pollution, pati ang gastos sa refined oil imports.

Kasabay nito, ipinag-utos ni Pangulong Marcos sa DA at PSAC na magsumite ng rekomendasyon sa mga paraan upang maisulong ang mga proyekto, na ang layunin ay hindi lamang matiyak ang sugar sufficiency kundi magbubukas din ng market sa energy sa pamamagitan ng produksyon ng ethanol.

Inaani na ngayon ng mga Piilipino ang bunga ng ginawang pagpapatayo ni dating Pangulong Ferdinand Marcos Sr., ng National Kidney and Transplant Institute (NKTI).

Pahayag ito ni Pang. Ferdinand Marcos Jr. matapos dumalo sa ika-40 taong anibersaryo ng NKTI.

Sinabi ni PBBM na mula nang mag-umpisa ang operasyon ng pasilidad ay naging world-class specialized institution na ito.

“He and his administration saw the importance of building an institution that is dedicated to renal healthcare and management, as well as the necessity of having a lead center for renal care and organ transplantation,” pahayag ng Pangulong Marcos.

Ang NKTI aniya ay bunga ng mga itinanim ng dating administrasyon ng kanyang ama.

“Now, we are reaping the fruits of their foresight and investments in our fight to uplift the conditions of Filipinos with kidney-related diseases,” ani PBBM.

Dahil dito, hinimok ng Presidente ang NKTI na ipagpatuloy lamang ang pagiging ‘catalysts’ para sa universal healthcare.

“I ask your institution to continue being catalysts for universal healthcare by innovative solutions that decrease our country’s mortality rate in kidney diseases,” giit ng Pangulo.

“Let me also take this time to convey my gratitude to our hardworking doctors, nurses, and the personnel of the NKTI for your dedication, your competence, your expertise in providing quality renal care and alleviating the suffering of Filipinos with kidney disease.”

Nangako naman ng buong suporta si PBBM sa mga pangangailangan ng NKTI para sa pagsusulong at pag-unlad ng healthcare facility.

“We owe you a debt that cannot be repaid, and we will see to it that your institution gets all the help that is necessary for its advancement and its progress,” sabi ni Pangulong Marcos.

Mas pinaigting pa ng Philippine National Police (PNP) ang kampanya laban sa mga nagmamaneho ng mga nakumpiskang sasakyan at motorsiklo sa kanilang hanay, partikular na ang mga ginagamit bilang ebidensya sa mga kasong kriminal.

Ayon kay Integrity Monitoring and Enforcement Group (IMEG) Chief Brig. Gen. Warren de Leon, simula noong Enero 27 ay nagsasagawa na ng lockdown ang kanilang tanggapan at ang Highway Patrol Group (HPG0 sa ilang kampo ng pulisya.

Sinabi ni De Leon na may mga nahuling sibilyan at pulis na gumagamit ng mga pasong rehistro, walang plaka, o may nakakabit na improvised plate sa kanilang sasakyan.

 Samantala, nilinaw ni De Leon na bahagi pa rin ito ng internal cleansing program ng buong organisasyon.

Pumalo sa P80 bilyon ang naimpok ng mga miyembro ng Pag-IBIG Fund noong 2022 sa pamamagitan ng MP2 Savings ng ahensya.

 Ayon kay Pag-IBIG Fund Chief Executive Officer Marilene Acosta, ito na ang pinakamataas na halagang na-save ng mga miyembro sa loob lamang ng isang taon.

 Nangangahulugan na nagkaroon ng 25% o katumbas ng 16.2 bilyon na pagtaas mula sa P63.7 bilyon na naitala noong 2021.

Samantala, sinabi rin ni Secretary Jose Rizalino Acuzar, Head ng Department of Human Settlements and Urban Development (DHSUD) at Pag-IBIG Fund Board of Trustees, dahil sa mataas nilang koleksiyon ay napapanatili nila ang mababang interes ng mga loan programs ng ahensya.

Walang nakikitang problema ang isang mambabatas sa pagdaragdag ng Pilipinas at Estados Unidos ng apat pang lokasyon para sa mas maigting na implementasyon ng Enhanced Defense Cooperation Agreement (EDCA).

Ayon kay Sen. Francis Tolentino, solido ang suporta niya rito hangga’t nasusunod ang orihinal na intensiyon ng nasabing kasunduan.

Sa gitna ng tensiyon sa mga pinag-aagawang teritoryo sa West Philippine Sea at South China Sea, una nang iminungkahi ni Tolentino ang pagsasagawa ng multilateral show ng maritime security cooperation kasama ang US at iba pang kalapit-bansa na kasapi ng Association of Southeast Asian Nations (ASEAN).

Binigyang-diin ni Tolentino na ang mas malawak na joint patrols ay makatutulong upang matiyak ang freedom of navigation, kalayaan sa pangingisda at maiwasan ang sigalot sa rehiyon.

Inihayag ng UN Food and Agriculture Organization (FAO) na bumagsak nang husto ang mga presyo ng pagkain sa mundo sa ika-sampung magkakasunod na buwan nitong Enero ngayong taon.

Ayon sa Food Price Index, naitala ang pinakamalaking pagbaba sa halaga ng mantika, dairy products at asukal, habang stable o matatag din ang presyo ng cereals at karne.

Ang index ng FAO ay sumusukat sa buwanang pagbabago sa mga internasyonal na presyo ng food commodities.

Ang vegetable oil price index ay sumadsad sa 2.9% bunsod ng pagbagsak ng halaga ng langis mula sa palm, soy, sunflower seed at rapeseed.

Naitala rin ang 1.4% na pagbaba sa presyo ng butter at milk powders habang 1.1% naman ang ibinaba sa presyo ng asukal sa loob ng nasabing panahon.