SUMAMPA na sa mahigit 1.9M ang bilang ng mga gumaling sa COVID-19 sa Pilipinas.
Ito’y makaraang makapagtala ang Department of Health o DOH ng higit 16K recoveries sa nakalipas na 24 na oras.
Sa nasabing bilang, halos 186,000 na ang mga aktibong kaso.
Pero nagkaroon naman ng 26,303 na bagong impeksiyon kaya’t sumirit na sa higit 2.2M ang bilang ng mga tinamaan ng coronavirus sa bansa.
Halos 35,000 na ang death toll kasunod ng pagpanaw ng 79 na pasyente.
DINAGSA ng mga tao ang pag-arangkada ng voter registration sa mga mall sa Kamaynilaan kahapon.
Una rito, binuksan ng Commission on Elections o Comelec ang voter registration sa mga lugar na naka-modified enhanced community quarantine tulad ng National Capital Region o NCR.
Samantala, umarangkada rin ang pagpaparehistro sa mga mall kung saan kasama sa mga dinagsa ang isang mall sa lungsod ng Quezon.
DAAN-DAANG bakuna kontra COVID-19 ang nasira at maging ang mga bakuna para sa mga bata sa naganap na sunog sa ikalawang palapag ng municipal health office ng bayan ng San Nicolas sa Ilocos Norte.
Pahayag ng San Nicolas LGU, nasa mahigit 400 COVID-19 vaccines at bakuna ng mga bata ang napinsala sa insidente.
Hanggang ngayon ay wala pang detalye kung anong COVID-19 vaccine brand ito at kung ilang vials ang apektado ng sunog.
NAGPOSITIBO sa COVID-19 ang 18 kawani ng Marinduque Police.
Ito ang kinumpirma ni provincial police director Col. Wilson Santos matapos lumabas sa resulta ng RT-PCR test na positibo ang anim nilang miyembro habang 12 naman ang nagpositibo sa antigen test.
Sa kasalukuyan ay naka-isolate na ang 53 indidbiwal na na-expose sa mga nagpositibo.
Kumpiyansa naman si Santos na mapagtatagumpayan nila ang laban sa virus.
NAKAAMBA na namang tumaas muli ang presyo ng langis sa Martes, Setyembre 14.
Ayon sa mga source mula sa industriya, nasa 25 centavos hanggang 35 centavos kada litro ang magiging dagdag-presyo sa diesel habang 30 centavos hanggang 40 centavos naman kada litro sa gasolina.
Magkakaroon naman ng 10 centavos hanggang 20 centavos na price hike sa kada litro ng kerosene.
Sinasabing ito na ang ikatlong sunod na linggo ng dagdag sa presyo ng mga produktong petrolyo.
PORMAL nang kinasuhan ang dating health minister ng France na si Agnes Buzyn dahil sa umano’y palpak nitong pagtugon sa COVID-19 crisis.
Ayon sa mga imbestidador sa isang special court sa Paris, nakakita sila ng sapat na batayan para usigin ang dating opisyal.
Batay sa reklamo laban kay Buzyn, binanggit na inilagay nito sa peligro ang buhay ng maraming mamamayan.
Maliban kay Buzyn, iniimbestigahan din si dating Prime Minister Edouard Philippe, gayundin ang kasalukuyang health minister na si Olivier Veran na may kaugnayan din sa umano’y sablay na kampanya kontra COVID-19.
MAKAKASAGUPA ni Serbian Novak Djokovic si Daniil Medvedev sa finals ng US Open.
Ito’y makaraang padapain ni Djokovic si Tokyo Olympic champion Alexander Zverev sa semi-finals sa Arthur Ashe Stadium.
Kung papalarin laban kay Medvedev, masusungkit ni Djokovic ang kanyang ika-apat na US Open title at ika-dalawampu’t isang overall Slam crown.
3MAKAKASAGUPA ni Serbian Novak Djokovic si Daniil Medvedev sa finals ng US Open.
Nasawi ang tatlong sundalo habang sugatan naman ang 15 iba pa sa suicide bombing sa Balochistan province sa Pakistan.
Ayon kay Senior Police Officer Azhar Akram, abala sa pagbabantay sa checkpoint ang mga sundalo nang biglang dumating ang isang suicide bomber na lulan ng motorsiklo at pinasabog ang sarili.
Agad namang inako ng Pakistan Taliban ang naturang pag-atake.
Inihayag ni Pope Francis na ipinagdarasal niya na maraming bansa ang tatanggap ng mga Afghan refugees.
Ang pahayag ay ginawa ng Santo Papa sa gitna ng pangamba ng ilang human rights groups na baka maulit ang restrictions na ipinatupad noon ng Taliban kung saan binawalan nitong mag-aral mga babae.
Sa kanyang weekly blessing sa St. Peter’s Square, sinabi rin ni Pope Francis na dapat protektahan, kalingain at pangalagaan ang mga Afghans na naghahangad ng maayos na edukasyon at malayang pamumuhay.
Patay ang 12 pulis matapos umanong lusubin ng Islamic state ang isang security checkpoint sa Kirkuk City, Iraq.
Ayon sa mga awtoridad, nagkaroon ng komprontasyon ang mga pulis at mga militante na tumagal ng halos dalawang oras.
Unang nasawi ang tatlong alagad ng batas at nadagdagan ito nang masabugan naman ng roadside bombs ang mga reinforcements.
Bagama’t wala pang umaako sa pag-atake, kilalang aktibo ang Islamic state sa nasabing lugar.