DWIZ 882

Nagsisimula nang kumilos ang iba’t ibang kagawaran para sa gagawing rehabilitasyon at ilalagak na tulong sa mga apektadong lugar ng pag-aalburoto ng bulkang Taal.

Gaya ng pagsusuri ng Bureau of Soils and Water Management sa abo at lupa na ibinuga ng bulkang Taal.

Ito anila ay para madetermina kung maaari bang tamnan ng mga agricultural crops ang mga lugar na nabalutan na ng volcanic ash.

Sinusuri na rin ng High Value Crop Development Program at Bureau of Plant Industry (BPI) ng Department of Agriculture ang pinsala inabot ng mga pananim na kape, pinya, langka, saging, at iba pang halaman sa lugar.

Kasabay nito, ipinabatid ni DA-BPI Assistant Director Glenn Panganiban na mayroon na silang inihandang planting materials na ipapamahagi para sa rehabilitasyon.

Handa rin umano ang Philippine Coconut Authority na magbigay ng ayuda para makapagtanim uli ng mga niyog sa mga lugar na nabalot ng abo.

Makakaasa rin ng tulong mula sa Bureau of Animal Industry ang mga farm owners na maibangon ang industriya ng livestock sa rehiyon.

Nakibahagi ang mga magsasaka ng Benguet province sa pagtulong sa mga apektado ng pag-aalburoto ng bulkang Taal.

Sa tulong ng La Trinidad Municipal Police Station, ipinadala ng mga magsasaka ang kanilang tulong na sako-sakong gulay para sa mga evacuee sa Batangas.

Kabilang sa mga gulay na ipinamahagi ng mga magsasaka ng Benguet ay carrots, repolyo, patatas, at iba pa.

Tiniyak naman ng La Trinidad Municipal Station na makararating ang naturang tulong sa mga Batangeuño na inilikas dahil sa nag aalburotong bulkang Taal.

Depende umano sa sitwasyon ang pagsagip sa mga hayop sa mga lugar na apektado ng pag-aalburoto ng bulkang Taal.

Ito ang tugon ng Department of Interior and Local Government (DILG) sa panawagan ng People for the Ethical Treatment of Animals (PETA) na payagan silang sagipin ang mga hayop na nanganganib rin ang buhay dahil sa pag-putok ng bulkang Taal.

Ayon kay DILG spokesman Jonathan Malaya, posibleng mailigtas ang mga hayop na nasa mainland, ngunit magiging mahirap na ito kung sila ay nasa volcano island.

Kailangan din muna umanong aprubahan ang naturang hakbang ng mga lokal na opisyal bago payagan ang PETA na pasukin ang naturang isla.

Hinigpitan na ng Philippine Coast Guard (PCG) ang seguridad sa Taal lake sa pangamba ng mas lalo pang mapanganib na pagsabog ng bulkang Taal.

Ayon kay PCG district commander Commodore Leovigildo Panopio, kailangan matiyak na wala ng mga residente ang babalik pa sa naturang lugar.

May mga ilan pa kasi aniyang nagtatangkang balikan ang kanilang tahanan para tingnan o subukang sagipin ang kanilang mga kabuhayan gaya ng mga alagang hayop.

Magpapadala pa ng karagdagang tauhan ang Department of Public Works and Highways (DPWH) para ayudahan ang mga residente na lubos na naapektuhan ng pag-aalburoto ng bulkang Taal.

Ayon kay DPWH secretary Mark Villar, kukuha sila ng dagdag na tao mula sa DPWH-NCR, Regions 1, 3, 4B, 5, 8, at 10.

Maliban sa mga tauhan, mamamahagi rin ng face mask at relief goods ang DPWH sa mga inilikas na residente.

Kasabay nito tiniyak ni Villar na mananaig ang bayanihan sa mga ganitong sitwasyon.

Nag paalala ang Bride local wedding website sa mga nakatakda magpakasal sa susunod na mga araw sa Tagaytay.

Ayon sa Bride and Breakfast, ikonsidera ang pagbabago ng lokasyon at maging ng petsa ng araw ng kasal kasunod na rin ng pag aalburoto ng bulkang Taal.

Karamihan kasi sa mga dinarayong wedding destinations sa naturang syudad ay apektado na ng ashfall at lindol kaya marapat lamang na iprioridad ang kaligtasan ng bawat isa.

Dumating na sa bansa ang unang batch ng mga Overseas Filipino Workers na ini-repatriate mula sa Iraq kasunod ng tensiyon duon.

Ayon sa DFA, 11 matanda at 2 bata ang matagumpay na naibyahe pabalik ng bansa sa Baghdad at Erbil.

Bahagya umanong nagkaproblema sa Iraqi Immigration matapos na makitang peke ang passport ng siyam sa mga Pilipinong inilikas.

Nadaan naman sa pakiusap ng mga opisyal ng Embahada ng Pilipinas ang mga Iraqi Officials kaya agad ring pinaalis ang mga Pilipino.

Una nang itinaas sa alert 4 sa Iraq o pagpapatupad ng mandatory repatriation dahil sa tensiyon sa pagitan Iran at Amerika.

Unti–unti nang bumubuti ang kalidad ng hangin sa Metro Manila kasunod ng makapal na ashfall mula sa bulkang Taal.

Ayon sa Department of Environment and Natural Resources, karamihan sa mga syudad sa kalakhang Maynila ay nakakuha ng good na rating matapos na sukatin ang particulate matter 10 o pm10 sa bawat lugar.

Kabilang dito ay ang San Juan, Makati City, Mandaluyong City, Pateros, Las Pinas, Malabon, Paranaque at Pasig.

Habang moderate to fair naman ang naitalang kalidad ng hangin sa Taguig City.

Una nang ibinabala ng DOH na delikado na ma- inhale ng mga tao ang abo na galing sa bulkan dahil posible itong magdulot hirap sa paghinga at iba pang komplikasyon.