DWIZ 882

Mahigpit na tinututukan ng Department of Health (DOH) ang lagay ng kalusugan ng mga apektado ng pag-aalburuto ng Bulkang Taal na pansamantalang nasa mga evacuation centers.

Ayon kay Health Secretary Francisco Duque III, isa sa mg limang mga kondisyon na mahigpit nilang inoobserbahan sa mga bakwit ang acute respiratory infection.

Sinabi ni Duque, inaasahan na nila ang pagkakaroon ng kondisyon sa respiratory system ng mga apektado ng pag-aalburuto ng Bulkang Taal bunsod na rin ng mga ibinuga nitong abo.

Maliban sa respiratory infections, ilan din sa mga bakwit ang nakitaan ng hypertension, trangkaso, diarrhea at mga sakit sa balat.

Kaugnay nito, tiniyak ni Duque na sapat ang suplay ng gamot at mga medical personnels ng DOH para matutukan ang kalagayang pangkalusugan ng mga evacuees.

Maaaring isilbi at gamitin ng International Criminal Court (ICC) ang kanilang hatol kay Pangulong Rodrigo Duterte, nasa posisyon pa man ito o nagbalik na bilang ordinary citizen.

Ito ang inihayag ni retired Senior Associate Justice Antonio Carpio matapos matanong hinggil sa saklaw ng kasong crime against humanity na inihain laban kay Pangulong Duterte sa ICC.

Ayon kay Carpio, may ilang mga heads of state na ang hinatulan ng ICC kahit wala na ang mga ito sa puwesto.

Dagdag ni Carpio, maaaring maging mabilis o tumagal ang paglalabas ng hatol ng ICC.

Magugunitang noong Martes, inanunsiyo ni Atty. Jude Sabio ang pag-withdraw sa kanyang inihaing crimes against humanity case laban kay Pangulong Duterte kaugnay sa kampanya kontra illegal na droga.

Namemeligrong masibak sa serbisyo ang halos 700 na mga pulis sa Region 9 o Zamboanga Peninsula dahil sa labis na katabaan.

Ito ang inihayag ni Police Regional Office 9 Director P/BGen. Froilan Quidilla, mula sa mahigit 7,000 pulis sa kanilang tanggapan, 699 o 9.23% dito ang obese batay sa isinagawa nilang body mass index evaluation.

Ito ang dahilan kaya’t ipinag-utos nito ang recall sa mga matatabang pulis sa kanilang mother unit tungo sa kanilang regional headquarters sa PNP Region 9.

Batay sa revised body mass index ng PNP, dapat na magbawas ng timbang ang mga matatabang pulis ng hanggang 2 kilo kada buwan.

Habang ang mga payat o severly underweight na pulis naman ay inaatasang magdagdag ng timbang ng isa hanggang tatlong kilo kada buwan.

Maglalaan ng halos P2-M ang Philippine Coconut Authority para sa muling pagbangon ng mga magsasaka ng niyog na labis na apektado rin ng pag-aalburuto ng Bulkang Taal.

Ayon kay Agriculture Sec. William Dar, mamamahagi rin sila ng 150,000 binhi mula sa coconut seedlings dispersal project at agricultural grade salt fertilizer para sa mga nasirang kahoy.

Bubuo na rin ang kagawaran ng livestock operation center sa Southern Tagalog Region at inatasan na rin ang national livestock program sa pakikipagtulungan ng DA agribusiness and marketing assistance service.

Maglalaan naman ng mga sasakyan ang DA na siyang gagamitin sa paglilikas ng mga hayop sa pagdadala ng mga feeds at mga suplay para sa mga hayop.

Welcome sa Philippine National Police ang pagtatalaga ni Pangulong Rodrigo Duterte kay Police Lt/Gen. Archie Francisco Gamboa para maging PNP Chief.

Ayon kay PNP Spokesperson P/BGen. Bernard Banac, sa ilalim ng pamumuno ni Gamboa sa PNP, mas magiging maigting ang kampanya kontra illegal na droga, krimen at katiwalian salig sa rule of law at paggalang sa karapatang pantao.

Mas tutukan rin aniya ni Gamboa bilang PNP Chief ang internal cleansing program upang maalis na ang kanilang mga kabaro na patuloy na nasasangkot sa katiwalian.

Sa ganitong paraan aniya, makatutulong ito na maibalik ang buong pagtitiwala ng publiko sa mga pulis matapos ang ilang kontrobersyang kinasangkutan ng ilan sa kanila nitong mga nakalipas na buwan.

Patuloy na umaapela si Manila Archbishop Luis Antonio Cardinal Tagle sa publiko na tulungan ang mga kapatid na naapektuhan ng pag-aalburuto ng Bulkang Taal sa rehiyon ng CALABARZON.

Sa kaniyang inilabas na liham, sinabi ni Tagle na labis siyang nagpapasalamat sa pakikiisa ng lahat sa naging panawagan ng simbahan na lingapin ang mga apektado ng kalamidad.

Kinilala rin nito ang diwa ng bayanihang umusbong sa mga taga-Batangas sa gitna ng kinahaharap nilang pagsubok na lalong nagpapatibay sa katangian ng mga Pilipino.

Kasunod nito, hinimok ng archbishop ang mga nagnais magpaabot ng tulong na kung maaari ay makipag – ugnayan sa Caritas Manila o di kaya’y sa mga lokal na parokya upang agad itong maihatid sa mga labis na nangangailangan.