DWIZ 882

Nakapagtala na ng 666 na volcanic earthquakes ang Phivolcs mula nang magsimula ang pag-aalburuto ng bulkang Taal noong Enero 12.

Ayon kay Phivolcs Director Undersecreatry Renato Solidum, dumarami rin ang nakikitang fissure o pagbibitak-bitak ng lupa sa mga bayan ng Agoncillo, Lemery, Talisay at San Nicolas sa Batangas.

Paliwanag ni Solidum, ang mga nangyayaring pag-angat ng lupat at pagbagsak ng ilang bahagi at patuloy na volcanic earthquakes ay nangangagulugang umaakyat ang magma.

Bunsod nito patuloy pa rin ang pagmomonitor ng Phivolcs sa mga aktibidad ng bulkang Taal.

Kaugnay nito, hinikayat ni Solidum ang publiko na gumamit ng Hazard Hunter Ph App para makita kung may panganib bunsod ng pag-aalburuto ng bulkan ang isang lugar.

Para po sa mas madaling pag-alam kung nasaan ang lokasyon ng mga bahay o ano mang mga istraktura, iskwelahan o ano man, paalala ko lang po mayroon tayong hazard hunter app. Pwede natin malaman kung ang ating mga bahay at posisyon ay pwedeng abutan ng base surge. I-double click nyo lang ang screen at pwede na kayong magkaroon ng assessment kung safe o hindi sa mga volcanic hazards and other natural hazards. Ito po yong url, hazardhunter.georisk.gov.ph at kung mayroon po kayong android phone mayroon po dyan sa google play pwede nyong i-download as mobile app.—ani Solidum.

Muling humingi ng panalangin sa mga Pilipino si Manila Archbishop Luis Antonio Cardinal Tagle para bigyan siya ng ibayong lakas.

Ito’y para harapin ang panibagong misyon nito bilang Prefect of the Congregation on Evangelization of People na tinagurian ding “Red Pope” sa Vatican.

Sa kaniyang misa sa Sto. Niño Parish sa bahagi ng Tondo sa Maynila, hindi napigilang maging emosyunal ng kardinal habang umaapela ng panalangin.

Inaasahang ngayong buwan, lilisanin na ni Tagle ang kaniyang puwesto bilang arzobispo ng Maynila at saka tutulak patungong Roma para sa kaniyang bagong misyon.

Ang tanging hindi malinaw sa aking haharapin, pero babaunin ko po ang inyong awit at inyong sayaw. Siguro kapag litong-lito na ako, iindak-indak nalang ako duon.. Viva! viva! Sto. Niño—ani Cardinal Tagle.

Mayruong agam-agam ang isang animal rescue group hinggil sa sitwasyon ng mga hayop sa harap na rin ng ilang araw nang pag-aalburuto ng bulkang Taal.

Ayon kay Jana Sevilla, assistant rescue manager ng People for the Ethical Treatment of Animals (PETA), hindi natatapos sa pagsagip sa mga hayop tulad ng kabayo, baka at iba pa sa halip ay kailangan din nito ng ibayong pagkalinga.

Nakapanghihinayang aniya na nagbubuwis ng buhay ang mga rescuer sa mga nasabing hayop subalit ang mga may-ari naman ay magdedesisyon na ibenta na lang ang mga ito upang mawalan ng pananagutan.

Dahil dito, malaki aniya ang posibilidad na mauwi ang mga nasagip na hayop sa pagtatrabaho sa iba pang mga farm o ang mas matindi ay bumagsak na lang ang mga ito sa katayan para kainin.

Napakapagtala ng 7 bagong kaso ng polio ang mga health authorities ng Maguindanao.

Ayon kay Maguindanao Health Chief, Dr. Elizabeth Samama, kanilang nakita ang tig isang bagong kaso ng polio sa mga bayan ng Shariff Saydona Mustapha, Rajah Buayan, Datu Piang, Datu Hofer, Datu Odin Sinsuat, Datu Abdullah Sangki at Datu Anggal Midtimbang.

Sinabi ni Samama, may edad 8 buwan hanggang 4 na taong gulang ang mga naapektuhang bata.

Nadiskubre lamang aniya ang mga nabanggit na bagong kaso nito lamangEnero.

Kaugnay nito, pinaigting pa ng Maguindanao Health Authorities ang kanilang pagpapakalat ng impormasyon hinggil sa bakuna at mga paraan para maiwasan ito.

Patuloy ang pagkakansela ng mga flights ng Philippine Airlines (PAL).

Sa abiso ng PAL, kinakailangang isailalim sa mga karagdagang checking o pagsusuri ang kanilang mga eroplano bunsod ng nangyaring ashfall dala ng pag-aalburuto ng Bulkang Taal.

Kaugnay nito, nasa 10 flight ang kanilang kinansela ngayong araw, Enero 18.

Kabilang anila rito ang flight PR 2525 at 2526 na biyaheng Manila – Cagayan at pabalik; flight PR 2967 at 2968 na biyaheng Manila – Butuan at pabalik; flight PR 2331 at 2332 na biyang Clark – Bacolod at pabalik.

Gayundin ang flight PR 2340 at 2341 na biyaheng Clark – Puerto Princesa, pabalik at flight PR 2376 at 2377 na biyaheng Clark – Caticlan at pabalik.

Samantala, ni-reschedule naman ang flight PR 408 na biyaheng Manila patungong Osaka at inilipat ang oras ng pag-alis nito alas tres y media ng madaling araw bukas, Enero 19.

Ipinabatid naman ng PAL na maaaring ipa-rebook o i-refund ng mga pasaherong apektado ng kanselasyon ang kanilang mga flights nang libre. — ulat mula kay Raoul Esperas (Patrol 45)