DWIZ 882

Magkakaloob ng special flights ang Philippine Airlines (PAL) para sa mga pasahero na na-stranded matapos makansela ang lahat ng flights na patungo at mula sa Mainland China dahil sa 2019 novel coronavirus acute respiratory disease (2019 nCoV-ARD).

Batay sa anunsyong ipinalabas ni Cielo Villaluna, PAL corporate communications, isasagawa ang special flights sa Lunes, Pebrero 10, 2020.

Inaasahan aniyang makatutulong ang inbound flight mula sa Xiamen sa mga Pilipino at may hawak ng Philippine permanent resident visa na makabalik sa Pilipinas habang ang outbound flight naman mula sa Manila para sa mga Chinese at non-Filipino national sa Mainland China.

Gayunman nilinaw ni Villaluna na kailangan pang ipa-apruba sa gobyerno ang nasabing mga special flight.

Nais iparepaso ni Senadora Nancy Binay ang mga polisiyang ipinatutupad sa pagbibigay ng visa sa mga Chinese national na nais pumasok sa Pilipinas.

Ayon kay Binay, chair ng senate tourism committee, dapat itong mapag-aralan muli dahil sa tila aniya dumaraming prostitution den kung saan sangkot ang mga Chinese national na babae gayundin ang mga parokyano nito.

Naging banta rin aniya ang pagpasok ng maraming Chinese sa Pilipinas sa pagpasok din ng 2019 novel coronavirus acute respiratory disease (2019 nCoV-ARD) sa bansa.

Layon ng resolution no. 309 na inihain ni Binay na tingnan kung ang polisiyang ipinatutupad sa pagbibigay ng visa sa mga Chinese national ay hindi makaaapekto o makasasama sa kalusugan ng sinumang mamamayan ng bansa.

Kailangan din aniyang matiyak na hindi magiging daan ang pagpasok nila sa bansa para mas lalo pang lumaganap ang sex trafficking at prostitusyon sa Pilipinas.

Tiniyak ng Senado na hindi bibigyan ng ispesyal na pagtrato si dating senador at ngayo’y Department of Information and Communications Technology (DICT) Sec. Gregorio Honasan sa gagawing imbestigasyon kaugnay sa umano’y P300-milyong intelligence funds sa kaniyang tanggapan.

Ayon kay Senate Majority Leader Juan Miguel Zubiri, wala aniyang sinuman ang nakatataas sa batas.

Ani Zubiri, bagama’t malapit sa kanila si Honasan ay hindi nila ito pagtatakpan sakaling may mapatunayan kaugnay sa nasabing alegasyon.

Una rito naghain sina Zubiri, Senate President Vicento Sotto III at Sen. Panfilo Lacson ng senate resolution 310 para sa pagtatag ng senate select oversight committee on intelligence and confidential funds matapos magbitiw si dating DICT undersecretary Eliseo Rio na kumuwestiyon sa nasabing pondo.

Lusot na sa Kamara ang panukalang Absolute Divorce.

Ito’y matapos i-invoke ni Albay 1st Dist. Rep. Edcel Lagman ang rule 48 kung saan maaaring agad aprubahan ang isang panukala kung ito ay naaprubahan na sa ikatlong pagbasa noong nakaraang kongreso.

Magsasama sama sa isang technical working group ang tatlong house bill kabilang na mga position paper ng iba pang stake holders.

Target maisumite ang committee report bago matapos ang Pebrero.

Kasabay nito, nanindigan si Lagman na ang nasabing panukala ay hindi layong makasira ng pamilya dahil sa katunayan aniya ay mapapabuti pa nito ang sitwasyon ng pamilya, unang-una ang pakinabang sa mga anak na may mga magulang na hindi na magkasundo pa.

Ikinatuwa ng Malakaniyang ang pagbaba ng bilang ng mga walang trabaho sa Pilipinas batay sa Social Weather Stations (SWS).

Ayon kay Presidential Spokesperson Salvador Panelo, malaki ang naging papel ng Philippine Labor Force at pag-uutilize ng human source bilang paraan ng pagpapaigting ng standard lifestyle o pangkalahatang pamumuhay ng mga Pilipino.

Nagtagumpay din aniya ang domestic at foreign investment para maging mayabong at masigla ang labor market.

Kasabay nito, tiniyak ni Panelo na tuloy-tuloy ang pamahalaan sa pag likha ng mas marami pang de kalidad na trabaho para sa mga Pilipino.