DWIZ 882

Inilunsad ng Department of Health (DOH) ang novel coronavirus tracker website.

Ayon sa DOH, sa halip na hinihintay ng publiko ang anunsyo ng ahensya kung mayroon bang kumpirmadong kaso ng 2019 novel coronavirus acute respiratory disease (2019 nCoV-ARD) sa kanilang lugar, maaari na ngayon itong makita sa pamamagitan ng website.

Sa website ay may makikita umanong mapa kung saan malo-locate ang lugar na mayroong person under investigation (PUI).

Makikita rin umano sa website kung gaano karaming pui ang na-aadmit sa ospital at ilan na rin sa mga ito ang nadischarge.

Ang nCoV tracker website ay may link na https://ncovtracker.doh.gov.ph.

Nanumpa na kay PNP Chief Gen. Archie Francisco Gamboa ang nasa 310 bagong pulis.

Ito’y kasabay ng pagdiriwang sa ika-29 anibersaryo sa pagkakatatag ng National Capital Regional Police Headquarters (NCRPO) sa Camp Bagong Diwa sa Taguig City.

Sasailalim ang mga bagong recruit sa anim na buwang pag-aaral at physical training bago sila sumabak muli sa anim na buwang field training program.

Sa nasabing training ay itatalaga ang mga pulis sa iba’t-ibang istasyon ng pulisya para matuto sa imbestigasyon, traffic at pagpapatrolya.

Disinfect ang mga “grab rails” o hawakan sa lrt 2.

Ito’y bilang hakbang para maiwasan ang pagkalat ng 2019 novel coronavirus.

Bagama’t wala pa umanong kumpirmasyon na airborne ang nasabing virus, kailangan pa rin tiyakin ang kaligtasan ng nakararami sa pamamagitan ng pagpapatupad ng mga health measures lalo na sa mga matataoong lugar.

Aminado si Pangulong Rodrigo Duterte na hindi niya kayang tuldukan ang kurapsyon sa pamahalaan.

Sa talumpati sa harap ng mga miyembro ng Chinese-Filipino Business Club Inc. sinabi ng Pangulo na bagama’t malabo niyang mapigilan ang kurapsyon ay makakatulong ang maraming negosyante sa bansa para mabawasan ang pagiging talamak nito.

Ayon kay Pangulong Duterte maaaring namang i-report ng mga negosyante sakaling may malaman silang insidente ng pagnanakaw o uri ng kurapsyon.

Tiniyak pa ng Pangulo na makakakuha ng insentibo ang mga negosyanteng maglalakas loob na magsumbong sa mga tiwaling opisyal o tauhan ng gobyerno.

Kasabay nito, hinikayat ni Pangulong Duterte ang mga negosyante na huwag matakot sakaling mayroong gumigipit sa kanila.

 If there is (someone) threatening you, tell me kung sino yan, at paluluhurin ko ‘yan sa harap ninyo. Really. Wag kayo matakot, kasi kayo rin ang kawawa… And as my practice, I will call him to my office with you, at pakinggan ko sa kanya kung ano, bakit nagka ganoon. Kung makita ko may kasalanan, p*tang i*a, asahan mo talaga, sasampalin ko ‘yan sa harap mo. I have done that many times already. I have done that to an undersecretary. May sinipa na rin ako noon na direktor,” ani Duterte.

Naniniwala ang Malakanyang na hindi na kailangan na konsultahin ni Pangulong Rodrigo Duterte ang kanyang gabinete kaugnay sa pagbasura ng Visiting Forces Agreement (VFA) pagitan ng bansa at Amerika.

Ayon kay Presidential Spokesman Salvador Panelo, magaling na abogado ang Pangulo at matagal nang pinag-aralan ang sitwasyon bago nagdesisyon na ibasura ang VFA.

Saka na lamang aniya kukunsulta ang Pangulo sa kanyang gabinete kung may mga usapin sa bansa na hindi siya sigurado.

Sa kabila nito, suportado naman ng buong gabinete ang desisyon ng Pangulo na ibasura ang naturang kasunduan.

Nilinaw ng Department of Health (DOH) na hindi pa ikinokonsidera ng World Health Organization (WHO) ang 2019 novel coronavirus (2019-nCoV ARD) bilang airborne disease.

Kasunod ito ng lumabas na artikulo sa social media kung saan tinukoy na maaring kumalat ang bagong strain ng coronavirus sa pamamagitan ng hangin.

Ayon kay DOH Undersecretary Eric Domingo, hindi pa ito napapatunayan sa ngayon at kasalukuyan palamang itong pinag aaralan ng WHO.

Una nang tinukoy ng WHO na tulad ng iba pang strain ng coronavirus gaya ng middle- East Respiratory Syndrome (MERS) at Severe Acute Respiratory Syndrome (SARS) ay nangyayari ang pagkalat ng nCoV sa pamamagitan ng human to human transmission.