DWIZ 882

May nadagdag na 68 bagong kaso ng novel coronavirus acute respiratory disease (2019-nCoV ARD) sa bansa.

Dahil dito, ayon sa DOH pumalo na sa 382 ang kabuuang bilang ng person under investigation (PUI) kung saan 266 sa mga ito ang kasalukuyang nasa pagamutan habang 113 naman ang na – discharged na.

Batay naman sa real time tracker ng DOH sa 2019-nCoV ARD, nanatiling Metro Manila pa rin ang may pinakamaraming bilang ng PUI kung saan 86 ang nasa ospital, sinundan ito ng Central Visayas na mayroong 49 na hinihinalang kaso ng 2019-nCoV ARD at Central Luzon na mayroong 31 na PUI.

Ipinagpaliban ng Sandiganbayan 3rd Division ang pagsisimula ng pagdinig sa plunder at graft case laban kay dating Senador Juan Ponce Enrile at tinaguriang “Pork Barrel Queen” Janet Lim Napoles.

Itoy matapos mabigo si Napoles na magtungo sa korte noong nakaraang linggo para lagdaan ang pre-trial order.

Naka-detalye sa pre-trial order ang mga ebidensya at mga testigo na ipi-prisinta ng prosecution at defense kaya’t kailangan itong mapagkasunduan at malagdaan bago simulan ang paglilitis.

Ayon sa Correctional Institute for Women (CIW), pinayuhan sila ng doktor na huwag dalhin sa korte si Napoles dahil mataas ang kanyang blood pressure.

Tila nairita naman ang mga hukom at kinuwestyon kung bakit tila nagkakasakit si napoles sa tuwing ipinatatawag sya ng korte.

Dahil dito, inatasan ng Sandiganbayan ang CIW na isumite ang health records ni Napoles sa nagdaang taon.

Muling itinakda bukas, February 12, ang pagsisimula ng paglilitis kung saan inatasan ng CIW na iprisinta si Napoles upang malagdaan ang pre-trial order.

Mapanganib na sundan ang quo warranto petition na inihain ng Solicitor General laban sa ABS-CBN.

Ayon kay House deputy speaker Johnny Pimentel, posibleng maging daan ito upang lalong lumakas ang loob ng Office of the Solicitor General (OSG) na maghain ng mga kaso kung may interes sila sa iba pang mga kumpanya.

Nangangamoy krisis rin anya sakaling maaprubahan sa kongreso ang renewal ng prangkisa ng ABS-CBN at pinagbigyan ng Korte Suprema ang quo warranto petition ng OSG.

Gayunman, aminado si Pimentel na bagamat noong nakaraang taon pa mayroong nakahaing panukalang batas para sa renewal ng prangkisa ng ABS-CBN, hindi pa ito inaaksyunan ng committee on legislative franchises.

Posibleng hindi na magpalabas ng warrant of arrest ang korte laban kay Senador Antonio Trillanes at 10 iba.

Si Trillanes, Peter Advincula at iba pa ay kinasuhan ng conspiracy to commit sedition dahil sa paglikha ng “Bikoy videos” kung saan isinasangkot sa illegal drugs ang pamilya ni Pangulong Rodrigo Duterte.

Ayon kay Department of Justice (DOJ) undersecretary Markk Perete, spokesman ng DOJ, maaari kasing unahan na ng mga akusado ang korte at maghain na ng pyansa bago pa mailabas ang warrant of arrest.

Mula sa halos 30 kinasuhan sa DOJ, labing isa lamang ang nakitaan ng sapat na ebidensya upang iakyat sa korte ang kaso.

Sinabi ni Perete na ang mga kinasuhan ay yun lamang napatunayang may direktang kaugnayan sa paglikha ng “Bikoy videos”. —sa panayam ng Ratsada Balita