Dalawa pang Pinoy sa Singapore ang nagpositibo sa coronavirus disease (COVID-19).
Ayon sa Department of Foreign Affairs (DFA) naka-confine na sa health facilities sa Singapore ang naturang mga Pinoy.
Kasabay nito, tiniyak naman ng Philippine Embassy na tutugunan ang pangangailangan ng mga ito.
Ito na ang ikalawa at ikatlong kaso ng Filipino na nagpositibo sa virus sa Singapore.
Posible pang bumaba sa P34 hanggang P35 ang presyo ng bigas kada kilo.
Ito ang inaasahan ng National Economic Development Authority (NEDA) dahil sa patuloy na implementasyon ng rice tariffication law.
Ngunit ayon kay NEDA Asst. Sec. Mercedita Sombilla, maaari rin na hindi bumaba ang presyo ng bigas dahil sa posibleng krisis sa Vietnam o Thailand kung saan umaangkat ang Pilipinas.
Hindi rin isinasantabi aniya ng NEDA ang sitwasyon sa pandaigdigang merkado.
Sa kasalukuyang nasa P36 ang presyo ng kada kilo ng bigas.
Umabot na sa 35 Overseas Filipino Workers (OFWs) sa Hong Kong ang nawalan ng trabaho dahil sa 2019 coronavirus disease (COVID-19).
Ayon kay Overseas Workers Welfare Administration (OWWA) administrator Hans Cacdac, 16 dito ang pinawalang bisa na ang kontrata dahil umalis na ng Hong Kong ang kanilang mga amo dahil sa takot sa COVID-19.
Samantala, ang 12 ng iba pa ay nagkaroon ng hindi pagkakaunawaan sa kanilang employers matapos na hindi sila payagang umalis ng bahay sa kanilang rest day dahil sa pangamba na ma expose sila sa COVID-19.
Sinabi ni Cacdac na maaari pa ring manatili sa Hong Kong ang mga nawalan ng trabaho at puwede silang maghanap ng bagong employer basta’t mayroon silang referral.
Maaari anyang nakakalungkot ang mga pangyayari subalit kung susumain, hindi naman masyadong marami ang naapektuhan mula sa mahigit 200,000 Pinoy sa Hong Kong.
Sampung (10) human rights defenders ang kinasuhan ng perjury dahil sa di umano’y pagsisinungaling sa inihain nilang writ of amparo na hindi naman napagbigyan ng Korte Suprema.
Ang writ of amparo ang ginawang basehan naman ni National Security adviser Hermogenes Esperon sa buwelta nya sa mga human rights defenders.
Ang mga kinasuhan ng perjury sa Quezon City Metropolitan Trial Court ay sina Elisa Tita Lubi –chairperson ng Karapatan, at iba pang opisyal at miyembro nito na sina Cristina Palabay, Roneo Clamor, Krista Dalena ng Gabriela; Editha Burgos –ina ng nawawalang activist na si Jonas Burgos; Jose Mari Calleung at Wilfredo Ruazol, kasama rin si Sister Cupin –isang madre na miyembro ng Rural Missionaries of the Philippines (RMP).
Ayon kay Esperon, nagsinungaling ang mga akusado sa sinumpaan nilang salaysay sa kanilang writ of amparo nang sabihin nilang ang Gabriela, Karapatan at RMP ay rehistradong non-stock profit organization gayung ang RMP certificate of registration ay napawalang bisa na ng Securities and Exchange Commission (SEC) noon pang 2003.
Nagdeklara na rin ng emergency ang Seattle sa pagresponde sa 2019 coronavirus disease (COVID-19).
Isa lamang ang Seattle sa maraming komunidad ng Washington State na nagdeklara ng emergency dahil sa 2019 coronavirus disease (COVID-19).
Lahat ng syam kataong nasawi sa U.S. dahil sa COVID-19 ay nagmula sa Washington State.
Nakatakdang palayain ng Iran ang 54,000 bilanggo sa naturang bansa.
Pangangasiwaan ng ministry of health ng Iran ang pagpapalaya sa mga bilanggo sa layuning mapigilan ang pagkalat ng 2019 coronavirus disease (COVID-19) sa mga bilangguan.
Ayon sa Iran, mahalaga sa kanila ang kalusugan ng kanilang mga bilanggo kahit ano pa ang estado ng mga ito sa buhay.
Kinansela na ng Google ang pinakamalaki nilang event ngayong taon dahil sa banta ng 2019 coronavirus disease (COVID-19).
Ayon sa Google, hindi na muna matutuloy ang 2020 Edition ng Google I/O –isang taunang conference ng mga developers na nakatakda sanang isagawa mula May 12 hanggang May 14 sa Mountain View California headquarters ng Google.
Wala pang announcement kung kailan itutuloy ang naturang conference.
Nakapagtala na ng unang kaso ng 2019 coronavirus disease (COVID-19) ang Chile.
Ang unang kaso ay isang doktor na 33-taong gulang na napag-alamang bumiyahe ng isang buwan sa iba’t ibang bansa sa Timog Silangan.
Nakatakda na umanong palabasin ng ospital ang pasyente subalit patuloy na imomonitor habang nagpapahinga sa kanilang tahanan.
Pinagbabaril ang van na sinasakyan ng aktres na si Kim Chiu.
Bumabaybay sa kanto ng Katipunan Avenue at C.P. Garcia Avenue Sa Quezon City ang van na sinasakyan ng aktres nang paulanan ito ng bala ng dalawang lalakeng sakay ng motorsiklo.
Ayon sa driver ng aktres na si Wilfredo Taberna, pakaliwa sila sa C.P. Garcia nang makarinig sila ng mga putok.
Ayon sa pulisya, anim na beses pinaputukan ang van ni Kim Chiu.
Hindi naman nasaktan ang aktres sa insidente at ang iba pang sakay ng kanyang van.
Na-shock naman ang aktres sa nangyari sa kanila.
Sa kanyang post sa social media, sinabi ni Kim Chiu na wala syang ideya kung mistaken identity o napagtripan lamang sila.
Nadagdagan pa ang bilang ng mga nasawi dahil sa 2019 coronavirus disease (COVID-19) sa Italy at France.
Batay sa ulat ng Civil Protection Agency ng Italy, umakyat na sa 79 ang death toll sa COVID-19 sa kanilang bansa.
55 anila rito ay naitala sa Northern Lombardy Region na sinundan naman ng Emilia-Romagna Region na nakapagtala ng 18 nasawi.
Sa kabuuan, pumalo na sa mahigit 2,500 ang kumpirmadong kaso ng COVID-19 sa Italy.
Samantala, kinumpirma naman ni France President Emmanuel Macron ang ika-apat na pasyenteng namatay dahil sa COVID-19 sa kanilang bansa.
Umakyat na rin aniya sa mahigit 200 ang kumpirmadong kaso ng virus mula sa 13 apektadong regions sa France.
Sinabi ni macron, posibleng tumagal pa ng isang buwan ang kinahaharap nilang crisis sa COVID-19 kaya mahalaga aniyang magpakita ng determinasyon at pakikiisa ang lahat para maresolba ito.