DWIZ 882

Obligado nang magprisinta ng Medical Certificate ang mga babyahe mula sa Pilipinas at iba pang siyam na bansa bago makapasok sa Kuwait.

Sa inilabas na kautusan ng Civil Aviation ng Kuwait, nakasaad na dapat ay sumailalim muna sa isang medical examination bago makapasok sa kanilang bansa ang mga babyahe mula sa Pilipinas, India, Bangladesh, Egypt, Syria, Azerbaijan, Turkey, Sri Lanka, Georgia, at Lebanon.

Ang mga pasahero umanong mabibigong makapag prisinta ng medical certificate ay hindi papayagang makapasok ng Kuwait at madedeport.

Sa panig naman ng Department of Foreign Affairs (DFA), kanilang ikinalulungkot ang kautusang ito ng Kuwait dahil tiyak anilang magpapahirap lamang ito sa maraming Pilipino ang nagtutungo duon para magtrabaho.

Giit pa ni DFA Undersecretary Brigido Dulay, kung tutuusin aniya ay mas kakaunti ang kaso ng COVID-19 sa bansa kumpara sa Kuwait.

Itinakda na ang pag talakay ng House Committee on Legislative Franchises hinggil sa mga nakabinbing panukala ukol sa franchise renewal ng ABS-CBN Corporation.

Ayon kay House Speaker Alan Peter Cayetano, itinakda ito sa Marso 10, 1 p.m.

Inaasahan din aniya ang pagdalo dito ng mga opisyal ng National Telecommunication Commission (NTC).

Nilinaw din Cayetano na magsisilbing pulong o meeting lamang ang mangyayari sa nasabing araw.

Layon lamang aniya nito na mailatag ang mga panuntunan na magiging batayan sa mga gagawing pagdinig.

Sisimulan ang pormal na hearing sa Mayo pagbalik ng sesyon ng Kamara matapos ang Lenten break.

Hindi malayong ipasuspinde ni Pangulong Rodrigo Duterte ang operasyon ng  Philippine Offshore Gaming Operators (POGO).

Ito ang tugon ng Malakaniyang para patunayang hindi malambot ang pangulo sa pagpapataw ng parusa sa mga Chinese na nasasangkot sa mga krimen at iligal na aktibidad sa bansa.

Ayon kay Presidential spokesman Salvador Panelo, walang sinasanto ang pangulo maging ito pa ay dayuhan basta nagakagawa ng krimen o lumabag sa batas ay tiyak na mananagot ito.

Giit pa ni Panelo walang binibigay na proteksyon ang pamahalaan sa mga Chinese na narito sa bansa maging ito ay turista o nagta-trabaho.

Magugunitang naglabasan ang iba’t ibang kontrobersya kung saan nasasangkot ang mga Chinese sa bansa gaya ng pastillas scheme, prostitution den, money laundering, droga, kidnapping.

Bukas na ulit ang Pilipinas sa pagtanggap ng donasyon at pangungutang mula sa mga bansang sumuporta sa Iceland sa pag-iimbestiga nito sa anti-drug war ng administrasyong Duterte.

Ito’y matapos lagdaan ni Executive Secretary Salvador Medialdea ang memorandum na nagli-lift sa naturang suspension order ni Pangulong Rodrigo Duterte.

Gayunman, nakasaad sa kalatas na kailangan munang tiyaking sumusunod sa mga panuntunan ang mga miyembro ng gabinete bago ito tumanggap ng donasyon o mangutang.

Hindi naman idinetalye pa ang dahilan ng pagbawi sa suspension order.

Magugunitang nagalit nuon ang pangulo sa Iceland dahil sa pakikialam umano nito sa panloob na usapin sa Pilipinas.

Pinabulaanan ng National Economic Development Authortiy (NEDA) ang umano’y P68-billion na lugi ng mga magsasaka sa unang taon ng implementasyon ng Rice Tariffication Law (RTL).

Paliwanag ni NEDA Assistant Secretary Mercedita Sombilla, ang ginawang basehan ng pagaaral ng Federation of Free Farmers (FFF) kung saan lumabas ang nasabing halaga ay ang artificial rice shortage na hindi naman aniya normal na sitwasyon.

Samantala, hindi naman matukoy ng Department of Agriculture (DA) ang kabuuang halaga ng nalugi sa mga magsasaka dahil sa RTL.

Gayunman sinabi ni Agriculture Secretary William Dar na masyadong malaki ang sinasabi ng FFF.

Ani Dar, hindi dapat kalimutan ng mga magsasaka ang mga ayudang ibinigay ng pamahalaan gaya na lamang ng P10-bilyong Rice Competitiveness Enhancement fund, P2.5-billion survival and recovery assistance, at iba pa.

Ngunit hindi rin naman umano maiaalis ang posibilidad na bumaba nga ang kita ng mga magsasakay dahil sa RTL na nagbigay ng pahintulot sa pagpasok ng napakaraming imported na bigas sa merkado.

Pinaghahandaan na ng Department of Labor and Employment (DOLE) ang mga ilalatag na polisiya para sa mga manggagawang maaapektuhan nang coronavirus disease 2019 (COVID-19) sa Pilipinas at sa buong daigdig.

Ito’y sa pangambang tumagal pa ang pagkalat ng sakit hanggang Hunyo o Disyembre 2020.

Ayon kay Labor Secretary Silvestre Bello III, magpapatupad ang ahensya ng mitigating measures gaya ng implementasyon ng mekanismo para sa mga negosyo na mag-adopt ng flexible work arrangements.

Nariyan din ang mabilis na aksyon kaugnay sa job displacement ng Philippine Overseas Labor Office (POLO).

Aalamin din aniya ang mga prayoridad sa pagkakaloob ng financial assistance sa pamamagitan ng adjustment measures program (AMP).

Maaari din umanong matulungan ang mga apektadong mangggawa sa pamamagitan ng pagsasailalim sa mga ito sa mga programa ng Technical Education and Skills Development Authority (TESDA).

Samantala, isang centralized monitoring system naman ang ilalagay ng DOLE para makita ang estado ng mga manggagawang apektado ng COVID-19.

Pinagbibitiw sa pwesto ni National Bureau of Investigation (NBI) officer-in-charge Eric Distor ang mga opisyal at kawani ng ahensya na nais lamang magpayaman sa pwesto.

Sa turnover ceremony kahapon, sinabi ni Distor na hindi lugar ng pagpapayaman ang mga ahensya ng gobyerno na nagbibigay serbisyo publiko.

Ani Distor dapat ay negosyo ang pasukin ng mga may planong magpayaman at hindi posisyon ang gagamitin para gumawa ng mga katiwalian.

Kapag kasi aniya nakaugalian na ang pagtanggap ng suhol ay tiyak na tapos na layunin nitong makapaglingkod sa bayan.

Maaari na muling makabyahe ang sinumang Pinoy patungong South Korea, maliban sa mga lugar na apektado ng coronavirus disease 2019 (COVID-19) outbreak.

Ito’y matapos ipatupad ng Bureau of Immigration (BI) ang partial lifiting ng travel ban sa South Korea ngayong Miyerkules.

Ayon sa pahayag na ipinalabas ng BI, pupwede na muling makabyahe ang sinumang Pinoy patungong South Korea maliban sa North Gyeongsang Province, Daegu, at Cheongdo, na matinding naapektuhan ng COVID-19 outbreak.

Una rito, tanging mga Korean permanent resident visa holders, OFWs, at mga estudyante lamang ang pinapayagang makabyahe sa nasabing bansa matapos magpatupad ang Pilipnas ng travel ban dito dahil sa banta ng COVID-19.

Nanguna kasi ang South Korea sa may pinakamaraming kaso ng nasabing virus sa labas ng China.

Sa ngayon, mayroon nang mahigit 5,000  kumpirmadong kaso ng COVID-19 sa South Korea at 32 katao na ang naitatalang namatay.