Naglaan ng halos P853 milyon pondo ang Department of Agriculture (DA) para sa mga magsasaka at mangingisdang naapektuhan ng bagyong Odette.
Ayon kay DA Secretary William Dar, nakahanda na ang mahigit P355.26 milyong halaga ng mga buto, fingerlings at biologics at ang limang daang milyong piso para sa rehabilitation at recovery efforts.
Samantala, sinabi rin ni Dar na makatatanggap ang mga mangingisda ng mga bagong bangka at repair materials.
Inihayag ni Department Of Social Welfare and Development (DSWD) Spokesperson Irene Dumlao, na nakahanda na ang pondo para sa relief goods at non-food items na ipapamahagi sa mga residenteng apektado ng Bagyong Odette sa ilang lugar sa bansa.
Ayon kay Dumlao, nasa ₱900M halaga ng pondo ang nakalaan para sa mga apektado ng Bagyong Odette.
Sinabi ni Dumlao na ang naturang pondo ay karagdagang tulong dahil mayroong standby funds ang mga local government units sakaling tamaan ng bagyo ang kanilang lugar.
Sa ngayon, nakikipag-ugnayan na ang ahensya sa mga regional directors kabilang na ang Caraga, Regions 6,7,8, region 10 at para sa pinakabagong sitwasyon ng kanilang lugar matapos manalasa ang Bagyong Odette. —sa panulat ni Angelica Doctolero
LANTARANG inupakan ng abogado ng Volunteers Against Crime and Corruption (VACC) ang umano’y “obvious conspiracy” ng Kapamilya network para makalusot pabalik ang prangkisa nito nang walang approval ng Kongreso, sa pamamagitan ng pasikot-sikot sa tulong ng mga kaibigan at kaalyado sa Senado at Kamara.
Ang pahayag ay ginawa ni Atty. Ferdinand Topacio, chief legal counsel ng VACC, kasabay ng apela sa liderato ng Senado na i-rekonsidera ang pag-apruba sa ikatlong pagbasa sa kontrobersyal na Senate Bill No. 1530 na inakda ni opposition Senator Franklin Drilon at sa halip ay ibalik ang panukala sa tamang komite para karagdagang hearings na may partisipasyon ng mga apektadong stakeholders sa media industry.
May counterpart measure din ito sa Kamara, ang House Bill No. 7923, na inihain ni Parañaque Rep. Joy Tambunting.
Ipinaliwanag ni Topacio na ang Senate Bill No. 1530 at House Bill No. 7923, ay kapwa humihiling na amyendahan ang Section 18, Book VII, Chapter 3 ng Executive Order 292, na nagsasaad na “the franchise or license that needs a congressional grant will not expire as long as the franchise or license holder makes timely and sufficient application for the renewal of a license or franchise xxx until the application shall have been finally determined by the xxx branch of government that grants or renews such xxx franchise.”
Inihain ni Drilon ang Senate Bill No. 1530 noong May 13, 2020.
Sinabi ni Topacio na sa kaparehong araw, May 13, 2020, na may “identical wording”, inihain din ni Tambunting ang HB 7923.
Nabatid na si Tambunting ay producer sa ABS-CBN simula 1988 hanggang sa huling bahagi ng 90s, at na-assign para pangasiwaan ang ilang top-rated entertainment content sa nasabing network.
“The ‘conspiracy’ is obvious from the synchronicity of the filing and the identity of the words of the proposed law, one from the Senate and another from the House,” ani Topacio, na siya ring national chairman ng Citizens Crime Watch.
“Although general in its application, it is quite clear that the proposed legislation is aimed at reinstating or revivifying the franchise of ABS-CBN and Amcara Broadcasting Network, whose franchises have expired and which have been the subject of cease-and-desist order from the National Telecommunications Commission,” sabi pa ni Topacio, kasabay ng pagsasabing noong nakaraang taon ay inakusahan ni Cavite Rep. Jesus Crispin Remulla ang Amcara bilang “dummy” ng ABS-CBN.
Sa congressional hearings para sa renewal ng franchise ng ABS-CBN, sinabi ni Topacio na ang mga mambabatas na sumusuporta sa istasyon ay paulit-ulit na iginiit na dapat payagang magpatuloy ang operasyon ng ABS-CBN habang tinatalakay ang isyu ng renewal nito, kahit lagpas-lagpasan ang expiration nito gaya ng nakasaad sa batas.
Ito ang kaparehong probisyon na nakita sa proposed amendment sa batas na inakda nina Drilon at Tambunting, ayon kay Topacio, kasabay ng paggiit na “said legal position is untenable, as argued by those who opposed the said contention, because of the doctrine of no franchise, no operation enunciated in the leading case of Associated Communications v. NTC, decided in 2003 and penned by then Chief Justice Reynato Puno, and that the NTC cannot issue a license for any media outfit to operate without an approved legislative franchise.”
Sa katunayan, binigyan diin ng abogado na noong nakaraang taon lamang, ay pinagtibay ng Supreme Court ang ceast-and-desist order ng NTC sa ABS-CBN Broadcasting Corporation ay hindi grave abuse of discretion.
Giit ni Topacio, layunin ng Senate at House Bills na makamit ang “holdover franchise” upang magpatuloy pa ang entity hangga’t hindinpa inaaprubahan ang kanilang renewal o habang tinatalakay ng Kongreso ang kuwestiyon sa kanilang renewal.
Maliban dito, inihalintulad ni Topacio ang sitwasyon sa expired passport, kung saan hindi maaring mag-apply ng bagong pasaporte bago mag-expire ang luma, at kapag expire na ay hindi na ito papayagang bumiyahe dahil kailangan nitong mag-apply ng panibago.
Matatandaan na noong Pebrero 2020 nang ihayag ni Speaker Lord Allan Velasco na ang mga panawagan na i-revive ang franchise ng ABS-CBN klay kailangang maghintay ng susunod na Congress, dahil ang natitirang panahon nila ay inilaan para sa priority measures ng Duterte administration dahil kakaunti na lang ang panahon bago ang 2022 elections.
Nagsagawa ng aerial inspection si Pangulong Rodrigo Duterte kasama si Senator Christopher “Bong” Go kahapon sa Dinagat Island na isa sa naapektuhan ng Bagyong Odette.
Sa facebook post ni Go, ibinahagi niya ang kanilang larawan ng Pangulo sakay ng isang aircraft habang iniinspeksiyon ang nasabing lugar.
Bukod sa nasabing lugar, nagkasa din ng inspeksiyon si Pangulong Duterte sa bahagi ng Surigao City at Maasin City, Southern Leyte.
Iniugnay naman ni Go sa Bagyong Yolanda ang pananalasa ng Bagyong Odette matapos masira ang mga pananim, mawasak ang mga bahay, gusali, mga puno at poste sa mga nabanggit na lugar.
Ayon kay Go, planong bisitahin ng pangulo ngayong araw at magsagawa ng aerial inspection sa probinsya ng Bohol At Cebu. —sa panulat ni Angelica Doctolero
Balik operasyon na ang ilang pantalan sa mga lugar na naapektuhan ng pananalasa ng bagyong Odette kabilang na dito ang Matnog Port sa Sorsogon at Calapan City Port sa Oriental Mindoro.
Ayon sa mga port manager ng Philippine Ports Authority sa mga nabanggit na lugar, regular na ang biyahe ng mga pasahero makaraang makalabas ng philippine area of responsibility si bagyong Odette.
Sa ngayon, inalis narin ang gale warning sa dalawang lalawigan.– Sa panulat ni Angelica Doctolero
Patuloy na nagsasagawa ng operasyon ang mga tauhan ng Puerto Princesa Disaster Risk Reduction and Management Office at Palawan DRRMO sa mga lugar na lubhang naapektuhan ng pananalasa ng bagyong Odette.
Ito ay makaraang makaranas ng malakas na pag-ulan na may matinding pagbugso ng hangin dahilan ng pagkawasak ng mga bahay, gusali at pagbagsak ng mga poste ng kuryente
Lumubog din ang mga bangkang nakatali dahil sa mataas na alon habang nawalan rin ng komunikasyon sa lugar.
Wala namang naiuulat na casualty o mga nasaktan sa Puerto Princesa, Palawan dulot ng pagtama ng bagyo pero nagpapatuloy ang pamamahagi ng tulong at paunang ayuda sa mga residente. –Sa panulat ni Angelica Doctolero
Nanawagan na ng tulong ang mga residenteng naapektuhan matapos manalasa ang bagyong Odette sa Surigao City.
Ayon sa ilang mga residente, hirap silang makahanap ng malinis na tubig at makakain dahil back to zero ang kanilang lugar.
Matatandaang winasak ni bagyong Odette ang mga bahay, gusali, sasakyan, mga puno at poste sa ilang mga lugar na isinailalim sa signal no. 3, 2 at 1.
Sa pahayag ng isang residente na kinilalang si kuya Roland, kahit bulok na pagkain ay kanila paring kinakain upang maitawid lang ang kanilang pang-araw-araw na pamumuhay.
Maging ang mga basang bigas ay kanila ring ibinibilad upang mapakinabangan pa ng mga nasalantang pamilya sa lugar.
Sa dagat narin kumukuha ng tubig bilang panligo at panlaba ang mga residente.
Samantala, nanawagan din si Vice-Governor Geed Gokiangkee na sana ay maibalik na sa kanilang lugar ang mga linya ng komunikasyon upang makahingi ng tulong ang mga residente sa kanilang mga kamag-anak sa ibang lugar. — Sa panulat ni Angelica Doctolero
Inihayag ng Department of Health (DOH) na kanilang sosolusyonan ang problema sa mga vaccination site na naantala sa pagbabakuna sa ilalim ng 2nd round ng bayanihan, bakunahan dahil sa bagyong Odette.
Ayon kay Health Undersecretary Myrna Cabotaje, pinag-aaralan na ng kanilang ahensya ang paglutas sa naturang problema maging ang pagkaantala sa biyahe ng mga bakuna sa ilang lugar sa Visayas at Mindanao.
Sa kabila naman ng kawalan ng suplay ng kuryente sa ilang lugar, nilinaw ni Cabotaje na kayang tumagal ng mga bakuna ng hanggang dalawang araw basta hindi bubuksan ang mga freezer nito.
Kailangan din na plus-2 to plus-8 at sobra ang mga yelo na ilalagay para mapanatili ang temperatura nito.
Ayon pa sa ahensya, nasa mga lokal na pamahalaan na kung uunahin nila ang relief goods o ang limitadong shelf life ng mga bakuna.
Sa ngayon, hinihintay pa ng DOH ang report mula sa kanilang regional offices kaugnay sa mga naapektuhang medical facilities para malaman kung anong tulong ang kakailanganin sa mga apektadong lugar. –Sa panulat ni Angelica Doctolero
Nakatanggap ng 940,800 doses ng Moderna Covid-19 vaccine ang Pilipinas na donasyon mula sa bansang Germany
sa pamamagitan ng Covax facility initiative.
Ayon sa National Task Force against Covid-19, dumating sa Ninoy Aquino International Airport (NAIA) Terminal 3 ang mga bakuna alas diyes ng gabi noong Biyernes sakay ng eroplanong SQ918 flight.
Samantala, dumating din kagabi sa Ninoy Aquino International Airport ang nasa 811,980 na Pfizer Biontech Covid-19 vaccines na ibinigay ng French government mula sa Covax facility kung saan, karagdagan pang mga bakuna ang posibleng dumating sa Miyerkules na naglalaman ng Pfizer at Astrazeneca vaccines na may kabuuang halos 6 milyong donasyon.
Ang naturang mga bakuna ay bahagi ng mahigit 9 million vaccine donation at inaasahang maihahatid ng mga bansang miyembro ng EU bago matapos ang taon.
Base sa national covid-19 vaccination dashboard, ang Pilipinas ay nakapag-administer na ng mahigit 100 milyong bakuna, kung saan humigit-kumulang apatnaput tatlong milyong pilipino na ang fully vaccinated. –Sa panulat ni Angelica Doctolero
NANGUNA na naman ang tambalan nina dating senador Ferdinand “Bongbong” Marcos Jr. at Davao City Mayor Sara Duterte sa pinakahuling presidential at vice presidential survey ng Publicus Asia Inc.
Nabatid na sa Dec. 6-10, 2021 Pahayag Q4 survey na nilahukan ng 1,500 respondents, nanguna sa mga presidentiable si Marcos na nakakuha ng 51.9% na sinundan ni Vice-President Leni Robredo, 20.2%; Manila Mayor Isko Moreno, 7.9%; Sen. Bong Go, 3.9%, Sen. Ping Lacson, 3.4%. at Sen. Manny Pacquiao, 2.3%.
Sa vice presidential candidates, nanguna si Mayor Sara na nakakuha ng 54.8% habang sumunod naman sina Dr. Willie Ong, 11.2%; Senate President Vicente Sotto III, 11.0%; Senador Kiko Pangilinan, 9.7%; Buhay Partylist Rep. Lito Atienza, 1.5, at Walden Bello, 0.7%.
Samantala, sa isa namang presidential at vice presidential pre-election survey ng DZRH sa buong bansa, nanguna rin ang BBM-Sara UniTeam.
Ayon sa DZRH, sa Dec. 11-12 survey, nanguna sa presidential aspirants si Marcos sa pamamagitan ng 49.2% kung saan sinundan nina Robredo, 16.2%; Moreno, 10.4%; Pacquiao, 8.2%; Go, 5.8%; at Lacson, 4.9%.
Maliban dito, humataw din si Mayor Sara sa hanay ng vice presidentiables makaraang makakuha ng 50.5% habang sumunod sina Sotto, 20.7%; Pangilinan, 10.2%; Ong, 8.4%; Atienza, 2.2%; at Bello, 7.2%.