Nasunog ang isang residential area sa Figueroa Street, FB Harrison, Barangay 70, Pasay City.
Ayon sa Bureau of Fire Protection (BFP), naitala ang unang alarma alas-3 ng hapon kahapon na umabot ng halos isang oras bago idineklarang fire under control.
Patuloy pang inaalam ng mga otoridad kung ilan ang naapektuhan at kung may mga nasawi o nasugatan habang tinitignan narin ang dahilan ng sunog. —sa panulat ni Angelica Doctolero
Ikakasa na bukas, January 6, 2022 ang vaccination drive para sa mga senior citizen sa National Capital Region (NCR).
Ayon sa Department of Health (DOH), tututukanng kanilang ahensya ang pagbabakuna kontra COVID-19 sa mga may edad 60 pataas.
Sa pahayag ni Dr. Amelia Medina ng DOH-NCR, 52,000 o 5% ng senior population ang hindi pa nababakunahan kontra COVID-19 habang higit 763,000 naman ang kuwalipikadong magpa-booster shots.
Nabatid na papayagan ang mga senior citizens na makapili ng brand ng bakunang ituturok sakanila.
Sinabi ng ahensya na mas dumami ngayon ang mga gustong magpabakuna kontra COVID-19 sa Metro Manila matapos ianunsiyo ang alert level 3 sa NCR dahil sa muling pagsirit ng kaso ng COVID-19.
Sa ngayon, pumalo na sa mahigit 50 milyong indibidwal ang fully vaccinated na kontra COVID-19 sa Pilipinas. —sa panulat ni Angelica Doctolero
Arestado ang isang babaeng matapos mahulihan ng mahigit P400K na halaga ng shabu sa buy-bust operation sa Lucena City, Quezon.
Kinilala ang suspek na si Reichell Alvarez, 41- anyos.
Ayon kay Col. Joel villanueva, Hepe ng sa Quezon Provincial Police, pinagbentahan ni Alvarez ang kanilang undercover agent ng isang pakete ng shabu.
Narekober sa suspek ang limang plastic sachet ng shabu na tumitimbang ng 15.36 gramo na tinatayang nagkakahalagang P104,448.
Bukod pa ito sa nasabat na mga illegal substance na nagkakahalaga naman ng P313,344.
Nahaharap ngayon sa kasong paglabag sa Comprehensive Dangerous Drugs Act of 2002 ang suspek. —sa panulat ni Mara Valle
Nagsasagawa na ng imbestigasyon ang Bangko Sentral ng Pilipinas (BSP) matapos pagkalat ng mga pekeng 1,000 piso.
Ito ay matapos makatanggap ng reklamo ang BSP mula sa mga negosyanteng nabiktima umano ng pekeng pera mula sa kanilang mga customer.
Nabatid na ang ilan sa mga tindahan ay napilitan nang gumamit ng UV light upang masiguro sa ibinabayad na perang papel mula sa mga bumibili sa kanilang paninda.
Ayon sa mga nagtitinda, malaking halaga sakanila ang 1,000 piso dahil ito ang bumabawi sa kanilang inilabas na puhunan sa kanilang paninda.
Dahil dito, nagpaalala ang BSP na dapat ay maging alisto at mapanuri ang publiko pagdating sa pera para hindi mabiktima o maloko ng mga fake money. —sa panulat ni Angelica Doctolero
Nasunog ang ikalawang palapag ng isang bahay sa bahagi ng Maharlika Village sa Taguig City.
Ayon sa Bureau of Fire Protection Taguig, ang nasunog na bahay ay pag-aari ni Hadja Normain tulawi kung saan, itinaas ang unang alarma bago ideklarang fire under control.
Wala namang naiulat na nasawi o nasaktan sa sunog pero aabot sa tinatayang P90,000 ang halaga ng naabong ari-arian. —sa panulat ni Angelica Doctolero
Isang lalaki ang patay matapos sakalin at pukpukin ng bato ng sarili nitong anak sa Negros Occidental.
Kinilala ang biktima na si Romulo Espenido, 76- anyos at suspek na si Julius Roy, 33- anyos.
Ayon kay Talisay City Police Deputy Chief, Lt. Marion Vincent Buenaflor, dumaing ang suspek na masama ang pakiramdam nito at minasahe naman ng biktima nang bigla nitong atakihin ang kanyang ama at pukpukin ng bato sa ulo.
Wala naman anyang alitan ang mag-ama at napag-alamang wala sa tamang katinuan ang suspek. —sa panulat ni Mara Valle
Inanunsiyo kahapon ng provincial government na zero COVID cases na ang island province ng Batanes.
Ito ay matapos makapagtala ng isang active case noong December 31, 2021 kung saan, ikinatuwa ito ng mga residente.
Matatandaang Setyembre noong nakaraang taon nang maitala ang mataas na kaso ng COVID-19 sa nasabing lugar kung saan ay nakapagtala din ng unang nasawi sa naturang sakit.
Sa kabila nito, nagpaalala pa rin ng provincial government sa mga residente na panatilihin ang pagsunod sa health and safety protocols lalo’t may panibagong virus ng COVID-19 na Omicron variant. —sa panulat ni Angelica Doctolero
Nag set-up na ng Driver-Thru Vaccination Site sa Bonifacio Shrine sa tabi ng Manila City Hall para sa COVID-19 boosters ng mga delivery rider.
Ayon sa Lokal na Pamahalaan, ang naturang vaccination site ay magbubukas simula bukas, Enero a-6, mula alas-8 ng umaga hanggang ala-5 ng hapon.
Tiniyak naman ng LGU ng Maynila na magiging available ang lahat ng uri ng COVID-19 vaccine sa Drive Thru Vaccination Site. —sa panulat ni Mara Valle
Apat na miyembro ng pamilya ang nasawi habang nakaligtas naman ang isa pa matapos masunog ang isang bahay sa Barangay Concepcion sa Virac, Catanduanes kahapon.
Ayon sa mga otoridad, nabalot ng sunog ang ikalawang palapag ng bahay habang natutulog ang nasabing pamilya.
Sa inisyal na imbestigasyon ng mga otoridad, lumalabas na faulty electrical wiring dahil sa octopus connection ang pinagmulan ng sunog.
Sa ngayon nakaburol na ang mga nasawing biktima sa nabanggit na lugar. —sa panulat ni Angelica Doctolero
Humingi na ng paumanhin sa publiko ang United Laboratories (UNILAB) sa gitna ng numinipis umanong supply ng paracetamol at iba pang gamot sa ubo, sipon at lagnat sa ilang drugstore.
Ayon sa UNILAB, pansamantalang “out of stock” ang ilang brand ng kanilang gamot sa mga piling drugstore dahil sa “extraordinary demand.”
Tiniyak din ng naturang pharmaceutical company na nakikipag-ugnayan na sila sa kanilang partner drugstores at retailers upang mapabilis ang replenishment ng mga supply sa lalong madaling panahon.
Sa pag-iikot ng DWIZ kagabi sa ilang drugstore sa Sangandaan, Caloocan at Tundo, Maynila, nagkaubusan o limitado na lamang ang supply ng ilang UNILAB products tulad ng Biogesic, Neozep at Bioflu. —sa panulat ni Mara Valle