DWIZ 882

Mahigit P9-B ang nawala sa koleksiyon ng pamahalaan dahil sa laganap na smuggling ng bigas, baboy, manok, gulay, sibuyas at iba pang mga agricultural products, noong isang taon.

Ayon kay SINAG Chairman Rosendo So, maaaring ito ang dahilan kaya’t tumatanggi ang Department of Agriculture mag-quarantine muna ng mga inaangkat na agri-products kahit may pondo para sa first border inspection noon pang December 2019.

Ikinalulugi anya ito ng mga magsasaka at iba pang producers, bukod pa sa nalalagay sa alanganin ang kalusugan ng mga tao at nadadaya nito ang koleksiyon sa buwis ng pamahalaan na magagamit sana para sa pangangailangan ng mamamayan.

Binatikos din ni So ang Department of Justice dahil sa kabiguan nitong magpakulong ng mga smuggler ng agricultural products kahit pa may mga operasyon laban sa smuggling ang iba’t-ibang ahensiya ng pamahalaan.  —sa panulat ni Mara Valle

Ipatutupad ng Bureau of Immigration (BI) ang 60% on-site capacity sa kanilang mga empleyado makaraang ipatupad ng Inter-Agency Task Force (IATF) ang alert level 3 sa Metro Manila.

Sa pahayag ni BI Commissioner Jaime Morente, nag-ooperate ang kanilang ahensya ng 50% at 70% skeleton workforce bilang pagsunod sa health and safety protocols.

Ayon kay Morente, ang mga kliyenteng fully vaccinated na pupunta sa kanilang tanggapan ay kailangang magpakita ng vaccination cards o certification habang ang mga hindi bakunado ay kinakailangang mag-set ng appointment online.

Samantala, ang mga dayuhan naman na nagre-report para sa annual report 2022 ay kinakailangang kumuha ng appointment sakanilang website. —sa panulat ni Angelica Doctolero

Pinalawig ng Department of Labor and Employment ang kontrata ng contract tracers dahil sa muling pagtaas ng COVID-19 cases sa Metro Manila at ilang lugar.

Ayon kay MMDA Chairman Benhur Abalos, dapat ay nagtapos na noong Disyembre 2021 ang kontrata ng mga kinuhang contract tracer.

Gayunman, dahil sa biglang pagdami muli ng kaso ng covid-19 ay nagpasya ang DOLE na i-renew ang kontrata ng mga ito.

Dahil din anya sa isyu sa budget ay nabitin ang mga contact tracers na kinuha ng Department of Interior and Local Government at Department of Health.  —sa panulat ni Mara Valle

Ipagagamit ng Baguio City LGUs ang easy-to-use Coronavirus disease test o COVID-19 home testing kits para sa mga residente.

Kasunod ito ng pag-apruba ni Mayor Benjamin Magalong Jr. sa antigen self-test kits laban sa COVID-19.

Nabatid na aabot sa 316,231 tests kits ang ipapamahagi sa lungsod ngayong taon.

Ang do-it-yourself testing kits ay una nang ginagamit sa US, Canada, Europe at Singapore upang mapangalagaan at mamonitor ng bawat pamilya ang kanilang kalusugan. —sa panulat ni Angelica Doctolero

Naibalik na sa Visayas ang linya ng komunikasyon matapos manalasa ang bagyong Odette.

Kabilang sa mga lugar na mayroon nang network services ay ang Anda, Dauis, Loon at Panglao sa Bohol, San Fernando sa Cebu, Baybay, Albuera sa Leyte, at Limasawa sa Southern Leyte.

Bukod sa Visayas, naibalik na rin ang linya ng komunikasyon sa Tagana-An sa Surigao Del Norte

Layunin ng local government units na mapabilis ang restoration efforts sa mga lugar na nasalanta ng bagyo. —sa panulat ni Angelica Doctolero

Sinabi ni presidential aspirant Sen. Panfilo “Ping” Lacson na siya ay naka-isolate matapos ma-expose sa COVID-19.

Sa twitter post ni Lacson, sinabi nitong nakakaranas siya ngayon ng sore throat o pananakit ng lalamunan na isa sa mga sintomas ng COVID-19 matapos magpositibo sa COVID-19 ang kasambahay ng kaniyang mga kamag-anak at kaibigan na kaniyang nakasalamuha.

Ayon kay Lacson, fully vaccinated na siya at naturukan narin ng ikatlong dose gamit ang Moderna vaccine.

Sa ngayon, hinihintay nalang ni Lacson ang resulta sa kaniyang swab test. —sa panulat ni Angelica Doctolero

Nakumpleto na ni Vice President Leni Robredo ang quarantine period at nagnegatibo narin sa confirmatory swab test matapos makasalamuha ang kaniyang close-in security na nagpositibo sa COVID-19.

Ayon kay VP Leni nakarekober narin sa COVID-19 ang kaniyang anak na si Tricia makaraang magpositibo noong Pasko.

Sinabi ni Leni na habang siya ay naka-isolate, patuloy parin sa operasyon ang kaniyang mga staff para maghatid ng tulong sa mga Odette victims.

Sa ngayon natapos nadin ang 14 day quarantine ng dalawa pang anak ni VP Leni na sina Aika at Jillian matapos namang makasalamuha ang kanilang kapatid na si Tricia.

Nauna nang sinabi ng bise presidente na siya ay fully vaccianted na at nakatanggap narin ng booster shot. —sa panulat ni Angelica Doctolero

Patuloy na minomonitor ng Department of Science and Technology -Philippine Institute of Volcanology and Seismology (DOST-PHIVOLCS) matapos itaas sa alert level 2 ang sitwasyon ng bulkang Taal.

Ayon sa PHIVOLCS, umabot sa anim na libo’t siyam na raan at tatlumpung tonelada ang sukat ng sulfur dioxide at siyam na raang metro naman ang taas ng ibinuga ng bulkan.

Walang naitalang aktibidad sa naturang bulkan pero nasa 1.59 ang sukat ng acidity at 71.8 degree celsius naman ang temperatura sa main crater lake.

Sa ngayon, ipinagbabawal ng PHIVOLCS ang pagpapalipad ng aircraft malapit sa tuktok ng bulkan maging ang pagpasok sa TAAL volcano island.

Nagpaalala din ang PHIVOLCS na maging alerto sa posibleng biglaang pagputok ng steam o phreatic explosions, volcanic earthquakes, manipis na ashfall at pag-ipon o pagbuga ng mga nakalalasong gas ng Taal volcano. —sa panulat ni Angelica Doctolero