Pumalo na sa 42,443 ang kabuuang bilang ng mga tinamaan ng COVID-19 sa hanay ng Philippine National Police (PNP).
Ito’y ayon sa PNP Health Service ay matapos muling sumipa sa 100 ang naitalang bagong kaso ngayong araw.
Mula sa kabuuang bilang, aabot naman sa 262 ang bilang ng mga aktibong kaso ng virus.
2 lang ang nadagdag sa bilang ng mga gumaling kaya’t nasa 42,056 ang kanilang total recoveries.
Habang nananatili naman sa 125 ang bilang ng mga nasawi sa hanay ng PNP mula sa virus.
Tumaas sa 29% ang hospital occupancy rate sa National Capital Region (NCR).
Sinabi ni OCTA Research Team Fellow Dr. Guido David, mula 17% nuong December 26, umakyat sa 29% ang COVID-19 hospital beds occupancy nitong January 2, 2022.
Habang tumaas sa 29 percent mula sa dating 21 percent ang intensive care unit occupancy rate.
Aniya, mabilis na napupuno ang mga kama na nakalaan para sa mga COVID-19 patients.
Samantala, nananatili nasa “very low level” pa rin ang mga hospital beds occupancy at ICU occupancy sa Metro Manila kumpara nuong nagkaroon ng COVID-19 surge sa bansa.
Matinding krisis ang kinakaharap ng siyudad ng Makati matapos lumobo sa 300 ang aktibong kaso ng COVID-19 sa lungsod.
Ayon kay Makati City Mayor Abby Binay nasa 311 ang aktibong kaso sa naturang lugar, 284 sa mga ito ay naka-quarantine sa kanilang bahay, 13 ang nasa ospital, at 14 naman ang nasa ‘quarantine facility’.
Sa kabuuan ay 45,464 na ang kumpirmadong kaso ng COVID-19 sa Makati, habang 989 ang namatay at 44,218 ang gumaling.
Pumalo naman sa 1,020,773 doses ng COVID-19 vaccine ang na-administer sa lungsod.
Nasa 472,714 naman ang fully vaccinated individuals, na lampas sa target ng lokal na pamahalaan na mahigit 437,000. —sa panulat ni Mara Valle
Ibinaba ng Korte Suprema sa 2 araw ang pagdaraos ng Bar Examination ngayong Enero.
Isasagawa ang bar exams sa Enero 23 at 25 sa harap ng pangamba ng examinees at ng proctors kaugnay ng banta ng Omicron variant at kaugnay ng naging pinsala ng bagyong Odette.
Kaugnay dito, binawasan rin mula sa 8 subjects ay ginawa na lamang ito ng Supreme Court sa 4.
Samantala, pinapayuhan naman ang Bar examinees na mag- self-quarantine sa Enero 9, dalawang linggo mula sa araw ng mismong pagsusulit.
Nilinaw naman ng Korte Suprema na isinulong pa rin nila ang pagdaraos ng bar exams para matugunan ang demand sa bilang ng mga abogado. —sa panulat ni Mara Valle
Ibaban ng Games and Amusements Board (GAB) ang mga players na masasangkot sa game fixing o ang pagbebenta ng mga players sa kanilang laro kung saan, ipapatalo ng professional players ang kanilang laro para manalo ang kanilang kalaban.
Ayon kay GAB Chairman Baham Mitra, sa kangkungan pupulutin ang mga tiwaling manlalaro at mga coach.
Sinabi pa ni Mitra na kanilang babawiin ang mga lisensya at pagbabawalan ding makapaglaro sa anumang professional league sa bansa at posible ring maharap sa kasong kriminal ang mahuhuling lalabag.
Sa ngayon, inimbestigahan na ng GAB, sa pamamagitan ng Anti-Illegal Gambling Unit at legal devision ang naturang isyu ng game-fixing. —sa panulat ni Angelica Doctolero
Nanawagan sa pamahalaan ang mga residente sa Surigao na madaliin ang pamamahagi ng tulong pinansiyal.
Sa ngayon kasi ay kinakapos parin sa pagkain at maiinom na malinis na tubig ang bawat apektado sa lugar.
Bukod pa dito, wala pa ring masisilungan ang mga pamilyang nasalanta ng bagyong Odette sa barangay Consuelo sa Siargao Island, Surigao Del Norte.
Ayon sa mga residente, hindi sapat ang limang libong pisong kanilang natanggap mula sa Department of Social Welfare and Development (DSWD).
Aminado naman ang mga lokal na opisyal na kakaunti pa lang ang nakatatanggap ng tulong pinansiyal sa kanilang lugar dahil sa mabagal na roll-out ng financial assistance na ipinangako ng gobyerno.
Sa ngayon, wala pa ring kuryente sa lungsod at hindi pa stable ang linya ng komunikasyon. —sa panulat ni Angelica Doctolero
Ibinasura ng Commission on Elections ang isa pang petisyon laban kay presidential aspirant Ferdinand “Bongbong” Marcos Jr. na kumukuwestyon sa kanyang pagkakakilanlan.
Ang nasabing petisyon ay inihain ng isang Tiburcio Marcos, na independent presidential candidate sa 2022 elections.
Bukod dito, mayroon pang nakabinbing 5 petisyon laban kay Marcos, kabilang na ang 4 para sa diskwalipikasyon at 1 naman ay para sa kanselasyon ng kanyang COC.
Samantala, inihayag ng COMELEC na kung mananatiling bukas ang mga kaso at natapos na ang botohan at nakamit ni Marcos Jr. ang pinaka-mataas na boto ay hindi maka-aapekto ang mga petisyon, base sa panuntunan ng poll body.
Una nang ibinasura ang petisyon ni independent presidential contender Danilo Lihaylihay ang kanselasyon ng Certificate of Candidacy (COC) ng dating Ilocos Norte Governor. —sa panulat ni Mara Valle
Lalo pang dumami ang bilang ng mga nagpapatest kontra COVID-19.
Nabatid na daan-daang mga indibidwal ang dumagsa sa isang ospital sa Maynila para magpatest laban sa nakakahawang sakit.
Karamihan sa mga pumila sa Chinese General Hospital ay mga nakakaranas ng sintomas ng COVID-19.
Samantala, dumoble din ang bilang ng mga nagpapaswab-test sa mga ospital ng Quezon City kung saan, umabot na sa 40% hanggang 60% ang bilang ng mga nagpapatest.
Maging ang mga private testing centers katulad ng drive thru sa mga ospital ay pinipilahan narin.
Ayon sa ilang mga ospital, dumami ang mga nagpapaswab-test matapos ang nagdaang holiday activities tulad ng Pasko at Bagong Taon. —sa panulat ni Angelica Doctolero
Nakaself-quarantine ngayon si Philippine National Police (PNP) Deputy Chief for Administration P/Ltg. Joselito Vera Cruz matapos maexpose sa COVID-19.
Ayon kay Vera Cruz, kaniyang nakasalamuha ang isang private individuals noong December 31, 2021 na nagpositibo sa COVID-19.
Nilinaw naman ng heneral na wala siyang nararamdaman na kahit anong sintomas maliban na lamang sa sipon.
Samantala, nakatakda namang sumailalim sa RT-PCR test si Vera Cruz. —sa panulat ni Angelica Doctolero
Inihayag ni Chinese Ambassador to the Philippine Huang Xilian na aabot sa 540 millions dollars ang halaga ng ini-angkat na saging ng Pilipinas sa China sa unang siyam na buwan ng taong 2021.
Nabatid na kumukunsumo ang nasabing bansa ng siyam na milyong metrikong tonelada ng saging kung saan, nasa 34.2% na ang naipadala ng Pilipinas sa China Government.
Ayon kay Xilian, ang Pilipinas ang number 1 banana supplier ng China pagdating sa produkto ng saging. —sa panulat ni Angelica Doctolero