Walong lugar lamang sa buong bansa ang nakasailalim sa granular lockdown.
Ayon kay Department of the Interior and Local Government (DILG) Secretary Eduardo Año posible pa itong dumami dahil dumarami ang mga tinatamaan ng Covid-19.
Matatandaang hinikayat ng Malacañang ang mga lokal na pamahalaan na magpataw ng granular lockdown upang pigilan ang pagtaas ng bilang ng kaso ng naturang virus. —sa panulat ni Airiam Sancho
Pumalo na sa apat na pung porsyento (40%) ang positivity rate o dami ng mga nagpopositibo sa covid-19 sa Metro Manila.
Ayon kay OCTA Research Fellow Doctor Guido David, ang mabilis na pagtaas ng impeksyon ng covid-19 ay isang indikasyon na kumakalat na ang omicron variant sa bansa.
Samantala, umakyat na sa dalawamput siyam na porsyento (29%) ang hospital occupancy rate sa NCR mula sa dating labimpitong porsyento (17%) noong Disyembre a-bente sais. —sa panulat ni Airiam Sancho
Aabot sa siyam na put tatlong porsyento (93%) ng mga nasawi dahil sa covid-19 noong 2021 ang mga pasyenteng hindi nabakunahan laban sa sakit.
Ayon kay Department of Health Undersecretary Leopoldo Vega, batay ito sa datos mula Marso hanggang Disyembre noong nakaraang taon.
Aniya, walumpung porsyento (80%) rin sa mga na-ospital dahil sa covid-19 ay hindi bakunado.
Samantala, target ng gobyerno na mabakunahan ang pitumput pitong milyong indibidwal bago mag halalan sa Mayo. —sa panulat ni Airiam Sancho
Inaasahang magsusuplay muli ng i-stock ng mga sikat na brand ng paracetamol at iba pang gamot sa trangkaso ang mga pharmaceutical firm ngayong linggo.
Ayon kay Department of Trade and Industry Secretary Ramon Lopez, hindi nila inaasahan ang pagdami ng demand simula Enero a-uno sa mga botika kung kaya’t nagkaroon ng ‘out of stock’ o kakulangan sa nabanggit na gamot.
Samantala, sinabi ni Lopez na hindi dapat mag-panic buying ang publiko dahil mayroong sapat na i-stock ng medisina para sa nasabing sakit. —sa panulat ni Airiam Sancho
Sinuspinde ng Department of Tourism (DOT) ang akreditasyon ng Berjaya Makati Hotel.
Ito’y matapos na hindi sumailalim sa quarantine ng naturang hotel ang returning overseas filipino na si Gwyneth Chua na nagawa pang magparty sa Poblacion, Makati City at magpositibo sa covid-19 rt-pcr test noong Disyembre a-bente syete.
Binawi rin ng DOT ang permit ng nasabing hotel bilang multiple-use hotel sa kabiguan nitong pigilan si Chua sa paglabag sa quarantine protocols.
Makatatanggap pa rin ng ayuda ang mga residenteng maaapektuhan ng granular lockdown sa NCR.
Ito ang tiniyak ni Metro Manila Chairman Benhur Abalos sa bawat lokal na pamahalaan kung saan aniya’y may pondong nakalaan para sa pagbibigay ng assistance.
Sinabi rin niya na maaaring humirit ang mga lgu ng karagdagang tulong sa Department of Social Welfare and Development (DSWD).
Batay sa datos ng Philippine National Police (PNP), nasa labing anim (16) na mga lugar sa Metro Manila ang na sa ilalimngayon ng naturang lockdown. —sa panulat ni Airiam Sancho
Pinaghahandaan na ng Minor Basilica of the Black Nazarene o simbahan ng Quiapo ang pagsasagawa ng ‘online mass’ sa darating na Linggo para sa paggunita ng kapistahan ng Poong Nazareno.
Aniya, hinihintay na lamang nito ang desisyon ng IATF sa inilatag nilang plano upang matiyak ang seguridad ng mga deboto.
Sinabi rin niya na nagkaroon ng aktibidad ang nasabing simbahan kung saan inilibot ang replica ng Nazareno sa iba’t ibang bahagi ng bansa.
Sa ngayon, ito’y nasa John Baptist Calamba Parish, Cathedral ng Cabanatuan, Greenbelt Chapel, at Cubao Cathedral.
Samantala, hinikayat ni Father Badong na makiisa ang mga deboto sa pagdiriwang ng traslacion. —sa panulat ni Airiam Sancho
Tiniyak ng Philippine National Police (PNP) na mahigpit nilang babantayan ang iba’t ibang quarantine hotels hindi lamang sa Metro Manila kungdi maging sa iba pang panig ng bansa.
Ito ang inihayag ni PNP Spokesman P/Col. Roderick Alba kasunod ng pagpuslit sa kaniyang Quarantine Hotel ni Gwyneth “Poblacion Girl” Chua sa Makati City na kalauna’y nagpositibo sa COVID-19 at nagkalat pa ng virus.
Ayon kay Alba, makatutulong ang presensya ng pulisya sa mga quarantine hotel para masupil na ang tinaguriang absentee quarantine modus ng mga balikbayan na ayaw magpasailalim sa mandatory quarantine ng Pamahalaan.
Alinsunod aniya sa direktiba ni PNP Chief P/Gen. Dionardo Carlos, lahat ng pulis ay dapat nakaposte sa paligid ng mga quarantine hotel bilang pagtalima sa kautusan nila Pangulong Rodrigo Duterte at ng DILG.
Sa ilalim kasi ng absentee quarantine modus, madalas nagbabayad na lamang ang isang balikbayan sa mga tauhan ng quarantine hotel upang payagan silang makalabas kahit mahigpit itong ipinagbabawal. —sa ulat ni Jaymark Dagala (Patrol 9)
Kinumpirma ni Valenzuela City Mayor Rex Gatchalian na nagpositbo siya sa COVID-19.
Ito’y ayon sa Alkalde ay matapos siyang sumailalim sa regular na work routine testing sa City Hall.
Ayon kay Gatchalian, nakararanas siya ng very mild symptoms kaya’t maipagpapatuloy pa rin niya ang trabaho kahit nasa isolation facility.
Kasunod nito, tiniyak ng Alkalde na magpapatuloy pa rin ang operasyon ng Pamahalaang Lungsod sa kabila ng kaniyang pananatili sa quarantine.
Pansamantala, inatasan ni Gatchalian si Vice Mayor Lorie Natividad – Borja at ang buong lupon ng City Hall para umalalay sa mga pisikal na pangangailangan ng lungsod. —sa ulat ni Jaymark Dagala (Patrol 9)
Puspusan pa rin ang kampaniya ng Philippine National Police (PNP) kontra sa iligal na droga sa kabila na rin ng mga limitasyon dulot ng COVID-19 pandemic.
Ito’y ayon kay PNP Chief P/Gen. Dionardo Carlos matapos maaresto ng pulisya ang dalawang drug suspek sa buy bust operations na ikinasa sa Valencia, Bukidnon.
Kinilala ng Valencial Municipal Police Station ang mga naarestong suspek na sina Jonathan Ian Agdon at Raul Loregas.
Nasabat ng mga awtoridad mula sa mga naaresto ang may 13 sachet ng hinihinalang shabu na nagkakahalaga ng 1 milyong piso.
Kasalukuyan nang naisailalim sa inquest ang dalawang naaresto habang ihahain na ang mga kaso laban sa kanila partikular na ang paglabag sa RA 9165 o Comprehensive Dangerous Drugs Act of 2002. —sa ulat ni Jaymark Dagala (Patrol 9)