DWIZ 882

Pansamantalang isinara ang Central office ng Land Transportation Franchising and Regulatory Board (LTFRB) ngayon, Enero 6 hanggang Enero 7.

Ito ang inanunsyo ng ahensya kung saan dadaan sa mass swab testing ang kanilang mga empleyado sa mga nasabing araw kasunod ng pagtaas ng bilang ng mga kaso ng COVID-19 sa bansa.

Sinabi pa nito na hindi rin aktibo ang kanilang 24/7 hotline ngayon hanggang sa Enero 9.

Payo naman ng ahensya na maaaring magpadala ng mensahe sa kanilang LTFRB official facebook page para sa mga nais magpahayag ng kanilang katanungan. —sa panulat ni Airiam Sancho

Hindi tumitigil sa panghihikayat ang pamunuan ng Philippine National Police o PPNP sa kanilang mga kabaro na kunin na ang pagkakataon upang mabakunahan kontra COVID-19.

Ito ang panawagan ni PNP Chief P/Gen. Dionardo Carlos sa gitna na rin ng pangamba na apektado na rin ng Omicron variant ng COVID-19 ang kanilang hanay dahil sa biglang pagtaas muli ng naitatalang kaso.

Batay sa datos ng PNP Health Service, umabot na sa 425,082 ang mga bakunang kanilang naibigay kung saan ay nasa 215, 375 o 95.57% ang fully vaccinated na sa PNP.

Nasa 8,445 naman sa PNP o katumbas ng 3.75% ang nakapag-first dose na at hinihintay na lamang ang iskedyul ng kanilang second dose.

Habang nasa 1,523 o katumbas ng 0.68 percent ng mga tauhan ng PNP ang hindi pa nakatatanggap ng bakuna kung saan, 639 dito ang may katanggap-tanggap na dahilan at nasa 884 naman ang sadyang ayaw magpabakuna. —ulat mula kay Jaymark Dagala (Patrol 9)

Pumalo na sa mahigit P11.1B ang pinsala sa agrikultura sa Visayas at Mindanao dulot ng bagyong Odette.

Ayon sa Department of Agriculture (DA), halos 400,000 magsasaka at mangingisda ang apektado.

Nasa mahigit 252, 956 metrikong tonelada  at higit apat na raang libong ektarya ang produiction loss ng agricultural areas sa Calabarzon, Mimaropa, Bicol, Western Visayas, Central Visayas, Eastern Visayas, Zamboanga Peninsula, Northern Mindanao, Davao, Soccsksargen at Caraga.

Samantala, sinabi rin ng DA na nagtamo rin ng pinsala ang mga imprastraktura, makinarya, at kagamitan sa agrikultura. —sa panulat ni Airiam Sancho

Inihayag ni Manila Water Head of Corporate Communications Dittie Galang na mino-monitor nila ang lagay ng Angat dam dahil hindi nito naabot ang projected ideal level ng tubig dahil sa hindi sapat ang naging pag-ulan noong 2021.

Aniya, ang nakuhang suplay ng tubig sa Angat dam ay kukulangin dahil sa patuloy na tumataas na konsumo sa populasyon ng Metro Manila.

Ngunit sinabi ni Galang na pinaghandaan na nila ito at ng National Water Resources Board o NWRB.

Samantala, tiwala ang NWRB na kaya ng current level ng Angat dam na magsuplay ng tubig hanggang sa dumating ang pag-ulan.  —sa panulat ni Airiam Sancho

Mahigpit na nakikipag-ugnayan ang Philippine National Police (PNP) sa iba’t ibang lokal na Pamahalaan na may Quarantine Hotel para sa paglalatag ng mahigpit na seguridad.

Ito’y bilang pagtalima sa kautusan ni Pangulong Rodrigo Duterte sa PNP na bantayang maigi ang mga Quarantine Hotels kasunod ng pagpuslit ng tinaguriang Poblacion Girl na si Gwyneth Chua nuong Disyembre ng isang taon.

Ayon kay PNP Chief P/Gen. Dionardo Carlos, mula sa 408 kabuuang bilang ng mga DOH, Department of Tourism at Bureau of Quarantine accredited Hotels, nasa 367 rito ang nainspeksyon na.

Kinabibilangan ito ng mahigit 9K indibiduwal buhat sa ibayong dagat na kasalukuyang sumasailalim sa mandatory quarantine.

NCR ang nakapagtala ng pinakamaraming bilang ng mga naka-quarantine na may 6,736; sinundan ito ng Central Luzon na may 1,680 habang pangatlo naman ang Central Visayas na may 359 na indibidwal. —ulat mula kay Jaymark Dagala (Patrol 9)

Nangtriple pa ang naitalang bagong kaso ng COVID-19 sa hanay ng Philippine National Police o PNP.

Batay sa datos ng PNP Health Service, pumalo sa 295 ang bilang ng mga bagong kaso ng virus sa kanilang hanay.

Dahil dito, pumalo na sa 42, 645 ang kabuuang kaso ng COVID-19 sa PNP kung saan ay 552 rito ang aktibong kaso.

41,968 naman ang total recoveries ng COVID-19 sa PNP matapos madagdagan ng 3 bagong gumaling sa sakit.

Habang nananatili naman sa 125 ang COVID-19 death toll sa PNP.

Dahil dito, aminado ang PNP na nangangamba silang tila apektado na rin ang kanilang hanay ng nakahahawang Omicron variant ng COVID-19.  —ulat mula kay Jaymark Dagala (Patrol 9)

Tutulong ang Philippine National Police (PNP) sa pagpapatupad ng mga ordinansa partikular sa paglilimita sa galaw ng mga hindi pa bakunado kontra COVID-19.

Ito’y kasunod ng muling pagtaas ng mga naitatalang bagong kaso ng virus dulot ng mabilis na pagkalat ng Omicron variant.

Ayon kay PNP Chief P/Gen. Dionardo Carlos, pananagutan ng mga pamunuan ng mga establisyemento na bigyan ng tamang instruction ang kanilang security personnel hinggil sa ipinasang ordinansa ng kanilang lokal na Pamahalaan.

Kasunod nito, pinaalalahanan ni Carlos ang mga pribadong security agency at security guards na maging laging magalang sa pagtrato ng mga hindi pa bakunado kontra sa virus maliban na lamang kung essential ang kanilang pakay.

Inatasan din ni Carlos ang mga pulis na makipag-ugnayan sa kanilang lokal na Pamahalaan upang maiwasan ang iba’t iba o pabagu-bagong interpritasyon sa mga ordinansang kanilang ipinatutupad.  —ulat mula kay Jaymark Dagala (Patrol 9)

Sinupalpal ng Volunteers Against Crime and Corruption (VACC) ang PDP-Laban Cusi Faction matapos maghain ng petisyon sa COMELEC upang hilinging muling buksan ang filing ng Certificate of Candidacy para sa 2022 elections.

Ayon kay VACC President Arsenio “Boy” Evangelista, ang petisyon ay isang mapanlinlang na hakbang ng ilang tiwaling pulitikong kapit-tuko sa pwesto kapalit ng paghihirap ng mga Filipino.

Ito rin anya ay isang patunay na lantaran ang pagmanipula sa sistema ng pulitika sa gitna ng COVID pandemic na nararanasan ng bansa at matinding epekto sa ekonomiya ng Super Typhoon Odette.

Iginiit ni Evangelista na kahit hindi naman hinagupit ng kambal na trahedya, hindi pa rin balido ang petisyon ng pdp-laban cusi wing dahil itinakda ang deadline ng COC filing noon pang October 8, 2021.

Samantala, binigyang-diin ng VACC Chief na dapat panatilihing sagrado ang electoral process, na pundasyon at diwa ng demokrasyang tinatamasa ng bansa.

Nakikipag-ugnayan na ang Department of Health sa mga kinatawan ng American Pharmaceutical Company na Pfizer para sa pagbili ng Covid-19 antiviral drug na Paxlovid.

Ayon kay Health Secretary Francsico Duque III, nakikipagpulong na ang DOH kay Philippine Ambassador To The Us Jose Manuel Romualdez para sa pag-angkat ng Paxlovid.

Aniya, minamadali na ng Pilipinas ang pagkuha sa mga naturang gamot ngunit idadaan pa rin naman aniya ito sa tamang proseso upang hindi magkaroon ng aberya sa COA.

Mas maigi na anya na sumusunod sa mga nakatakdang guidelines sa pag procure ng mga epektibong gamot.

Samantala, awtorisado na ng US FDA ang Paxlovid kung saan itinuturing na unang at home treatment para sa virus.