Drew Nacino

Bukod sa 24 na lalawigan, namemeligro ring tamaan ng tagtuyot ang Metro Manila simula sa Enero ng susunod na taon sa gitna nang nagbabadyang epekto ng El Niño Phenomenon.

Ayon kay PAGASA Climate Monitoring and Prediction Section Chief Ana Liza Solis, nakararanas na rin ng tagtuyot ang mga lalawigan ng Tarlac at Isabela, simula pa noong Hunyo.

Apektado rin ang Apayao, Cagayan at Kalinga ng dry spells habang nanganganib din ang iba pang lugar sa Luzon.

Idinedeklara ang tagtuyot kapag below normal ang pag-ulan sa limang magkakasunod na buwan.

Samantala, patuloy ang pagbaba ng water level sa angat dam, sa bulacan na pangunahing nagsusupply sa Metro Manila.

Kahit humupa man ang inflation, hindi pa rin maawat ang pagtaas ng presyo ng ilang bilihin, lalo ng bigas.

Sa pag-iikot ng Metro Patrol sa ilang palengke sa Metro Manila, P1 .00 – P3.00  ang itinaas ng presyo ng kada kilo ng bigas.

Dahil dito, bihira na ring makabili ng P39.00 – P40.00 na bigas sa ilang pamilihan sa Valenzuela City habang nasa P41.00 – P 43.00 ang average price ng bigas sa Caloocan City.

Namemeligro namang magmahal pa ang bigas sa mga susunod na buwan sa gitna nang nagbabadyang epekto ng El Niño Phenomenon, partikular sa sektor ng agrikultura.

Gayunman, naniniwala si Samahang Industriya ng Agrikultura (SINAG) Executive Director Jayson Cainglet na sobra pa ang supply ng bigas, maging ng baboy, manok at iba pang basic commodities sa bansa hanggang sa katapusan ng taon.

Ito’y kahit tumigil ang ilang magsasaka na magtanim dulot ng El Niño.

Umapela na ang tulong ang Albay Provincial Government sa National Government bunsod ng nalalapit na pagkaubos ng kanilang budget para sa libu-libong residenteng apektado ng pag-aalburoto ng Bulkang Mayon.

Aminado si Albay Governor Edcel Greco Lagman na kakapusin na ang P32,000,000 calamity fund ng lalawigan upang suportahan ang evacuation efforts simula pa noong June 9.

Ibinabala ni Lagman na posibleng tumagal na lamang ng 15 – 12 araw ang pondo para sa pangangailangan ng mga bakwit.

Hanggang kahapon, mahigit 5,700 pamilya o nasa 20,000 katao ang nananatili sa 34  na evacuation sites.

Inalmahan ng Office of the Vice President ang pahayag ng ACT Teachers Party-List sa ulat na hindi dumaan sa tamang proseso ang pagbili nito ng mga gamit para sa mga binuksang Satellite Office.

Nanindigan ang OVP na walang iregularidad sa procurement ng Satellite Office Equipment na nagkakahalaga ng mahigit 668,000 pesos na validated at pasado mismo sa Commission On Audit.

Sapat na anila ang findings at rekomendasyon ng COA upang pasinungalingan ang ispekulasyon ni  ACT Teachers Partylist Rep. France Castro.

Una nang inihayag ni Congresswoman Castro ang pagkabahala nito sa umano’y minadaling procurement process.

Ikinakasa na ni ACT Teachers Partylist Rep. France Castro ang imbestigasyon sa mga isinagawang procurement ng Office of the Vice President sa ilalargang budget deliberations sa kamara.

Kaugnay ito sa P668,000 na gastos ng OVP para sa pagtatayo ng mga satellite office na sinimulan nang maupo sa pwesto si Vice President Sara Duterte-Carpio.

Aminado si Congresswoman Castro na labis silang nababahala sa umano’y minadaling procurement process

Hindi rin anya ito dapat ipagsawalang-bahala, lalo’t pera ng taumbayan ang pinag-uusapan.

Magugunitang nasilip ng Commission on Audit ang kabiguan ng OVP na tumalima sa procurement rules at processes sa pagbili nito sa mga property na nagkakahalaga ng P668,000 para sa satellite offices noong July 2022.

Nagsasagawa na ng case build up ang Department of Justice laban sa mga indibidwal at grupong sa sangkot sa pagpupuslit ng sibuyas at iba pang produktong pang-agrikultura.

Tiniyak ng DOJ Na sa oras na handa ang mga kaso ay maghahain sila ng mga reklamo laban sa mga sangkot sa smuggling.

Saklaw ng imbestigasyon ang mga paglabag sa Republic Act 10845 o Anti-Agricultural Smuggling Act of 2016 at iba pang batas.

Target sa RA 10845 ang illegal importation ng agricultural products, kabilang ang sibuyas at may katapat na mabigat na parusa.

Dibdiban na ang pag-e-ensayo ng Philippine Women’s National Football Team o kilala bilang Filipinas para sa 2023 FIFA Women’s World Cup na gaganapin sa New Zealand ngayong buwan.

Sa kanyang pagharap sa Summit Thirst for Gold Press Conference kamakailan, inihayag ni Filipinas Goalkeeper Kiara Fontanilla na pursigido ang kanilang koponan na umabante sa group stage.

Ayon kay Fontanilla, gutom din sila na masungkit ang kanilang unang goal sa torneyo, partikular sa group a kung saan kanilang sasagupain ang Switzerland, New Zealand at Norway.

Unang makakaharap ng Filipinas ang Switzerland sa July 21 sa Auckland na susundan ng host team New Zealand sa July 25 at Norway sa July 30.

Itinuturing na underdog sa torneyo ang Philippine Team sa 46th rank ng FIFA, habang nasa 20th ang Switzerland; 26th ang New Zealand at Norway na nasa 12th rank.

Sa kabila nito, umaasa si Coach Isabella Fernando Dela Cruz na magiging inspirasyon sila para sa mga  kabataang pinay na makamit ang pangarap na makasungkit ng tagumpay sa world cup.

Bitbitin ng Filipinas ang filipino pride lalo’t ito ang unang beses na tatapak sila sa FIFA Women’s World Cup simula nang itatag ang kompetisyon noong 1991.

Halos maubos na ang P37 – P39 na kada kilo ng bigas sa mga pamilihan, lalo sa Metro Manila.

Ito, ayon sa grupong bantay bigas, ay bunsod ng halos linggu-linggong pagtaas ng presyo ng bigas simula pa noong Abril bunsod na rin ng hindi mapigilang pagmamahal ng farmgate price ng palay.

Sinabi ni Bantay Bigas Spokesperson Cathy Estavillo na P40 na ang presyo ng pinaka-murang kada kilo ng bigas sa mga pamilihan, gaya sa Quezon City.

Dahil anya rito ay tila malabo pang makamit ang pangako ni Pangulong “Bongbong” Marcos at pangarap ng bawat mahihirap na pinoy na mapababa ang presyo ng bigas sa P20 kada kilo.

Binigyang-diin ni Estavillo na kailangan munang mapigilan ang pagsirit ng presyo ng palay sa harap nang pambabarat ng mga trader sa mga magsasaka.

Batay sa datos ng Department of Agriculture, nasa P23 na ang kada kilo ng farmgate price ng palay mula sa dating P20 kaya’t posibleng magmahal pa ang bigas sa mga susunod na araw.

Dapat din anyang ibasura na ang rice liberalization law na sanhi ng pagbaha ng imported rice sa bansa kaya’t hanggang ngayon ay hindi pa rin nagmumura ang bigas.

Umabot na sa P2.00 ang itinaas ng presyo ng kada kilo ng bigas, partikular sa Metro Manila, sa mga nakalipas na araw.

Kinumpirma ni Agriculture Assistant Secretary Kristine Evangelista na mula sa dating P20.00  ay umakyat na sa P23.00 per kilo ang farmgate price ng palay kaya’t nagmahal na ang bigas.

Ito, ayon kay Asec. Evangelista, ay bunsod ng nagtaas na gastos sa produksyon ng palay.

Kabilang naman sa inilatag na mga solusyon ng D.A. ang pagpapakilala sa iba pang agricultural inputs upang matulungan ang mga magsasaka na mapababa ang production cost.

Samantala, nanganganib namang sumirit pa ang presyo ng palay sa mga susunod na araw hangga’t hindi bumababa ang gastos sa produksyon.

Pinanatili ng National Water resources board ang 52 cubic meter per second water allocation para sa dalawang water concessionaire sa Metro Manila upang maiwasan na ang mga water interruption.

Alinsunod ito sa hirit ng Metropolitan Waterworks and Sewerage System na palawigin ang 52 cms na alokasyon ng tubig hanggang katapusan ng Hunyo.

Ito’y upang mabigyan ang M.W.S.S. at mga water concessionaire ng sapat na panahon para ayusin ang kanilang mga pipe system at treatment facilities.

Umaasa si NWRB Executive Director Sevillo David na matutugunan na ng MWSS, maynilad at manila water ang mga issue sa supply ng tubig at matuldukan na ang mga interruption.

Kahapon sana ang deadline ng N.W.R.B. sa ipinatupad na 52 cms water allocation mula sa angat dam, na 90 % na nagsusupply ng tubig sa Metro Manila at mga karatig lugar.

Samantala, nasa 40 c.m.s. ang inilaang tubig para sa irigasyon na sapat para sa planting season.