Drew Nacino

Implementasyon ng P40 na umento sahod, tuloy na tuloy na ayon sa DOLE.

Tuloy na ang P40 na umento sahod sa mga manggagawa sa pribadong sektor sa metro manila simula Hulyo 16 sa kabila ng apela na isinampa ng mga labor group.

Ayon sa Department of Labor and Employment (DOLE), inaasahang ipatutupad ng mga employer ang panibagong minimum wage

Kabilang sa naghain ng apela ang Alliance of Nationalist and Genuine Labor Organization at Labor Alliance for National Development noong Hulyo 3.

Iginiit ng mga labor group na dapat maging basehan ng minimum wage ang family living wage na nagkakahalaga ng P1,161 at hindi ang poverty threshold

Nito lamang Hunyo 26 nang aprubahan ng Regional Tripartite Wages and Productivity Board ang dagdag sahod sa Metro Manila o itinaas sa P610 mula sa kasalukuyang P570 epektibo simula sa Lunes.

Ibinunyag ng Department of Environment and Natural Resources na may ilang ahensya ng gobyerno ang nagbabayad ng milyon-milyong pisong konsumo sa tubig dahil sa mga hindi pa nakikitang tagas sa mga tubo.

Ayon kay DENR Undersecretary Carlos David, nagkaroon sila ng pag-aaral kasama ang dalawang water concessionaire kaugnay sa konsumo sa tubig ng mga government agency.

Dito napag-alaman na napakalaki ng bill ng ilang ahensiya at hinihinalang may tagas sa tubo ng tubig subalit hindi ipinapaayos.

Mayroon anyang mga government agency na nagbabayad ng ₱10 , 000,000 – ₱17, 000,000 kada buwan sa kanilang water bill habang ang iba ay hanggang 1 million pesos kada buwan.

Inabisuhan naman ng DENR ang mga ahensya na may malaking bill na maglagay ng water meter sa bawat gusali upang malaman kung anong building ang may malakas na konsumo at higit sa lahat ay magtipid sa paggamit ng tubig.

Tiniyak ni House Speaker Martin Romualdez ang agarang pag-apruba sa panukala na makatutulong sa kampanya ng gobyerno laban sa smuggling lalo na sa mga produktong pang-agrikultura, tulad ng sibuyas.

Ang Anti-Agricultural Smuggling Act ay isa sa mga panukala na nais ni Pangulong Ferdinand Marcos Jr na agad maisabatas at napagkasunduan na ipaprayoridad sa nakaraang pulong ng Legislative-Executive Development Advisory Council.

Sa pulong ng Ledac noong Miyerkoles, napagkasunduan na gagawing prayoridad ng Kamara at senado ang pagpasa sa dalawampung panukala bago matapos ang taon.

Ayon kay Speaker Romualdez, ang pagsasabatas sa mga nasabing panukala ang magsasaayos sa mga mekanismo at magbibigay ng karagdagang mabigat na parusa laban sa mga sangkot sa smuggling ng agricultural products.

Una nang inatasan ni Pangulong Marcos ang D.O.J. at N.B.I.  Na tugisin ang mga smuggler ng sibuyas at iba pang agricultural products at sundan ang resulta ng imbestigasyong ginawa ng House Committee on Agriculture and Food.

Binalaan ng Commission on Elections ang mga kandidato laban sa maikukunsiderang pagbili ng anumang uri ng mga boto sa Barangay at Sangguniang Kabataan Elections.

Aminado si COMELEC Spokesman John Rex Laudiangco na hindi mapipigilan ang mga halal na opisyal sa pag-endorso at pagsuporta sa mga Barangay at S.K. Candidates.

Gayunman, binigyang-diin ni Laudiangco na dapat tiyaking walang nagagamit na public funds sa oras na suportahan ang isang partikular na kandidato.

Pinaalalahanan naman ng tagpagsalita ng poll body ang mga kandidato na ipinagbabawal ang premature campaigning bago ang October 30 elections at itinakda lamang sa 5 pesos per registered voter ang kanilang spending limit.

Hindi rin maaaring maupo sa pwesto ang mga mananalong kandidato hangga’t hindi nagsusumite ng Statement of Contribution and Expenditures.

Kahit humupa man ang inflation, hindi pa rin maawat ang pagtaas ng presyo ng ilang bilihin, lalo ng bigas.

Sa pag-iikot ng Metro Patrol sa ilang palengke sa Metro Manila, P1 .00 – P3.00  ang itinaas ng presyo ng kada kilo ng bigas.

Dahil dito, bihira na ring makabili ng P39.00 – P40.00 na bigas sa ilang pamilihan sa Valenzuela City habang nasa P41.00 – P 43.00 ang average price ng bigas sa Caloocan City.

Namemeligro namang magmahal pa ang bigas sa mga susunod na buwan sa gitna nang nagbabadyang epekto ng El Niño Phenomenon, partikular sa sektor ng agrikultura.

Gayunman, naniniwala si Samahang Industriya ng Agrikultura (SINAG) Executive Director Jayson Cainglet na sobra pa ang supply ng bigas, maging ng baboy, manok at iba pang basic commodities sa bansa hanggang sa katapusan ng taon.

Ito’y kahit tumigil ang ilang magsasaka na magtanim dulot ng El Niño.

Umapela na ang tulong ang Albay Provincial Government sa National Government bunsod ng nalalapit na pagkaubos ng kanilang budget para sa libu-libong residenteng apektado ng pag-aalburoto ng Bulkang Mayon.

Aminado si Albay Governor Edcel Greco Lagman na kakapusin na ang P32,000,000 calamity fund ng lalawigan upang suportahan ang evacuation efforts simula pa noong June 9.

Ibinabala ni Lagman na posibleng tumagal na lamang ng 15 – 12 araw ang pondo para sa pangangailangan ng mga bakwit.

Hanggang kahapon, mahigit 5,700 pamilya o nasa 20,000 katao ang nananatili sa 34  na evacuation sites.

Inalmahan ng Office of the Vice President ang pahayag ng ACT Teachers Party-List sa ulat na hindi dumaan sa tamang proseso ang pagbili nito ng mga gamit para sa mga binuksang Satellite Office.

Nanindigan ang OVP na walang iregularidad sa procurement ng Satellite Office Equipment na nagkakahalaga ng mahigit 668,000 pesos na validated at pasado mismo sa Commission On Audit.

Sapat na anila ang findings at rekomendasyon ng COA upang pasinungalingan ang ispekulasyon ni  ACT Teachers Partylist Rep. France Castro.

Una nang inihayag ni Congresswoman Castro ang pagkabahala nito sa umano’y minadaling procurement process.

Ikinakasa na ni ACT Teachers Partylist Rep. France Castro ang imbestigasyon sa mga isinagawang procurement ng Office of the Vice President sa ilalargang budget deliberations sa kamara.

Kaugnay ito sa P668,000 na gastos ng OVP para sa pagtatayo ng mga satellite office na sinimulan nang maupo sa pwesto si Vice President Sara Duterte-Carpio.

Aminado si Congresswoman Castro na labis silang nababahala sa umano’y minadaling procurement process

Hindi rin anya ito dapat ipagsawalang-bahala, lalo’t pera ng taumbayan ang pinag-uusapan.

Magugunitang nasilip ng Commission on Audit ang kabiguan ng OVP na tumalima sa procurement rules at processes sa pagbili nito sa mga property na nagkakahalaga ng P668,000 para sa satellite offices noong July 2022.

Nagsasagawa na ng case build up ang Department of Justice laban sa mga indibidwal at grupong sa sangkot sa pagpupuslit ng sibuyas at iba pang produktong pang-agrikultura.

Tiniyak ng DOJ Na sa oras na handa ang mga kaso ay maghahain sila ng mga reklamo laban sa mga sangkot sa smuggling.

Saklaw ng imbestigasyon ang mga paglabag sa Republic Act 10845 o Anti-Agricultural Smuggling Act of 2016 at iba pang batas.

Target sa RA 10845 ang illegal importation ng agricultural products, kabilang ang sibuyas at may katapat na mabigat na parusa.