Pinapurihan ni dating Foreign Affairs Secretary Albert del Rosario si dating Pangulong Benigno Aquino III sa pagtulak nito ng reklamo laban sa China kaugnay ng pinag-aagawang teritoryo sa West Philippine Sea.
Sa ginanap na forum ukol sa the West Philippine Sea sa UP Diliman, pinasalamatan ni del Rosario ang dating Pangulo sa paninindigan nitong ipaglaban ang karapatan ng Pilipinas batay sa mandato ng Saligang Batas.
Maliban dito, kinilala din ni del Rosario ang trabaho at dedikasyon ng ehekutibo, lehislatura at hudikatura para sa ipinaglalaban ng bansa.
Pinasalamatan din ni del Rosario ang international community kabilang ang Estados Unidos, Japan, Australia at mayorya ng ASEAN para sa pagsuporta ng mga ito at pagpanig aniya sa Rule of Law.
Bahagi ng pahayag ni former DFA Secretary Albert del Rosario
Del Rosario and Carpio
Dalawang bato naman sa West Philippine Sea ang ipapangalan kina dating Foreign Affairs Secretary Albert del Rosario at Senior Associate Justice Antonio Carpio.
Ayon kay Solicitor General Jose Calida, hahanapin niya ang dalawang pinakamalalaking isla o bato sa West Philippine Sea at bibinyagan itong Albert Rock bilang pagkilala kay del Rosario at Tony Rock para kay Carpio.
Sinabi Calida na simbolo ito ng mala-batong paninidigan nina del Rosario at Carpio nang ipaglaban nila ang karapatan ng Pilipinas sa West Philippine Sea.
Bahagi ng pahayag ni Solicitor General Jose Calida
By Ralph Obina | Len Aguirre