Isasailalim sa counseling ang anak na babae ni Police Senior Master Sergeant Jonel Nuezca —ang bumaril at pumatay sa nakasagutang mag-ina sa Paniqui, Tarlac.
Ayon kay Paniqui Municipal Police Station Chief Lt. Col. Noriel Rombaoa, nakikipag-ugnayan na sila sa Department of Social Welfare and Development (DSWD) hinggil dito.
Ani Rombaoa, awtomatikong nagsasagawa ang DSWD ng counseling sa mga batang nakakasaksi ng krimen o pagpatay.
Dagdag ni Rombaoa, bukod sa anak na babae ng suspek na pulis, isasailalim din sa counselling ang mga batang kaanak ng biktimang sina Sonia at Frank Anthony Gregorio.
Batay sa kumalat na video ng insidente, makikita ang anak ni Nuezca na kumukuha rin ng video habang nakikipagtalo ang kanyang ama sa mag-inang biktima.
