Nag-alok ng limampung libong pisong pabuya si Parang, Maguindanao Mayor Char Ibay para sa ikaradakip ng salarin sa pambobomba ng isang bus sa lalawigan kamakailan na ikinasugat ng limang pasahero.
Base sa imbestigasyon ng mga otoridad, patungo na sana sa Dipolog City ang mga sakay ng bus mula sa General Santos City at nag-stop over sa national highway nang maganap ang pagsabog kung saan, nawasak ang likurang bahagi ng naturang sasakyan.
Ayon kay Ibay, agad niyang ibibigay anomang oras ang reward money sa taong makakakilala at makapagtuturo sa pinagtataguan ng salarin na nahagip ng closed-circuit television o cctv camera habang tumatakas mula sa pinangyarihang insidente.
Sa ngayon, wala pang umaako sa insidente at blangko parin ang PNP sa motibo ng salarin.
Umaasa naman si Ibay na malaki ang maitutulong ng reward money para malaman ang pagkakakilanlan sa suspek. —sa panulat ni Angelica Doctolero
