Nanawagan ang Armed Forces of the Philippines (AFP) sa publiko na huwag nang ikalat pa ang lumutang na video kung saan makikita ang insidente ng hazing sa loob ng Philippine Militar Academy (PMA).
Ayon kay AFP spokesman Brig. Gen. Edgard Arevalo, makadadagdag lang ito ng sakit ng kalooban ng pamilya ng nasawing si PMA 4th class cadet Darwin Dormitorio.
Ani Arevalo sana ay hayaan ng publiko na maghilom ang pamilya Dormitorio at ang PMA sa nangyaring insidente.
Ang naturang video rin umano ay magbibigay lamang ng karagdagang dungis sa imahe ng PMA.
Gayunman tiniyak ni Arevalo na hindi nila kukunsintihin ang mga nasabing kaso ng hazing.
