Iginigiit ni Ombudsman Jesus Crispin Remulla na hindi nila gagamitin ang affidavit ng surprise witness na si Orly Guteza kung hindi siya personal na haharap sa kanilang opisina.
Ayon kay Ombudsman Remulla, kahit na nanumpa si Guteza sa Senado, wala pa rin halaga ang pahayag nito para sa isasagawa nilang preliminary investigation.
Magugunitang si Guteza ang testigong humarap sa Senate Blue Ribbon Committee hearing na nagsabing nagdala ng maleta-maleta ng pera kina Leyte Rep. at dating House Speaker Martin Romualdez at resigned Ako Bicol Partylist Representative Zaldy Co.
Pero, isiniwalat naman ni Senate President Pro-Tempore at committee chairman Panfilo Lacson na napag-alaman ng Manila Regional Trial Court na pineke lamang ang pirma ng abogadong sinasabing nagnotaryo sa affidavit ng testigo.
Samantala, titingnan din ng Office of the Ombudsman ang iba pang indibidwal bukod kay Guteza, para makakalap ng ebidensya laban sa mga nasasangkot sa maanomalyang flood control scandal.
—Sa panulat ni Mark Terrence Molave
