Namemeligrong masuspinde o makansela ng LTFRB o Land Transportation Franchising and Regulatory Board ang accreditation ng mga transport network company na Uber at Grab.
Ito’y dahil sa hindi umano makatwirang pagtataas ng pamasahe o ang tinatawag na surge pricing ngayong holiday season.
Sa isang press statement, iginiit ng LTFRB na nakatanggap sila ng mga reklamo sa price surge ng Uber at Grab na naglalaro umano mula sa 2,000 hanggang 28,000 piso.
Babala ng LTFRB, huwag samantalahin ng Uber at Grab ang bakasyon para itaaas ang kanilang pasahe.
Sinasabing hindi rin kinonsulta ng Uber at Grab ang LTFRB patungkol sa bigla-biglang pagtataas sa pasahe na ibinabase umano sa kondisyon ng trapik o sa rutang dinadaanan ng pasahero.
Hinikayat naman ng LTFRB ang mga pasahero na kung may reklamo sa Uber at Grab, maaari itong isumbong sa hotline 1342 o kaya’y mag-text sa 0917-550-1342 at 0998-550-1342.
Samantala, tatalima naman ang pamunuan ng mga transport network companies na Uber at Grab sa kautusan ng LTFRB.
Kaugnay ito sa inirereklamong biglaang pagtataas sa singil ng mga nasabing transport provider ngayong holiday season.
Gayunman, inihayag ng Grab na bagama’t tatalima sila sa kautusan ng LTFRB, boluntaryo na silang naglagay ng cap sa kanilang service rates upang masiguro ang magandang serbisyo.
Apela lang ng Grab sa publiko na i-double check ang pick up at drop off points bago kumpirmahin ang booking upang maiwasan ang kalituhan.
Patuloy namang nakikipag-ugnayan ang Uber sa LTFRB upang makahanap ng paraan para maiwasan ang price surge dahil sa tumataaas na demand para sa ridesharing options.
By Jaymark Dagala
