Patay ang isang abogado habang sugatan naman ang asawa nito matapos pagbabarilin ng hindi pa nakikilalang salarin sa Guihulngan City, Negros Oriental.
Kinilala ang nasawing abogado na si Anthony Trinidad at ang kanyang asawa na si Novie Marie.
Batay sa inisyal na imbestigasyon ng pulisya, sakay ang mag-asawa ng kanilang sports utility van nang lapitan ng mga nakamotorsiklong salarin at pagbabarilin.
Dahil dito nawalan ng kontrol sa sasakyan ang biktima at bumangga sa pedicab na pagmamay-ari ni Guillermo Magdasal.
Ayon kay Guihulngan City Police Chief Lieutenant Colonel Bonifacio Tecson, kabilang si Trinidad sa target ng Kagubak o Kawsa Guihulnganon Batok Komunista at una na ring humingi ng dagdag seguridad sa pulisya.
