Patay ang anim na indibidwal kabilang na ang isang anim na buwang gulang na sanggol sa karambola ng tatlong sasakyan sa Isabela.
Base sa imbestigasyon, magkasunod na binabaybay ng isang tricycle at motorsiklo ang National Highway sa Barangay Balug Tumauini, Isabela nang bigla silang araruhin ng kasalubong na trailer truck.
Ayon sa mga otoridad, galing sa wedding event ang mga biktima nang maganap ang aksidente kung saan, aminado ang driver ng truck na siya ay nakainom.
Nabatid na umagaw ng linya ang naturang truck at dumeretso sa isang maisan kung saan, halos mawasak nito ang tricycle at motorsiklo sa nangyaring banggaan.
Agad na nasawi ang driver ng motorsiklo na kinilalang si Kuldip Singh, 38 years old maging ang mga sakay ng tricycle, kabilang na ang driver na si Arnel Menor, 37 years old; misis niyang si Diana Rose, 36 years old; ang anim na buwang gulang nilang anak; Ernesto Caronan, 71 years old habang naisugod pa sa ospital ang kaniyang misis na si Elma, 64 years old pero pumanaw din kinalaunan.
Samantala, hindi naman nasugatan ang pahinante ng trailer truck pero iniinda nito ang nararamdaman sakit sa kaniyang dibdib matapos tumama umano sa manibela.
Hawak na ngayon ng Tumauini Police Station ang driver ng trailer truck na mahaharap sa reklamong Reckless Imprudence Resulting in Multiple Homicide at Damage to Properties.
