Handa na ang National Grid Corporation of the Philippines (NGCP) sa posibleng epekto ng bagyong Tino sa mga pasilidad at operasyon ng transmission lines ng kuryente sa bansa.
Ayon sa NGCP, nagsagawa na sila ng mga kinakailangang hakbang upang mapababa ang epekto ng bagyo, kabilang ang:
- Pagsiguro sa maayos na kondisyon ng mga communication equipment,
- Paghahanda ng mga materyales at suplay na kakailanganin para sa agarang pagkukumpuni ng anumang masirang pasilidad, at
- Pagpo-posisyon ng mga linemen at crew sa mga estratehikong lugar para sa mabilis na restoration work kung kinakailangan.
Batay sa Integrated Disaster Action Plan (IDAP) ng NGCP, nakapaloob dito ang mga standard na hakbang at protocols upang matiyak ang kahandaan ng lahat ng transmission facilities na maaaring maapektuhan ng malalakas na bagyo.
Tiniyak ng NGCP na patuloy itong nakabantay at handang tumugon upang mapanatiling tuloy-tuloy ang suplay ng kuryente sa gitna ng pagdaan ng bagyong Tino.
