Umapela ang grupo ng mga magsasaka na ibalik sa orihinal na antas ang taripa sa inaangkat na bigas bilang tugon sa patuloy na pagbaba ng presyo ng palay sa bansa.
Ayon kay Samahang Industriya ng Agrikultura executive director Jayson Cainglet, dapat ibalik sa 35 percent ang taripa sa bigas para sa mga bansa sa ASEAN at 50% para sa mga non-ASEAN countries.
Hindi naging epektibo anya ang ipinatupad na import ban at Executive Order No. 100 sa pagpapataas ng farmgate price ng palay sa makatarungang presyo na ₱18 kada kilo.
Ipinunto ng grupo na ang ugat ng krisis ay ang desisyon ng economic team na ibaba sa 15% ang rice import tariff, na mas lalong nagpasigla sa pag-angkat ng murang bigas.
Dahil dito, patuloy na nalulugi ang mga lokal na magsasaka habang pinipili ng mga negosyante at millers ang imported rice na mas mura sa merkado.
Sa kasalukuyan, sakop lamang ng EO No. 100 ang pagsasagawa ng pamahalaan ng pagbili ng palay. Subalit, dahil limitado ang pondo, 2 hanggang 4 porsiyento lamang ng kabuuang ani ng bansa ang kayang bilhin ng gobyerno.
Sa ngayon, nananatiling 95% ng kabuuang produksyon ng palay ang kontrolado ng mga pribadong negosyante, trader-importers, at rice millers, na madalas nagtatakda ng presyo batay sa import parity at market speculation imbes na sa aktuwal na gastos sa produksyon.
