Handa na ang Philippine National Police (PNP) sa ipatupad ang granular lockdown sa National Capital Region (NCR) simula sa Miyerkules, Setyembre 8.
Ito’y ayon kay PNP Chief P/Gen. Guillermo Eleazar kasunod ng anunsyo ni Interior and Local Government Sec. Eduardo Año bilang paghahanda sa unti-unting pagbubukas muli ng ekonomiya sa gitna ng pandemiya.
Kasunod nito, sinabi ni Eleazar na kaniya nang inatasan ang mga police commander sa pamamagitan ni National Capital Region Police Office Chief P/Mgen. Vicente Danao Jr. para gawin ang nararapat na paghahanda.
Sa kasalukuyan ani Eleazar ay mayruon nang 51 barangay sa Metro Manila ang nakapailalim na sa granular lockdown.
Inaantay pa ang magiging anunsyo ni Pangulong Rodrigo Duterte sa bagong quarantine classifications habang nananatiling nasa Modified Enhanced Community Quarantine (MECQ) ang Metro Manila hanggang bukas, Setyembre 7.
