Lima pang mahistrado ng Korte Suprema ang umano’y handa nang tumestigo sa impeachment proceedings laban kay Supreme Court Chief Justice Maria Lourdes Sereno.
Dahil dito pumapalo na sa siyam na kasalukuyang mahistrado ang inaasahang haharap sa witness stand at kung tetestigo lahat ang mga ito mahigit na ito sa mayorya ng mga mahistrado sa Korte Suprema na nasa walo lamang.
Nabatid na inimbitahan ng House Justice Committee sina Associate Justices Diosdado Peralta, Lucas Bersamin, Mariano del Castillo Samuel Martires at Andres Reyes, Jr. para sagutin ang mga usaping nakapaloob sa reklamong impeachment ni Atty. Larry Gadon.
Una nang naimbitahan si Senior Associate Justice Antonio Carpio para sa January 18 hearing samantalang sumalang na sa witness stand sina Associate Justices Teresita Leonardo de Castro, Francis Jardeleza at Noel Tijam gayundin si retired Associate Justice Arturo Brion.
Gadon ayaw patulan ng ‘Magnificent 7’
Samantala, deadma si Albay Representative Edcel Lagman sa patutsada ni Atty. Larry Gadon na magbitiw na siya sa kaniyang pwesto.
Ito’y matapos siyang akusahan ni Gadon na nag-aabogado kay Chief Justice Maria Lourdes Sereno na aniya’y labag sa tungkulin nito bilang kinatawan.
Ayaw din patulan ng mga kasamahan ni Lagman sa Magnificent 7 sa Kamara si Gadon.
Ayon kay Caloocan Representtaive Edgar Erice hindi dapat pinag-aaksayahan ng panahon ang aniya’y “nimcompoop”.
Senigundahan naman ito ni Northern Samar Representative Raul Daza na tinawag naman niyang “hogwash” o walang kwenta ang mga pahayag ni Gadon.
By Jennelyn Valencia