Patay ang tatlo (3) katao habang sugatan ang apat (4) na iba pa makaraang bumaliktad ang isang bus sa barangay Lutiman sa Alicia, Zamboanga Sibugay.
Kabilang sa mga nasawi sina Gertrudes Buhat Baya, 73; Rina Ahay Mualam, 14; at Salma Mualam, 35.
Agad na dinala sa Lanchita Hospital ang mga sugatan.
Sinasabing kasama ang tatlo (3) sa tinatayang 45 pasahero na lulan ng Lizamay Express bus nang mangyari ang aksidente.
Ayon sa residenteng si Harry Rafols Remolano, nawalan ng preno ang bus dahilan upang mapaatras ito at sumirko.
Nasa kustodiya na ng pulisya ang driver habang nagpapatuloy ang imbestigasyon sa insidente.
