Umabot na sa 206 ang bilang ng frontliners na tinamaan ng COVID-19 sa Tuguegarao City.
Ayon kay Mayor Jefferson Soriano, sa nasabing bilang, 192 ang healthcare workers, 13 ang tauhan ng Philippine National Police (PNP) at isang mula sa Bureau of Fire Protection (BFP).
Aniya, dahil dito ay hindi agad makapaglabas ng resulta ng swab test ang mga ospital at molecular laboratory dahil sa kakulangan ng manpower.
Bukod dito ay nahihirapan na rin aniya silang pamahalaan ang kanilang walong malalaking isolation units.
Sa pinakahuling datos mula sa Tuguegarao City Information Office, nakapagtala ang lungsod ng 1,324 aktibong kaso ng COVID-19 at pumalo naman sa 10,429 ang kabuuang bilang ng kumpirmadong kaso ng virus. —sa panulat ni Hya Ludivico
