Tiwala si Senador Panfilo Lacson na kayang idepensa ng dating Pangulong Noynoy Aquino ang sarili nito sa kahaharaping kaso kaugnay ng Mamasapano Incident.
Sinabi ni Lacson na ang maipapayo niya lamang sa dating Pangulo ay kumuha ng mahusay na abogado.
Bilang kaibigan at dating kasama sa Senado inihayag ni Lacson na nakikiisa siya sa mga nananalangin na makayanan ng dating Pangulo ang pressure at minsan na aniya niya itong napagdaanan kayat batid niya kung ano ang pakiramdam ng humarap sa paglilitis sa Korte.
By: Judith Larino / Cely Bueno
Inamin ni House Speaker Pantaleon Alvarez na maaaring hindi na kailangan pang ipasa ng Kongrerso ang Tax Reform Package.
Ito ayon kay Alvarez ay kapag nakolekta ng Bureau of Internal Revenue ang Bilyong Pisong Tax liabilities ng malalaking kumpanya na pagma may ari ng oligarchs.
Ipinabatid ni Alvarez na pina iimbestigahan na niya sa House Committees on Ways and Means at Good Government ang mga malalaking kumpanya na may utang sa buwis.
Kabilang na aniya dito ang pagbawas umano ng BIR sa tax liabilities ng Del Monte Philippines Incorporated sa 65.4 Million Pesos sa kabila ng assessment na umaabot sa 29 Billion Pesos na tax deficiency liabilities.
Magugunitang nakapaloob sa ilalim ng tax reform package ng Duterte Administration ang dagdag na anim na Piso kada litro ng mga produktong petrolyo gayundin ang pagpataw ng 10 Pisong Excise Tax kada litro ng sugar sweetened beverages.
By: Judith Larino
Naghahanda na ang DTI o Department of Trade and Industry ng livelihood funding program para matulungang makapagsimula ng negosyo ang mga residenteng apektado ng Marawi Crisis.
Ayon kay Trade Secretary Ramon Lopez tig 5,000 Piso ang inilalaan nila sa kada apektadong residente na nais mag negosyo tulad ng malapit na kainan o carinderia.
Subalit ipinabatid ni Lopez na uubrang mag avail sa ilalim ng kanilang P3 o Pondo para sa Pagbabago at Pag Asenso ang mga residenteng nais makakuha ng mas malaking kapital para makapagbukas ng negosyo.
Sinabi pa ni Lopez na tiwala silang makakahanap ng lugar sa Marawi City para sa mga pamilihan at maitayo muli ang public market dito.
By: Judith Larino
Pormal nang nanumpa ang bagong talagang Associate Justice ng Korte Suprema.
Si Associate Justice Andres Reyes ay nanumpa kay Supreme Court Chief Justice Maria Lourdes Sereno kasunod ang isang maikling seremonya.
Dumalo sa panunumpa ni Reyes ang ilang mahistrado ng high tribunal na sina Associate Justice Estela Perlas-Bernabe, Jose Mendoza, Antonio Carpio, Teresita De Castro, Lucas Bersamin at retired Justice Bienvenido Reyes.
- Juidth Estrada – Larino | Story from Bert Mozo
Naka-duty sa kaniyang trabaho bilang security guard sa isang bangko ang padre de pamilya ng lima kataong minasaker sa San Jose Del Monte, Bulacan.
Ito ayon kay Chief Superintendent Fitz Macariola, hepe ng San Jose Del Monte Police, ang nakasaad sa isinumiteng affidavit ng apat sa mga kasamahan sa trabaho ni Dexter Carlos para patunayang naka-duty ito noong Hunyo 27 kung kailan naganap ang pagpatay sa kaniyang mag-iina at biyenan.
Sinabi ni Macariola na hawak na nila ang mga affidavit at hinihintay na lamang nila ang kopya ng CCTV.
Binigyang diin ni Macariola na si Carlos ay hindi isang ordinaryong security guard kundi isang nerve center officer na may hawak ng komunikasyon sa lahat ng sangay ng naturang bangko sa buong bansa.
Una nang inihayag ng PNP o Philippine National Police na isasama sa imbestigasyon ng krimen si Carlos at posibleng isalang pa ito sa lie detector test.
- Juidth Estrada – Larino
I-aapela ng dating Pangulong Noynoy Aquino ang kautusan ng Ombudsman na kasuhan siya ng criminal kaugnay sa Mamasapano incident.
Ayon kay Atty. Abigail Valte, pinag-aaralan na ng dating Pangulo kasama ang kaniyang legal team ang nasabing kautusan ng Ombudsman matapos itong matanggap.
Sinabi ni Valte na lumalabas sa paunang review sa desisyon ng Ombudsman na hindi nakunsider ang ilang facts sa insidente dahil sa maling conclusions.
Lilinawin ito aniya ng dating Pangulo sa ihahaing motion for reconsideration sa usapin.
- Juidth Estrada – Larino
May nakalaan ng standby fund na limang bilyong piso (P5-B) para sa rehabilitasyon ng Marawi City.
Ayon kay Budget Secretary Benjamin Diokno, ang pondo ay mula sa contingent fund ni Pangulong Rodrigo Duterte at iba pang departamento tulad ng Department of Social Welfare and Development (DSWD), Department of Health (DOH), Department of Education (DepEd) at iba pa.
Idinagdag pa ni Diokno na mayroon na ring nag-alok ng tulong mula sa ibang bansa.
Aniya maglalaan ang pamahalaan sa 2018 ng sampung bilyong pisong (P10-B) pondo sa Bangon Marawi rehabilitation.
Ngunit paliwanag ni Diokno, hindi magiging madali ang rehabilitasyon sa Marawi City dahil kailangang dumaan sa proseso lahat ng aksyon ng gobyerno.
Kabilang na rito ang pagpa – plano, budgeting, implementasyon at pag-account sa ginamit na pondo ng taong bayan.
- Arianne Palma | Story from Aileen Taliping
Nasa final stage na ang rekomendasyon kung palalawigin pa o hindi na ang ipinaiiral na martial law sa Mindanao.
Ayon kay Brig. Gen. Restituto Padilla, spokesman ng AFP o Armed Forces of the Philippines, isinasapinal na nila kasama ang Philippine National Police (PNP) at Department of Defense o DND ang kanilang rekomendasyon at umaasang matatapos nila ito bago ang nakatakdang deadline.
Ngunit, aniya, malabong mailabas ang rekomendasyon bago ang ikalawang State of the Nation Address (SONA) ni Pangulong Rodrigo Duterte.
Ang martial law sa Mindanao ay inaasahang matatapos sa loob ng animnapung araw alinsunod sa nakasaad sa saligang batas.
- Arianne Palma | Story from Aileen Taliping
Inatasan ng DOH o Department of Health ang mga ospital na i-report sa kanila ang real time count ng mga gamot upang maagapan ang mga malapit nang mag expire.
Ito’y ayon kay Health Assistant Secretary Eric Tayag na batay sa report ng Commission on Audit (COA) nasa mahigit tatlong daang milyong pisong (P300-M) halaga ng mga gamot ang na-expired lang at hindi napakinabangan noong 2016.
Paliwanag ni Tayag, isa sa mga dahilan kung bakit mayroong mga gamot na hindi napakikinabangan ay dahil mayroon talagang uri ng mga gamot ang kailangang nakaimbak lamang para magamit sa oras ng pangangailangan.
Tiniyak ni Tayag na gumagawa na sila ng paraan para hindi na maulit pa ang ganito karaming naaksayang mga gamot.
- Arianne Palma | Story from Aya Yupangco