Wala nang atrasan ang isasagawang kilos-protesta ng iba’t ibang transport group upang tutulan ang ikinakasang modernisasyon ng pamahalaan sa sektor ng transportasyon partikular na ang jeepney phaseout.
Ayon kay George San Mateo, Pangulong PISTON o Pinagkaisang Samahan ng Transport Operators Nationwide, walang makikinabang sa plano ng administrasyong Duterte kundi ang pribadong sektor o ang mayayamang korporasyon.
Tila kinopya lamang aniya ng kasalukuyang administrasyon ang mga plano ng mga nagdaang pamunuan ng Department of Transportation o DOTr tulad nila dating Sec. Mar Roxas at Jun Abaya na kontra masa ngunit nagawa naman nilang pigilan.
Mula sa Eliptical Road sa Quezon City, magmamartsa ang PISTON, No to Jeepney Phaseout Coalition at Save Our Jeepneys Network patungong Mendiola upang doon magsagawa ng programa ganap na alas-7:00 ngayong umaga.
Class suspensions
Suspendido ngayong araw na ito ang klase sa ilang bayan sa Bulacan at maynila.
Dahil ito sa nakatakdang strike ng transport groups.
Kabilang sa suspendido ang klase sa lahat ng antas sa Malolos City, San Miguel, Sta. Maria at San Jose del Monte.
Wala namang pasok sa senior high school at college level sa Baliuag.
Sa Maynila, suspendido ang klase sa senior high level ng FEU o Far Eastern University.
Kanselado rin ang klase mula Kinder hanggang Grade 12 level ng University of the East Manila at Caloocan.
Nitong Sabado ay nagdeklara muli ng transport caravan ang ib’at ibang grupo bilang protesta pa rin sa nakaambang phaseout ng mga lumang pampasaherong jeep.
Kasabay din ng caravan sa Maynila ang mga pagkilos sa Zambales, Bataan at Pampanga.
By Jaymark Dagala | ulat ni Gilbert Perdez
Posibleng magpatong-patong pa ang mga ihahaing impeachment complaint laban kay Vice President Leni Robredo.
Ito ang ibinabala ni PBA Partylist Representative Jericho Nograles makaraang ibunyag nito na may isa pang reklamo ang posibleng ihain sa Agosto.
Nakuha umano ng mambabatas ang impormasyon mula sa ilang mapagkakatiwalaang sources at sinabing kilala niya ang nasa likod niyon ngunit tumanggi na siyang magdetalye pa.
Bagama’t nagpahiwatig ang mambabatas na posibleng ipasa sa kaniya ang reklamo para iendorso, inamin nitong hindi niya batid kung ano ang motibo sa pagsasampa ng reklamo sa laban sa Bise Presidente.
Magugunitang nagbanta na si House Speaker Pantaleon Alvarez hinggil sa impeachment laban kina VP Leni at Supreme Court Chief Justice Maria Lourdes Sereno sa muling pagbubukas ng sesyon ng Kongreso sa Hulyo 24.
By Jaymark Dagala
Nakatakdang ilarga ng mga kumpaniya ng langis ang tapyas presyo sa kanilang mga produktong petrolyo bukas, Hulyo 18.
Ito’y ayon kay Undersecretary Felix Fuentebella, Spokesman ng Department of Energy o DOE ay bunsod ng pagbaba ng presyo ng langis sa pandaigdigang pamilihan.
Batay sa pagtaya ng ahensya, posibleng bumaba ng beinte singko sentimos (P0.25) ang kada litro ng gasolina habang maglalaro naman sa animnapu (P0.60) hanggang pitumpung sentimos (P0.70) naman ang ibaba sa presyo ng diesel at kerosene sa kada litro nito.
Ito na ang unang rollback sa presyo ng mga produktong petrolyo ngayong buwan matapos ang dalawang sunod na linggong pagtataas sa presyo ng langis.
Sa kasalukuyan ayon sa DOE, pumapalo na sa P27.35 hanggang P31.46 ang presyo ng diesel habang naglalaro naman sa P38.95 hanggang P51.01 ang presyo ng gasolina sa kada litro.
By Jaymark Dagala
Kinumpirma ng aktres na si Nikki Gil ang kanyang pagdadalantao.
Kasabay nito ang pagpapakita ni Nikki ng kanyang baby bump sa kauna-unahang pagkakataon.
Wala namang ibang detalye na ibinigay si Nikki kaugnay sa pagbubuntis niya sa kanilang unang anak ng asawang si BJ Albert.
Ang Albert couple ay ikinasal noong 2015.
By Judith Larino
Photo: nikkigil / Instagram
Dalawampu’t pito (27) ang kumpirmadong patay habang limampu’t apat (54) ang nawawala sa paglubog ng isang bangka sa ilog ng Kasai sa bansang Congo.
Ayon sa report, sinasabing overcrowding gayundin ang pagiging lasing ng mga driver ng bangka ang naging sanhi ng paglubog nito.
Napag-alaman din na mga madre ang dalawa sa mga napaulat na nasawi habang mga estudyante naman ang karamihan sa mga sakay ng lumubog na bangka.
Kadalasang bumabaliktad ang mga bangka sa nasabing bansa bunsod ng overloading gayundin ang kakulangan sa safety measures.
By Jaymark Dagala
Pinayuhan ng Malacanang ang mga taga-Marawi City mas makabubuting hintaying matapos ang krisis bago bumalik sa kanilang lugar.
Kasunod ito ng pinaplano ng ilang grupo na “Occupy Marawi” kung saan babalik ang mga ito sa Marawi City sa mismong State of the Nation Address ni Pangulong Rodrigo Duterte.
Sinabi ni Presidential Spokesman Ernesto Abella, naiiintindihan ng palasyo ang sentimyento ng mga residente ng Marawi City subalit dapat isaalang alang ang kaligtasan ng mga ito.
Wala aniyang katiyakan na ligtas na ang ibang lugar ng lungsod dahiil may mga insidente pa ng tinatamaan ng ligaw na bala at nagpapatuloy pa ang clearing operations ng mga sundalo sa posibleng booby traps na iniwan ng Maute-ISIS Terror Group.
By: Aileen Taliping
Sinalakay at sinunog ng mga hinihinalang miyembro ng NPA o New People’s Army ang ilang mga construction equipment ng isang kumpanya sa Quezon.
Ayon kay 201st Brigade Commander Lenard Agustin, aabot sa 10 mga miyembro ng NPA ang lumusob at sinunog ang isang payloader, tatlong elf trucks at isang mixer ng RTY Construction Company.
Pinipilit umano ng mga rebelde ang may-ari ng nasabing kumpanya na magbayad ng protection money.
Kasalukuyang tinutugis na ang mga naturang rebelde.
By: Krista De Dios
