Pitumpu (70) hanggang walumpung (80) porsyento nang naka-kondisyon si fighting Senator Manny Pacquiao para sa kanilang paghaharap ni Jeff Horn sa Hulyo 2.
Ayon kay Pacquiao, maliban sa jogging ay magaan pa ang kanyang training ngayong linggo at kanilang sisimulan ang heavy training sa mga susunod na linggo, habang papalapit ang laban.
Tiyak aniyang maabot niya ang 100 porsyento bago sila lumipad patungo sa Australia.
By Katrina Valle
Nanganganib na matulad sa Finland ang Pilipinas kung hindi ipaglalaban ng Duterte administration ang Panatag o Scarborough Shoal laban sa China.
Ayon kay Supreme Court Associate Justice Antonio Carpio, mararanasan ng Pilipinas ang “Finlandization” o isang bansang malaya subalit nakayukod at sumusunod lamang sa foreign policy ng ibang bansa.
Ang salitang Finlandization ay nabuo noong panahong sinakop ng Russia ang Finland na bagamat binigyan nila ng kalayaan ay nananatiling taga-sunod naman sa kanilang mga panlabas na panuntunan o foreign policy.
Binigyang diin ni Carpio na malaki ang posibilidad na magtayo ng mga pasilidad ang China sa Panatag Shoal kayat mahalagang igiit ngayon ng Duterte administration ang napanalunan ng bansa sa Permanent Court of Arbitration sa The Hague noong nakaraang taon.
Nagbabala si Carpio na hindi na mababawi pa uli ng Pilipinas ang Panatag Shoal mula sa China sa sandaling matayuan nila ito ng mga istraktura.
Lalabas anya na bagamat isang malayang bansa ang Pilipinas, magiging taga-sunod naman ito sa foreign policy ng China.
By Len Aguirre
Pinigilan ng Sandiganbayan na makalabas ng bansa si Chairman Nur Misuari ng MNLF o Moro National Liberation Front.
Nailabas na ng Sandiganbayan 3rd Division ang hold departure order o HDO laban kay Misuari at mga kapwa akusado sa tatlong (3) kaso ng katiwalian at malversation thru falsification of public documents.
Nangangahulugan ito na kailangang humingi ng permiso sina Misuari sa korte bago makalabas ng bansa.
Kapwa akusado ni Misuari sa kaso sina dating DepEd ARMM Executives Director Leovigilda Cinches, Supply Officer Sittie Aisa Usman, Accountant Alladin Usi, Chief Accountant Pangalian Maniri at COA Auditor Nader Macagaan.
Nagsabwatan di umano ang mga akusado para makuha ang isandaan at labin limang (115) milyong pisong pondo ng DepEd ARMM sa pamamagitan ng pamemeke ng mga vouchers purchase orders at iba pang dokumento upang palabasing bumili sila ng textbooks.
By Len Aguirre | with report from Jill Resontoc (Patrol 7)
Iginiit ni Senador Sherwin Gatchalian ang pagrepaso sa patakaran ng pamahalaan ukol sa sugal o gaming.
Ayon kay Gatchalian, dapat maging wake up call sa pamahalaan ang nangyaring pag-atake ng isang sinasabing lulong sa sugal.
Aniya, isang uri ng sakit ang pagkalulong sa sugal na maihahalintulad sa addiction sa alak at sigarilyo.
Sinabi pa ni Gatchalian na sa ibang bansa ay regulated ang sugal para hindi makasira sa kapakanan ng mga komunidad.
By Krista de Dios / with report from Cely Bueno (Patrol 19)
Posibleng makansela o masuspendi ang lisensya ng security provider ng Resorts World Manila na NC Lanting.
Ito ay matapos masilip ng PNP-SOSIA o Philippine National Police-Supervisory Office for Security and Investigation Agencies na may kakulangan sa ipinatupad na seguridad ng NC Lanting dahilan kaya nakalusot ang gunman na si Jessie Carlos sa nasabing casino hotel.
Ayon kay Senior Superintendent Ildebrandy Usana, Assistant Chief ng PNP-SOSIA, posibleng mailabas na bukas ang resulta ng kanilang isinagawang imbestigasyon.
“Not later than tomorrow mailalabas na po namin yung result nung investigation that we conducted doon po sa pangyayari involving the NC Lanting, although from our end meron kaming responsibility which is more on the administrative side, yung criminal aspect is now being handled by the local police at ongoing rin ang investigation, sa administrative this may also result in either suspension or cancellation po ng license ng security agency and that will be provided by SOSIA po.” Ani Usana
Una nang sinabi ni Usana na itinuturing nilang paglabag sa panuntuan ng SOSIA ang suot na civilian uniform ng lady guard na sumita sa gunman at bagaman kahilingan ito ng Resorts World ay hindi dapat sinunod ng NC Lanting.
“Noong nag-request ang security agency dineny po yan ng SOSIA kasi ang requirement nga po dapat naka-security guard uniform, and at that time it happened hindi naka-security guard uniform kasi kapag naka-security guard uniform ka it is expected nma ikaw ay armado rin.” Pahayag ni Usana
By Krista de Dios | Ratsada Balita (Interview)
*Photo Credit: Jonathan Andal (Patrol 31)
Tila ipinahiwatig ni make-up transformation king at Dabarkads Paolo Ballesteros ang tunay na estado ng kanyang love life sa Juan for All, All for One segment ng noon time show na Eat Bulaga.
Sa nasabing segment habang tinatanong tungkol sa love life nito ang kanilang sugod bahay winner ay biglang ibinato ni Joey de Leon ang tanong kay Paolo kung may love life ito.
Agad namang sumagot si Paolo ng “Wala Na”.
Nang pinaulit naman ni Allan K. kay Paolo ang sinabi nito ay sumagot na lamang ang make-up transformation king ng cannot repeat. Be alert.
Nagkaroon pa ng pahabol si Bossing Vic Sotto ng sabihin nito ang “thank you for memories na lang”.
Unang lumabas ang isyung hiwalay na si Paolo at ang kanyang rumored boyfriend ng mag-post ito ng picture ng magkahawak na kamay na may magkaparehong tattoos at may caption na “that’s it pancit.
Sinundan pa ito ng Instagram post ng rumored boyfriend ni Paolo ng kanilang larawan na may caption na thanks for the memories.
Ito’y sa kabila nang walang opisyal na kumpirmasyon si Paolo sa totoong estado ng relasyon nilang dalawa.
By Krista de Dios
Photo: Screengrab from pochoy_29 / Instagram
Tuloy ang biyahe ng PAL o Philippine Airlines patungong Qatar.
Sa kabila ito ng diplomatic row na namamagitan sa Qatar at iba pang bansa sa Gitnang Silangan.
Sinabi ni PAL Spokesperson Cielo Villaluna na tuloy ang apat na beses na biyahe nila kada linggo patungong Qatar.
Maghihintay na lamang aniya sila ng abiso mula sa Department of Foreign Affairs o DFA kaugnay sa sitwasyon sa nasabing bansa.
Ayon pa kay Villaluna, wala nang idinedeklarang air space restriction para sa mga biyahe mula Pilipinas patungong Doha.
Unang nag abiso ang Cebu Pacific na hanggang July 1 naman ang biyahe nila patungong Doha.
By Judith Larino
Pitumpu’t syam (79) na milyong pisong cash at tseke ang narekober ng militar sa isang bahay sa Marawi City.
Nagsasagawa ng clearing operations ang militar, malapit sa Mapandi Bridge sa Marawi matapos nila itong mabawi sa kamay ng Maute Group nang madiskubre ang perang inabandona ng mga bandido.
Mahigit sa limampu’t dalawang (52) milyong piso ang cash samantalang may kasama itong dalawampu’t pitong (27) milyong pisong halaga ng mga tseke.
Ang pera ay nakuha sa isang abandonadong bahay na nagsilbi ring lagayan ng mga machine gun na ginagamit ng Maute Group.
Ang pera at mga tseke ay hawak na ngayon ng Joint Task Force Marawi.
Matatandaang patuloy ang krisis sa Marawi matapos na maghasik ng kaguluhan ang Maute group sa syudad na nagsimula noong May 23 para protektahan umano ang itinuturing na lider ng ISIS sa Pilipinas na si Isnilon Hapilon.
Ang Marawi crisis rin ang nag-puwersa kay Pangulong Duterte na magdeklara ng Martial Law sa buong Mindanao.
Inilatag naman ng militar ang mga posibilidad kung sino ang nagmamay-ari ng pitumpu’t syam (79) na milyong pisong cash at mga tseke na narekober sa Marawi City.
Ayon kay Brig. General Restituto Padilla, Spokesman ng AFP o Armed Forces of the Philippines, posibleng kinita ito ng Maute Group mula sa pangangalakal ng illegal drugs, puwede rin anya na nagmula ito sa mga contributors ng Maute Group at posible ring mayroong legal na nagmamay-ari ng pera.
Sinabi ni Padilla na hindi malayong naiwan ito ng isang lehitimong negosyante, contractor o opisyal ng gobyerno dahil maraming proyekto ngayon sa syudad at sa mga karatig na mga bayan.
“Sinabi rin kasi sa amin na karamihan sa mga Maranao na mangangalakal ay hindi nila inilalagay sa bangko ang pera, iniipon kaya puwede ring mangyari yun.” Ani Padilla
Ayon kay Padilla, hindi nila inaasahan ang pagkakadiskubre ng milyon-milyong pera sa Marawi.
Gayunman, isang positibong bagay anya ito para sa mga sundalong nakikipaglaban sa Marawi dahil napatunayan nila na walang katotohanan ang mga alegasyon na mga militar mismo ang nagnanakaw at naninira sa mga kabahayan sa mga abandonadong bahay sa Marawi.
Religious war
Samantala, posibleng target ng Maute Group na mapasiklab ang isang religious war sa Mindanao.
Ayon kay Padilla, Spokesman ng AFP o Armed Forces of the Philippines, posibleng mismong ang Maute group ang nagpapakalat sa larawan ng pagsalakay at paninirang ginawa nila sa St. Mary’s Cathedral sa Marawi upang magalit ang mga Kristiyano sa Muslim.
“Ito po ay isang pag-atake ng mga bandido, mga rebelde, mga kriminal na ito sa St. Mary’s Cathedral, totoo po ang video, authentic, pero ang nagpalabas nito ay ang grupo rin na ito upang i-arouse ang isang religious war, balak nilang galitin ang lahat ng mga Kristiyano laban sa kanila.” Pahayag ni Padilla— By Len Aguirre / Karambola (Interview)
*Photo Credit: CNN PH
