Ipinaaaresto na ng Davao Regional Trial Court si retired SPO3 Arturo Lascañas.
Ang mandamiyento de aresto ay nag-ugat sa reklamong inihain ni Louise Pala, asawa ng pinatay na broadcaster Jun Pala laban kay Lascañas.
Murder at attempted murder ang kasong kinakaharap ni Lascañas dahil sa di umano’y serye ng pag-atakeng ginawa nito kay Jun Pala mula 2002 hanggang 2033 na nauwi rin sa pagkamatay ng broadcaster.
Ang mga kasong inihain laban kay Lascañas ay inaprubahan ng city prosecutors office base base sa naging testimonya ni Lascañas sa imbestigasyon ng Senado.
Nagsilbi anilang extrajudicial confession ni Lascañas ang kanyang testimonya sa Senado kung saan idinetalye nya ang naging papel nya sa tangkang pagpatay at tuluyang pagpatay kay Jun Pala.
Ang iba pang pangalang binanggit ni Lascañas sa kanyang testimonya sa Senado ay hindi kasama sa mga kinasuhan.
Isandaan at dalawampung libong piso (P120,000) sa kada kaso ng frustrated murder ang inirekomendang piyansa kay Lascañas samantalang non-bailable naman ang murder case.
Si Lascañas ay hindi na bumalik ng bansa mula nang magpaalam itong magtungo sa Singapore noong Abril.
By Len Aguirre
Humihingi pa rin ng paumanhin ang pamunuan ng BPI o Bank of the Philippine Islands sa kanilang customer.
Sa kabila ito nang pagkakaayos ng technical glitch na naging dahilan ng maghapong problema sa mga transaksyon sa BPI kahapon.
Ipinabatid ni BPI Senior Vice President Catherine Santamaria na naayos ang problema alas-10:00 kagabi.
On line na rin aniya ang lahat ng kanilang ATM bagamat hindi pa rin operational ang kanilang web-based transactions.
Muling sinabi ni Santamaria na maliit na porsyento lamang ng kanilang mga kliyente ang naapektuhan ng problema at wala aniyang hacking kundi internal systems error lamang ang talagang nangyari kahapon.
By Judith Larino
Pumalo na sa pitongpung libo (70,000) ang bilang ng mga lumikas mula sa Marawi City kasunod ng nagpapatuloy na kaguluhan sa lungsod.
Ayon kay Interior and Local Government Acting Secretary Catalino Cuy nasa Lanao del Norte ang bulto ng mga nagsilikas na umaabot sa tatlumpu’t anim na libo (36,000).
Meron naman aniyang dalawampu’t limang libo (25,000) na pansamantalang nanunuluyan sa Iligan City, apat na libo (4,000) sa Cagayan de Oro City, tig-isang libo (1,000) sa Bukidnon at Misamis Oriental at isang daang (100) evacuees sa Misamis Occidental.
Tiniyak din ni Cuy na patuloy ang ginagawang aksyon ng pamahalaan para tugunan ang lahat ng pangangailangan ng mga evacuees.
By Krista de Dios | with report from Jonathan Andal (Patrol 31)
Photo: CBCPNews
Nailipat na sa Maynila ang ama ng dalawang (2) lider ng Maute Group na si Cayamora Maute.
Ipinabatid ni Davao City Police Office Chief Senior Supt. Alexander Tagum na alas-9:00 ng gabi umalis ng Davao City ang matandang Maute kasama ang mga tauhan ng Joint Task Force Davao.
Bukod sa matandang Maute, sakay din ng C-130 plane na lumapag sa Villamor Air Base ang pangalawang asawa nitong si Kongan Balawag, anak na si Norjannah Balawag Maute at manugang na si Benzarali Tingao.
Tikom naman ang bibig ni Tagum kung saan dadalhin ang matandang Maute para na rin sa seguridad nito.
By Judith Larino | with report from Jonathan Andal (Patrol 31)
Hinikayat ng Department of Education o DepEd ang mga opisyal ng paaralan na agad na aksyunan ang mga pag-abuso ng mga guro.
Ayon kay Education Secretary Leonor Briones, dapat na suspindihin ng Superintendent o Regional Director ang inirereklamong guro habang iniimbestigahan ito.
Kinakailangan ay mayroong Child Protection Committee ang mga paaralan na siyang mag-iimbestiga at magbabantay sa mga kaso ng child abuse.
Kaugnay nito, nanawagan naman ang grupong People’s Recovery, Empowerment Development assistance Foundation sa mas istriktong implementasyon ng Child Protection Policy.
By Rianne Briones
Samu’t saring mga armas, bala at pampasabog ang nakuha ng mga miyembro ng Armed Forces of the Philippines o AFP sa pagpapatuloy ng clearing operations sa Marawi City.
Ayon kay Philippine Army First Infantry Batallion Commander Lt. Col. Chris Tampus, inaalam na kung gamit ito ng mga teroristang Maute o ng mga residente sa syudad.
Bukod sa mga pampasabog, nakuha rin sa isang bahay ang radyo o communication device ng Maute.
Nasagip din sa lugar ang isang lalaking higit dalawang linggo nang nagtatago sa kanyang tahanan ng walang pagkain at tubig at halos mabingi na umano sa lakas ng mga bomba.
Siniguro ng AFP na magpapatuloy ang pagsuyod sa halos siyamnapung (90) porsyento ng syudad na nabawi na sa Maute upang masigurong hindi na makababalik pa ang mga terorista at maging mga sympathizer nito sa lugar.
By Rianne Briones
Pinigilan ni Pangulong Rodrigo Duterte ang partisipasyon ng higit dalawang libong (2,000) mga miyembro ng MNLF o Moro National Liberation Front sa labanan sa Marawi City.
Sa gitna ng pagharap ng Pangulo sa mga sundalo sa Tacurong City, sinabi nito na hindi magandang pagharapin ang Moro sa kapwa nito Moro.
Aniya, sinabihan niya si MNLF Founder Nur Misuari na hindi ito ang magandang pagkakataon dahil kailangan munang maintindihan kung bakit nangyayari ang naturang kaguluhan.
Una nang nanawagan si Pangulong Rodrigo sa MNLF at MILF o Moro Islamic Liberation Front para tumulong sa operasyon ng gobyerno kontra Maute Group kasabay ang pangakong bibigyan sila ng benepisyo tulad ng tinatanggap ng mga sundalo.
NDFP
Samantala, handa ang NDFP o National Democratic Front of the Philippines na makipagtulungan sa gobyerno sa laban nito sa Maute Group kung babawiin nito ang all-out war policy at Martial Law sa Mindanao.
Ayon kay NDF Negotiationg Panel Chair Fidel Agcaoili, kailangan na mag-usap ng dalawang panig para ilatag ang magiging ugnayan ng AFP o Armed Forces of the Philippines at NPA o New People’s Army.
Binigyang diin ni Agcaoili ang kahalagahan ng muling negosasyon ng gobyerno at CPP para sa localized ceasefire, koordinasyon at kooperasyon kasunod ng bantang pagkalat ang terorismo sa iba pang bahagi ng Mindanao.
Sa kabila nito, sinabi ni Agcaoili na nasa home defense mode na ang kanilang moro revolutionary liberation organization laban sa mga terorista sa loob ng syudad.
Inilalarga naman ng mga NPA sa labas ng syudad ang blocking operations habang pinapanatili ang distansya mula sa mga tauhan ng gobyerno.
By Rianne Briones
Nakatakdang magpulong ang Department of Tourism o DOT at Miss Universe organizers sa posibleng muling pag-host ng Pilipinas sa naturang beauty pageant.
Ayon kay Tourism Undersecretary Kat de Castro, isasabay na ang meeting sa Biyernes sa gaganaping charity event ng ilang Miss Universe contestant.
Aniya, nakakatuwa na sa mismong organizer nito nagmula ang ideya na muling gawin sa bansa ang naturang prestihiyosong pageant.
Posibleng inanunsyo kung matutuloy na ganapin dito ang Miss Universe 2017 bago matapos ang buwan.
By Rianne Briones
