Hinimok ng Malacañang ang publiko na batiin ang lahat ng mga ama bukas, Father’s Day.
Ayon kay Presidential Spokesperson Ernesto Abella, marapat lamang na pasalamatan at paglaanan ng oras bukas ang lahat ng mga amang nagsilbing gabay sa ating buhay.
Samantala, inaasahan namang sa Davao City ipagdiriwang ni Pangulong Rodrigo Duterte ang Father’s Day bukas kung saan naroon ang kanyang pamilya.
By Ralph Obina
Posibleng pumalo pa sa animnapu’t lima (65) ang mga nasasawi kasunod ng nangyaring sunog sa Grenfell Tower sa London.
Ito’y dahil sa nawawala pa rin ang nasabing bilang na kabilang sa mga taong pinangangambahang na-trap sa loob ng nasunog na gusali.
Patuloy ang ginagawang paghagilap ng London Police at mga bumbero sa mga napaulat na missing ng Grenfell.
Sa kasalukuyan, nasa labing pito (17) ang kumpirmadong patay ngunit inaasahan pang madagdagan sa paglipas ng mga araw.
By Jaymark Dagala
Pasok na sa final ng PBA Commissioners’ Cup ang San Miguel Beermen.
Ito ay makaraang talunin ng Beermen ang koponan ng Star Hotshots sa semi-finals sa iskor na 109-102.
Nanguna sa panalo ng San Miguel si Alex Cabagnot na sumalaksak ng dalawampu’t anim (26) na puntos, anim (6) na rebounds at anim (6) na assists na sinegundahan naman ni Chris Ross na kumana ng dalawampu’t apat (24) na puntos.
Dahil dito, makakaharap ng San Miguel ang alinman sa mananalo sa pagitan ng Barangay Ginebra at TNT Katropa.
By Ralph Obina
Photo: PBA Images
Bukas si House Speaker Pantaleon Alvarez sa ideyang palawigin ang Martial Law sa Mindanao hanggang sa pagbaba sa puwesto ni Pangulong Rodrigo Duterte sa 2022.
Paliwanag ni Alvarez, ito ay upang mas mapabilis ang pagsasaayos sa Marawi City.
Naniniwala din ang House Speaker na makakatulong ang Martial Law sa pagtiyak ng panunumbalik ng kapayapaan at seguridad ng lungsod.
Nilinaw naman ni Alvarez na ito ay kanya lamang personal na opinyon at hindi posisyon ng Kongreso.
Sinabi pa nito na wala naman dapat ipangamba ang mga mamamayan ng Luzon at Visayas dahil tanging sa Mindanao lang naman aniya iiral ang Batas Militar.
By Ralph Obina
Nakalaya na matapos makapagpiyansa si dating CIDG o Criminal Investigation and Detection Group Region 8 Chief Superintendent Marvin Marcos na isa sa mga itinuturong suspek sa pagpatay kay dating Albuera, Leyte Mayor Rolando Espinosa at isa pang inmate noong nakaraang taon.
Ito ang kinumpirma ni CIDG Region 8 Deputy Chief, Inspector Teodolo Armada.
Batay sa ulat, pinagbigyan ng Baybay Regional Trial Court ang mosyon ng Department of Justice na maibaba sa homicide mula sa murder ang kaso laban kay Marcos at mga tauhan nito.
Matatandaang pinangunahan ng grupo ni Marcos ang operasyon sa Leyte Sub-Provincial Jail noong Nobyembre ng nakaraang taon para isilbi ang search warrant kay Espinosa at isa pang inmate na si Raul Yap dahil sa umano’y pagtatago ng armas at iligal na droga ng mga ito.
Natapos ang operasyon sa pagkamatay nina Espinosa at Yap.
By Ralph Obina
Dapat simulan na ng pamahalaan ang pagbuo ng long term recovery at rehabilitation program upang matiyak na agad na makababangon ang mga residente ng Marawi City na naipit sa kaguluhan.
Ito’y ayon kay Senador Sherwin Gatchalian makaraang magsumite ng resolusyon na nananawagan para simulan ang malawakang assessment sa pinsalang dulot ng pag-atake ng Maute terror group.
Ayon kay Gatchalian, magiging mabilis na ang pagbangon ng mga taga-Marawi sa sandaling mapagtagumpayan na ng pamahalaan ang laban nito kontra terorismo na itinuturing na malaking hamon ng bansa.
Nakasaad sa resolution number 404 ng Senado na dapat maging nagkakaisang-misyon ang lahat ng mga kinauukulang ahensya ng pamahalaan para sa agarang pagpapadala ng tulong upang mabilis na makabangon ang mga naipit sa bakbakan.
By Jaymark Dagala | with report from Cely Bueno (Patrol 19)
Nagpasalamat si Kapamilya star Janella Salvador na hindi grabe ang naging kondisyon matapos maaksidente.
Ayon kay Janella, tumama ang ulo niya sa harness na gawa sa bakal sa kalagitnaan ng shooting niya ng pelikulang ‘Bloody Crayons’.
Nag-alala naman ang ka-love team ni Janella na si Elmo Magalona nang malaman ang aksidente.
Sina Janella at Elmo ay magkasama sa nasabing horror movie.
By Judith Larino
Photo: Screengrab from elmomagalona / Instagram
Iginiit ng kampo ni Vice President Leni Robredo na tadtad ng mga inconsistencies ang inihaing protesta laban sa kaniya ni dating Senador Bongbong Marcos.
Ito ang nakasaad sa mahigit 100 preliminary conference brief na isinumite ng kampo ng Bise Presidente sa Korte Suprema na tumatayong Presidential Electoral Tribunal.
Ayon sa mga abogado ni ginang Robredo, tila dinidiktahan umano ni Marcos ang high tribunal na ideklara siyang panalo sa nakalipas na halalan gayung hinihiling nito na ipawalang bisa ang resulta niyon.
Kasunod nito, sinabi ni Atty. Romulo Macalintal na sinisira umano mismo ni Marcos ang kaniyan protesta dahil ang kinukuwesyon niyang posisyon ang siyang nais niyang makuha.
By: Jaymark Dagala