Binisita ni Pangulong Rodrigo Duterte ang burol ng mga biktima ng pag-atake sa Resorts World Manila, sa Pasay City.
Dakong alas onse kagabi nang dumating si Pangulong Duterte sa Veronica Memorial Chapel kung saan naka-burol ang siyam na biktima.
Kabilang sa binista ng pangulo ang mga Taiwanese victim na sina Hing Tung Tsung, Lai Wei-Chung, Lai Yu-Chieh at Pilipino na si Carmelita de la Cruz.
Ayon kay Catalino Cuy, officer-in-charge ng Department of the Interior and Local Government, personal na nag-alok ng tulong si Pangulong Duterte sa mga kaanak ng biktima.
Plano ng pamilya ng mga Taiwanese na i-cremate ang kanilang mga mahal sa buhay at i-uwi sa kanilang bansa, bukas.
Binista rin ng punong ehekutibo ang labi ni Eleuterio Reyes, asawa ng dating aktres na si Azenith Briones sa Rizal Funeral Homes.
Matapos nito ay nagtungo si Duterte sa Heritage Park, Taguig upang bisitahin naman ang labi ni Elizabeth Panlilio Gonzales, asawa ni Pampanga 3rd district Rep. Aurelio “Dong” Gonzales Jr.
By Drew Nacino
Patay ang alkalde ng bayan ng Marcos, Ilocos Norte makaraang barilin ng hindi nakikilalang salarin.
Iniinspeksyon ni mayor Arsenio Agustin, animnapu’t isang (61) taon, ang isang maliit na water impounding project sa Barangay Mabuti at pabalik na sana sa kanyang sasakyan nang barilin sa ulo gamit ang M-16 rifle, kahapon.
Patay din sa insidente ang municipal employee na si Mark Valencia, isang backhoe operator na hindi na umabot ng buhay sa ospital.
Bagaman nakaganti ng putok ang mga bodyguard ng biktima, agad namang nakatakas ang gunman.
Matagal na umanong nakatatanggap ng death threats si Agustin na nagbalik bansa mula sa Hawaii, USA noong 2013 upang sumabak sa mayoralty race sa bayan ng Marcos.
Inaalam na ang kung ano ang motibo sa pamamaslang at sino ang posibleng nasa likod nito.
By Drew Nacino
Hindi nagtutugma ang mga impormasyong inilalabas ng mga otoridad sa nangyaring pag-atake sa Resorts World Manila.
Kung noong Biyernes, sinasabi ng PNP o Philippine National Police na naka-kotse ang gunman nang magtungo sa naturang hotel casino, ngayon sinasabi na ni NCRPO Chief Police Director Oscar Albayalde na nag taxi ang gunman papuntang Resorts World.
Katunayan, hawak na anya nila ngayon ang taxi driver na naghatid sa suspek.
Sinabi rin noong Biyernes ni PNP Chief Ronald Dela Rosa na hindi namaril ang suspek sa loob ng hotel casino.
Pero ayon sa Resorts World Manila, nanlaban ang gunman na ikinasugat pa ng kanilang dalawang security personnel.
Una ring sinabi ni Dela Rosa na nabaril ng mga otoridad ang suspek na ikinamatay nito.
Pero kalaunan sinabi na nitong nagpakamatay ang gunman matapos sunugin ang sarili.
By Jonathan Andal
Binisita ni Defense Secretary Delfin Lorenzana ang Marawi City upang perosnal na alamin ang sitwasyon doon.
Kasama niya ang mga matataas na opisyal ng Armed Forces of the Philipines o AFP sa pangunguna ni Chief of Staff General Eduardo Año.
Ayon kay Lorenzana, hindi lang lokal na teroristang grupo na Maute ang may kagagawan sa Marawi crisis.
Anya, may kamay na rin ang ISIS sa nangyayari sa naturang lugar, na napatunayan umano sa walong (8) mga dayuhan na napatay ng mga otoridad.
Malaki rin anya ang posibilidad na totoo ang kwento ng mga na-rescue na mga sibilyan na may mga dayuhan pang natitira sa loob ng Marawi na nagsisilbing mga snipers.
Kasama nilang nakipagpulong kanina sa Lanao del Sur Crisis Management Committee sina Lt. General Carlito Galvez ng Westmincom at Brig. General Rolando Bautista ng 1st Division ng Philippine Army.
By Jonathan Andal
Humataw ang presyo ng bigas sa Marawi at Iligan City kabila ng pag-iral ng price freeze dahil sa idineklarang martial law sa mindanao.
Ayon kay Provincial Crisis Management Committee Spokesman Zia Alonto Adiong, ang dating dalawang libong piso (P2,000.00) kada sako ay mabibili na ngayon ng lima hanggang anim na libong piso (P5,000.00 – P6,000.00).
Kung hindi ito maso-solusyunan ay malaki aniya ang posibilidad na magkaroon ng kakulangan sa mga relief goods para sa mga evacuees.
Kaugnay nito ay umapela si Adiong sa mga negosyante na maging responsible at hindi samantalahin ang krisis.
Matatandaang umatake sa Marawi ang Maute Group na nagtulak naman sa Pangulo na magdeklara ng batas militar sa rehiyon.
Pagtaas ng presyo ng bigas sa Mindanao itinanggi ng Palasyo
Itinanggi ng Malacañang na tumaas ang presyo ng bigas sa Mindanao partikular sa Marawi City sa kabila ng ipinatupad na price freeze ng pamahalaan.
Kasunod na rin ito ng ulat na umabot umano ng hanggang anim na libong piso (P6,000.00) kada sako ang presyo ng bigas sa lugar na pinangyarihan ng bakbakan ng mga sundalo at mga terorista.
Sinabi ni Presidential Spokesman Ernesto Abella sa Mindanao Hour noong Biyernes na agad nag-check ang Department of Trade and Industry (DTI) at pinabulaanan ang ulat.
Matatandaang matapos magdeklara ng martial law si Pangulong Rodrigo Duterte sa Mindanao ay nagpatupad agad ang DTI ng price freeze sa mga pangunahing bilihin para hindi magsamantala ang mga negosyante sa sitwasyon.
Tatagal ng 60 araw ang price freeze alinsunod sa nakasaad sa martial law declaration.
Sinabi ni Abella na mahigpit na nakamonitor ang DTI sa galaw ng mga presyo ng mga bilihin sa Mindanao lalo na sa lugar kung saan may problema sa peace and order.
Nakabantay din aniya ang mga otoridad para hindi maapektuhan ang distribusyon ng mga relief goods sa mga naapektuhang residente.
By Rianne Briones
Hindi parin lusot ang management ng Resorts World Manila (RWM) sa naganap na malagim na insidente na nagresulta sa pagkasunog ng bahagi ng casino at pagkasawi ng ilang guests at kawani nito.
Sinabi ni Presidential Spokesman Ernesto Abella, sisilipin ng mga otoridad ang security lapses ng Resorts World Manila sa patuloy na imbestigasyon.
Malaki ang duda ng Philippine National Police o PNP na nagkaroon ng “security breach” kaya nauwi sa trahedya ang insidente.
Ipinagtataka ng mga otoridad kung bakit walang kahirap-hirap na nakapasok ang nag-iisang armadong suspect sa Resorts World Manila at hindi man lang pinigilan ito ng mga guwardiya.
Marami din umanong dapat na ipaliwanag ang mga nagbabantay sa Closed Circuit Television (CCTV) ng establismento dahil kitang-kita sa recorded video ang armadong suspect pero walang ginawa ang mga ito.
Sisilipin din ng mga otoridad ang building design at safety protocols ng RWM dahil sa posibilidad na hindi umano gumana ang sprinklers ng casino kaya mabilis na natupok ang lugar na nagresulta sa pagkasawi ng mga biktima.
Kasabay nito kinatigan ni Abella ang naging pahayag ni Senador Panfilo Lacson sa panawagan nito sa publiko, pulis at media na iwasan muna ang mga ispekulasyon para hindi makagulo sa ginagawang imbestigasyon.
Si Lacson ay dating hepe ng Philippine National Police at maituturing na isa sa mga eksperto sa mga ganitong usapin
Mga nakaligtas na biktima sa Resorts World inirekomendang isailalim sa psychosocial debriefing
Inirekomenda ng Department of Health o DOH na isailalim sa psychosocial debriefing ang mga nakaligtas na biktima sa naganap na insidente sa Resorts World Manila.
Ito ang inihayag ni Health Secretary Eric Tayag para aniya maalis ang trauma ng mga biktima ng insidente.
Karamihan sa mga nakaligtas ay sugatan o kaya naman ay nabalian ng paa matapos lumundag sa second floor ng casino dahil sa matinding takot.
Ayon kay Tayag hindi madaling maalis sa isip ng mga biktima ang kanilang sinapit na karanasan lalo pa at armado ang suspect.
Inirekomenda rin ni Tayag na isailalim sa forensic examination ang mga nasawing biktima para malaman ang tunay na dahilan ng kanilang pagaksawi bagamat sinabi aniya sa ulat na namatay ang mga ito suffocation.
Pero sinabi ni Tayag na hanggang rekomendasyon lang sila dahil naging punong abala sa mga nasawing biktima ang management ng Resorts World.
DSWD magbibigay ng ayuda sa mga nasugatan at mga pamilyang naulila sa nangyaring pag – atake
Pagkakalooban ng Department of Social Welfare and Development o DSWD ng ayuda ang mga nasugatan at mga pamilyang naulila sa nangyaring pag – atake sa Resorts World Manila.
Ayon kay DSWD Secretary Judy Taguiwalo, technical assistance at resource augmentation ang nakatakdang ibigay sa mga biktima.
Itinalaga ang apat (4) na staff mula sa Crisis Intervention Unit para mag-ikot sa mga pagamutan kung saan dinala ang mga nasugatan biktima.
Habang limang (5) miyembro naman ng Disaster Team and Protective Services Program ang magsasagawa ng assessment sa higit tatlumpung (30) nasawi sa insidente.
By Rianne Briones | With Report from Aileen Taliping
Patay na nang matagpuan ang dalawang (2) Japanese national na napaulat na nawawala simula pa noong Martes sa Palawan.
Ayon sa imbestigador na si Senior Inspector Thirz Starky Timbangcaya, natagpuan ang bangkay ng dalawa matapos na kumanta ang tatlong (3) nahuling suspek na kanilang pinatay ang mga biktima at saka itinapon ang katawan sa bahagi ng Galoc Island.
Pinalubog din umano ng mga suspek ang bangkang nirentahan ng dalawa bago tumakas patungong Coron.
Kinilala ang mga suspek na sina Michael Suangco, Aladin Mohameran at Reynante Labampa.
Pinaghahanap naman ang isang Sonny Anicete na itinututorng lider ng grupo.
Nakatakda namang imbestigahan ng mga otoridad ang isa pang Japanese national na isang negosyante na sinasabing nagpapapatay sa mga biktima.
By Rianne Briones
Nakiisa ang mga preso ng Santiago City District Jail sa inilargang Brigada Eskwela bilang paghahanda sa pagbubukas ng klase sa Lunes.
Ayon Kay Chief Inspector Gilbert Accad, dinala sa loob ng kulungan ang libu – libong mga sirang upuan mula sa mga pampublikong paaralan sa Santiago.
Ang mga kababaihang bilanggo ang syang naghugas habang ang mga kalalakihan naman ang syang nagkumpuni at nagpintura ng mga upuan.
Sinabi ni Accad nasa naturang aktibidad ay naramdaman ng mga preso na sa kabila ng kanilang pagkakakulong ay nanatili silang bahagi at kailangan ng komunidad.
By Rianne Briones
Ibinabala ni Jeff Horn na maaari umanong magretiro na si Manny Pacquiao pagkatapos ng kanilang laban sa susunod na buwan.
Itataya ng Pambansang Kamao ang kanyang Welterweight Title sa bakbakan nila sa ring sa Brisbane, Australia sa Hulyo 2.
Ayon kay Horn, iginagalang niya si Pacquiao bilang sa mga kinatatakutang boksingero sa mundo at natutuwa siyang pinaghahandaan siya nang husto ng Pinoy Ring Icon.
Gayunman, giit ng Australian boxer, posibleng magdalawang-isip nang sumampa pang muli ng ring si Pacquiao pagkatapos ng kanilang laban.
By Jelbert Perdez