Muling nagtagumpay ang Golden State Warriors sa Game 2 ng bakbakan nila ng Cleveland Cavaliers para sa NBA Finals.
Umiskor ng 33 points at 13 rebounds si Kevin Durant samantalang nagdagdag ng 32 points, 10 rebounds at 11 assists si Stephen Curry para mapataob ang Cavaliers sa final score na 132-113.
Dinomina ng Warriors ang laro sa second half ng bakbakan.
Pinangunahan naman ni Lebron James ang Cavaliers sa ginawang 29 points, 11 rebounds at 14 assists.
Dalawang panalo na lamang ang kailangan ng Warriors para maitatak sa kasaysayan bilang kauna-unahang NBA Champion na nakakumpleto sa walang talong playoff run.
Itinakda ang Game 3 ng bakbakang Warriors at Cavaliers sa Miyerkules at Game 4 naman sa Biyernes.
By Judith Larino
Halos limandaang (500) residente na lamang ng Marawi City ang nasa loob pa ng lungsod.
Ayon ito kay AFP Spokesman Brigadier General Restituto Padilla base na rin sa report ng local officials.
Sinabi sa DWIZ ni Padilla na takot na takot pa ang mga nasabing residente dahil sa bakbakan ng mga sundalo at Maute group.
“Siguro humigit kumulang nasa 500 na lang yan na nasa loob, mga residente po ito na natakot lumabas, lumikas sa pangambang maipit sila sa nangyayaring bakbakan.” Ani Padilla
Samantala, halos tatlong daang (300) sibilyan naman ang nailigtas sa Marawi City.
Ipinabatid ito sa DWIZ ni Padilla matapos ang humanitarian effort ni Government Peace Panel Chair Irene Santiago sa loob ng apat na oras katuwang ang local government units kahapon.
“Ito ay nagbigay daan upang matulungan natin ang 179 na residente na kababayan natin diyan na patuloy na naiipit sa loob ng Marawi, bukod dito earlier in the day kahapon ay may na-rescue tayong 95 katao, kung ating susumahin aabot na ng halos 300 ang natulungan natin at nabigyan ng humanitarian assistance.” Pahayag ni Padilla
Evacuees
Pumapalo na sa mahigit apatnapu’t dalawang libong (42,000) pamilya ang lumikas mula sa Marawi City at sa katabing bayan ng Marantao sa Lanao del Sur.
Ayon kay Director Carlos Padolina ng DSWD o Department of Social Welfare and Development ang mga evacuees ay nakakalat ngayon sa iba’t ibang evacuation centers sa Iligan City at iba pang lugar sa Lanao del Sur gayundin sa Davao hanggang sa Cebu.
Kaugnay nito, tiniyak ni Padolina na tuluy-tuloy ang ayudang ibinibigay ng DSWD sa mga evacuee lalo sa mga pangunahin nilang pangangailangan tulad ng pagkain.
“Tuloy pa po yung aming pagbibigay kasi maliban sa armed conflict na nangyayari sa Mindanao ay meron din pong ilang mga pagbaha kaya yun din ang inaasikaso namin, plano rin po naming na magkaroon ng ilang pagbabago, alam naman po natin na nasa fasting ang ating mga kapatid dahil sa Ramadan, huwag po silang mag-alala dahil ang pagkaing ating ipinamimigay ay halal at ngayon ay nag-iisip rin kami na i-programa rin ang mga pagkain, naghahanap kami ng mga gulay na nasa loob ng food packs.” Pahayag ni Padolina
By Len Aguirre | Balitang Todong Lakas (Interview)
Hindi mangingimi ang Pangulong Rodrigo Duterte na ipabitay ang pulis na nakipagrelasyon sa isang miyembro ng Abu Sayyaf.
Binigyang diin ng Pangulo na traydor sa bansa si Superintendent Maria Christina Nobleza kayat dapat lang itong bitayin sa pamamagitan ng public hanging.
Matatandaan na si Nobleza ay nahuli sa Bohol habang kasama si Renierto Dongon, bomb maker ng Abu Sayyaf.
Nahaharap ngayon sa kasong obstruction of justice, illegal possession of firearms at disobedience to persons in authority si Nobleza.
By Len Aguirre
Nag-deploy ng dagdag na traffic enforcers ang MMDA o Metropolitan Manila Development Authority sa mga lugar malapit sa mga eskuwelahan.
Ito ayon kay MMDA Chairman Danilo Lim ay para bigyan ng ayuda ang mga motorista at mga estudyante sa pagbubukas ng klase ngayong araw na ito.
Ipinabatid din ni Lim ang inilagay na dagdag na signs sa mga crossing areas at pedestrian lanes bukod pa sa anti-parking signs.
Kaugnay nito ay kasado na rin ang ide-deploy na mga sasakyan ng MMDA sa gitna ng tigil-pasada ng grupong PISTON ngayong araw na ito.
Ayon kay Lim, nakatutok sila sa sitwasyon kayat kung kinakailangan ay kaagad silang magpapalabas ng mga sasakyan para saklolohan ang mga pasaherong maaapektuhan ng pagkilos ng grupo ni George San Mateo.
Aktibo aniya ang kanilang metrobase center kayat uubra namang ipadala ang mga nakaipon nilang sasakyan sa mga lugar na kailangan ito.
By Judith Larino
Naging emosyonal ang isinagawang benefit concert ni US pop singer Ariana Grande sa Manchester.
Umabot sa mahigit limampung libong (50,000) fans ang nagsama-sama sa One Love Manchester Concert ni Ariana bilang tulong na rin sa mga biktima ng suicide bombing sa kanyang concert nitong nakalipas na dalawang linggo.
Inawit ni Ariana na puno ng emosyon at mensahe ng pasasalamat ang bawat kanta sa nasabing benefit concert.
Kabilang sa mga nakiisa sa nasabing benefit concert sina Justin Bieber, Katy Perry, Miley Cyrus, Coldplay, Pharrell Williams, Usher at Black Eyed Peas.
Magugunitang dalawampu’t dalawa (22) katao ang nasawi sa suicide attack noong May 22 pagkatapos ng concert ni Ariana.
By Judith Larino
Nagsimula nang maglibot sa ilang paaralan sa Metro Manila si Department of Education o DepEd Secretary Leonor Briones kaugnay sa pagbubukas ng klase ngayong araw na ito.
Sinabi sa DWIZ ni Briones na nais niyang personal na makita ang sitwasyon sa pagbubukas ng klase.
Inamin ni Briones na sa Metro Manila, malaking problema nila ang kakulangan ng silid-aralan kumpara sa mga nasa lalawigan.
Nagpapatupad na lamang aniya ng shifting sa mga klase ang ilang eskuwelahan para may magamit na silid-aralan tulad ng Corazon C. Aquino Elementary School sa Baseco sa lungsod ng Maynila.
“Bibisita ako sa mga eskwelahan na meron pang problema at eskwelahan na maayos tapos yung mga may kulang pa para makita natin kung paano ang pag-handle ng enrolment. Dahil sa kakulangan ng classroom, ang ginagawa ng mga teacher ay nag-si-shifting, kaya pupuntahan ko itong sa Corazon C. Aquino Elementary School dahil meron daw na 2 o 3 shift kada araw, para makita ko kung ano ang kalagayan talaga.” Ani Briones
Ayon pa kay Briones, walang sapat na espasyo sa kalakhang Maynila na uubrang pagtayuan ng mga bagong silid-aralan taliwas sa mga lalawigan.
“Sa kalakhang Maynila, sa NCR, problema talaga ang classroom sa mga crowded na lugar kasi kahit gusto naming gumawa ng bagong mga classrooms wala namang lugar, wala namang nagdo-donate at walang buildable space kumbaga, pero karamihan lalo na sa probinsya hindi problema ang lugar dahil may lupa naman, dito sa Metro Manila, ang problema maski gusto naming magtayo ng eskwelahan ay walang available na space, so shifting ang ginagawa.” Dagdag ni Briones
School communities
Kaugnay nito, pinaplano na ng DepEd ang pagtatayo ng school communities na nasa labas ng Metro Manila.
Ito ayon kay Briones ay para matugunan ang kakulangan ng mga silid-aralan.
Sinabi sa DWIZ ni Briones na maaaring maging sistema rito ang pagbitbit ng mga estudyante patungo sa mga paaralang nasa labas ng kalakhang Maynila.
“Balang-araw iniisip na naming na gagawa kami ng school communities outside Metro Manila tapos dadalhin na lang ang mga bata sa bus papunta sa mga eskwelahan na medyo nasa labas ng Maynila, Marikina, Quezon City para magkaroon tayo ng talagang malawak na building at eskwelahan para sa kanila.” Pahayag ni Briones
Binigyang diin ni Briones na libre ang edukasyon sa elementarya at high school at bukas ang mga paaralan sa buong bansa para sa lahat ng batang Pilipino.
Samantala, naghahanda na rin ang DepEd sa pagtatayo ng mga tinaguriang ‘typhoon-resilient classrooms’ para tugunan ang problema lalo na sa panahon ng mga kalamidad.
“Ang standard kasi dati noong nangyari si Yolanda ay kailangang maka-resist ng 180 kph pero ngayon ang standard natin sa mga bagong buildings ay maka-resist ng wind na aabot sa 350 kph, tinaasan natin. Pinapalakas na rin natin ang foundation ng ating mga buildings ngayon.”
By Judith Larino | Balitang Todong Lakas (Interview) / AR
Photo Credit: @DepEd_PH / Twitter
Nagsilbing tulay si Foreign Affairs Secretary Alan Peter Cayetano para muling maayos at mapatatag ang relasyon ng Pilipinas at European Union.
Ito ay matapos na magpatawag ng luncheon si Cayetano sa mga opisyal European Union sa tanggapan ng DFA sa Pasay City.
Sinabi ni Cayetano na mayroong maayos na relasyon ang bansa sa EU ngunit bahagya itong nagkaroon ng problema sa ngayon.
Sa naturang meeting ay nagkaroon ng pagkakataon na mapag-usapan ang ilang mahalagang isyu na naglalayong maibalik ang dating relasyon ng bansa sa EU.
Matatandaang ipinahayag ni Pangulong Rodrigo Duterte na hindi na tatanggap ang Pilipinas ng anumang tulong pinansyal mula sa EU dahil sa pakikialam nito sa isyu ng human rights sa bansa.
By Rianne Briones
Nakatakas ang tatlong (3) preso ng Metro Bacolod District Jail sa Bacolod City kahapon.
Kinilalala ang mga preso na sina Marlon Molina nahaharap sa kasong pagnanakaw at Noli Dega at Ebson Jaen na kapwa may kasong may kinalaman sa iligal na droga.
Ayon kay Bureau of Penology-Negros Island Region Director for Administration Jail Superintendent Armelito Fuentes, inakyat ng tatlo ang bakod ng compound at tumalon sa likod na bahagi ng kulungan.
Agad na nahuli si Jaen matapos lamang ang tatlumpung (30) minuto habang pinaghahanap pa rin ang dalawang (2) kasama nito.
Posible namang masibak ang warden ng kulungan at mga kasama nito kung mapapatunayang nagkaroon ng pagpapabaya kaya nakatakas ang nasabing mga bilanggo.
By Rianne Briones
