Isinusulong sa Kamara na maparusahan ang mga tsismoso at tsismosa sa mga lugar ng trabaho tulad ng opisina, business establishment at iba pa.
Ayon kay Ako Bicol Partylist Representative Rodel Batocabe, sa oras na maipasa ang kanyang panukalang batas na House Bill 815 o Anti-Office Bullying Act ay maaaring maharap sa kasong krimen ang mga nagkakalat ng mapanirang kuwento laban sa kasamahan sa trabaho.
Aniya, maituturing kasing bullying ang pagkakalat ng tsismis para masira ang isang tao.
Bukod sa mga tsimoso at tsimosa, papanagutin din ang Human Resource Management kapag wala itong ginawa para maprotektahan ang kanilang empleyado laban sa paninira.
By Rianne Briones
Umalma ang mga mambabatas mula sa Kamara hinggil sa binitawang alegasyon ni Pangulong Rodrigo Duterte laban sa mga miyembro ng makapangyarihang CA o Commission on Appointments.
Ito’y makaraang ihayag ng Pangulo na umiral ang lobby money ng mga mining companies sa mga miyembro ng komite para ibasura ang nominasyon ni dating Secretary Gina Lopez sa DENR o Department of Environment and Natural Resources.
Ayon kay Occidental Mindoro Representative Josephine Sato, umapela na siya kay CA Chairman at Senate President Koko Pimentel na simulan na ang imbestigasyon sa usapin lalo’t nabahiran ng dungis ang kanilang kredibilidad.
Mahalaga aniya ang nasabing imbestigasyon lalo’t nakalulungkot aniya na nagmula pa mismo sa Pangulo ng bansa ang alegasyon.
Kasunod nito, nakatakdang maghain naman ng hiwalay na resolusyon sa Kamara si Magdalo Partylist Representative Gary Alejano para imbestigahan ang alegasyon na ito ng Pangulo.
By Jaymark Dagala
Inaasahang muling magpapatupad ng panibagong tapyas presyo sa mga produktong petrolyo ang mga kumpanya ng langis bukas, Mayo 9.
Ito’y ayon sa DOE o Department of Energy bunsod ng umano’y sobra-sobrang suplay ng langis ngunit babatay pa ito sakaling makumpleto na ang isang linggong pagtaya sa kalakalan ng langis.
Ayon kay Energy Spokesman at Undersecretary Felix Fuentebella, inaasahang maglalaro sa pitumpu (70) hanggang siyamnapung (90) sentimos ang posibleng i-rollback sa presyo ng gasolina, diesel at kerosene.
Ngunit batay sa source ng DWIZ, posibleng maglaro pa mula piso (P1.00) hanggang piso at sampung sentimos (P1.10) ang rollback sa presyo ng kada litro ng diesel habang nobenta (90) sentimos hanggang piso (P1.00) naman sa gasolina at kerosene.
Sakaling maisalya na, ito na ang ikatlong sunod na linggo na magpapatupad ng rollback ang mga oil companies sa kanilang mga produkto.
By Jaymark Dagala
Nakatakdang ilahad ngayong araw ng Philippine delegation sa universal periodic review ng United Nations Human Rights Council sa Geneva, Switzerland ang kanilang depensa hinggil sa drug war ng administrasyong Duterte.
Pinangunahan ni Senador Alan peter Cayetano at Deputy Executive Secretary Menardo Guevarra ang nasabing delegasyon na binubuo ng labing anim (16) na miyembro.
Maliban sa sampung (10) buwan sa puwesto ni Pangulong Rodrigo Duterte, ilalahad din ng grupo ni Cayetano sa nasabing review ang drug war sa ilalim ng administrasyong Benigno ‘Noynoy’ Aquino sa loob ng limang (5) taon nito sa puwesto.
Binigyang diin pa ni Cayetano na kung maraming naaresto, mas marami aniyang nasugatan at mas marami ang napatay dahil sa dami ng mga nahuhuli.
Leftist groups
Samantala, nagpadala na rin ng kanilang kinatawan ang mga maka-kaliwang grupo sa Geneva, Switzerland upang magpakalat ng kamalayan hinggil sa mga nangyayaring patayan sa ilalim ng kampanya kontra droga ng pamahalaan.
Kasabay ito ng isasagawang pagrepaso ng United Nations Human Rights Council sa mga naitatalang kaso ng paglabag sa karapatang pantao sa Pilipinas.
Maliban dito, makikipagpulong din ang mga maka-kaliwang grupo sa mga miyembro ng simbahan sa Europa at Filipino community doon para magsagawa ng serye ng mga aktibidad.
Kasabay nito, magsasagawa rin ng noise barrage ang mga maka-kaliwang narito sa bansa na gagawin sa Mendiola upang ipagwagwagan ang kanilang mariing pagtutol sa extrajudicial killings gayundin ang panawagang ipagpatuloy ang usapang pangkapayapaan ng gobyerno at ng National Democratic Front.
By Jaymark Dagala
Binuweltahan ni Senadora Leila de Lima si Philippine Ambassador to the United Nations Teodoro “Teddy Boy” Locsin Jr.
Ito’y makaraang ihayag ni Locsin na hindi na uusad ang kasong isinampa laban kay Pangulong Rodrigo Duterte sa ICC o International Criminal Court bunsod ng pagbisita sa bansa ni UN Special Rapporteur Agnes Callamard.
Ayon kay De Lima, wala siyang nakikitang dahilan o kaugnayan para maghayag ng gayung opinyon si Locsin gayung hindi naman bahagi ng ICC si Callamard para magpasya sa kaso.
Kaugnay nito, mariin ding pinabulaanan ni De Lima ang akusasyon ni Locsin na may kinalaman ang Partido Liberal sa pagpunta sa Pilipinas ni Callamard.
vs. Callamard
Binanatan ni Philippine Ambassador to the United Nations Teodoro Locsin Jr. si UN Rapporteur Agnes Callamard.
Kasunod ito ng ginawang pagbisita ni Callamard sa bansa nang wala umanong abiso sa pamahalaan ng Pilipinas.
Sa kanyang Twitter account, sinabi ni Locsin na sa pamamagitan ni Callamard, pinag-isa nito ang mga Pinoy sa pagsuporta sa kampanya kontra droga ni Pangulong Rodrigo Duterte.
Gayunman, sinabi ni Locsin na hindi si Callamard ang hahatol kung tama o mali ang ginagawa ng pamahalaan sa drug war lalo’t idinedepensa na ito ng Philippine delegation sa Geneva, Switzerland.
Hindi rin pinalampas ni Locsin ang hitsura ni Callamard pati na ang paliligo nito na aniya’y dalawang beses naman sa loob ng isang araw na nakatutulong para malinawan ang kanyang isipan.
By Jaymark Dagala
Kinumpirma ng WESMINCOM o Western Mindanao Command ng AFP o Armed Forces of the Philippines ang pagkakasawi ng apat (4) na bandidong Abu Sayyaf sa dalawang (2) magkakahiwalay na bakbakan noong Sabado sa bayan ng Sumisip sa lalawigan ng Basilan.
Ayon kay Capt. Joan Petinglay, tagapagsalita ng WESMINCOM, nangyari ang unang bakbakan sa Barangay Upper Benengbengan noong hapon ng Sabado na sinundan naman sa Barangay Cabcaban noong gabi ng nasabing araw.
Maliban sa pagkakapatay sa apat (4) na bandido, sinabi ni Petinglay na nakubkob din ng mga sundalo ang isang pansamantalang kuta ng mga bandido sa lugar.
Mariin din namang itinanggi ni Petinglay na may mga sundalo na nasawi sa nasabing engkwentro sa mga bandido taliwas sa mga naunang lumabas na balita.
By Jaymark Dagala
Nagpalabas ng abiso ang kumpaniyang Globe Telecom sa kanilang mga subscribers partikular na sa bahagi ng Quiapo at kalapit na lugar sa Maynila.
Ayon kay Atty. Froilan Castelo, General Counsel ng Globe Telecom, apatnapu’t walong (48) oras nilang papatayin ang kanilang signal sa lugar bilang pagsunod sa kautusan ng NTC o National Telecommunications Commission.
Ito’y bilang pagtugon naman sa naging kahilingan ng PNP o Philippine National Police kasunod ng nangyaring kambal na pagsabog sa naturang lugar noong Sabado ng gabi.
Gayunman, nangako ang Globe Telecom na agad nilang ibabalik sa normal ang serbiyso sa kanilang mga subscribers sa lugar sa sandaling magpalabas na ng abiso ang NTC.
Kasunod nito, humingi ng pang-unawa ang Globe sa kanilang mga subscribers sa pansamantalang suspensyon ng kanilang serbisyo sa mga apektadong lugar.
By Jaymark Dagala
Ipinatutupad na ang mas istriktong batas na nagbabawal sa sobrang payat na pangangatawan ng mga modelo sa France.
Unang ipinatupad ang batas na nagbabawal sa mga patpating modelo noong 2015 kung saan kinakailangan silang magpakita ng doctor’s certification na nagpapatunay na sila ay malusog.
Ngunit sa inaamyendahang batas, dapat na i-analyze ng isang doktor ang kanilang timbang, edad at body shape upang matukoy kung sila ay hindi sobrang payat at walang sakit.
Ayon sa France Health Ministry, layon nitong labanan ang talamak na eating disorder at bigyan ng katwiran ang tunay na ideya ng kagandahan at kalusugan.
Nakararanas ng anorexia, isang klase ng eating disorder ang 30,000 hanggang 40,000 mga tao sa France kung saan siyamnapung (90) porsyento nito ay mga kababaihan.
Bukod sa France, ipinapatupad din ang kahalintulad na batas sa Italy, Spain at Israel.
By Rianne Briones
Bumaba ng dalawang porsiyento ang trust rating ni Pangulong Rodrigo Duterte sa buwan ng Marso subalit maituturing na mataas pa rin ito ayon sa Social Weather Stations.
Batay sa survey na ginawa mula March 25-28 nakakuha ang Pangulo ng +70 %, kumpara sa +72% nito noong December 2016.
Pero ayon sa SWS, maituturing pa rin itong excellent katulad ng nakalipas nitong survey simula May 2016.
Nanatili ang mataas ang tiwala sa Pangulo sa urban areas.
Binigyang-diin ng SWS na magkaiba ang trust rating sa satisfaction rating
Dahil ang tiwala ay nasusukat sa kabuuang personalidad habang ang satisfaction rating ay tinatanong ang publiko batay sa performance ng kanyang posisyon o trabaho.
By: Aileen Taliping