July 2026

Sumalubong sa unang araw ng Mayo ang malakihang rollback sa presyo ng LPG o Liquified Petroleum Gas.

Epektibo kaninang alas-12:01 ng madaling araw, aabot sa 4.85 kada kilo o 53 pesos sa kada 11 kilogram cylinder ang ibinawas ng kumpanyang Petron sa kanilang Gasul at Fiesta Gas.

Habang 2.73 pesos kada litro naman ang bawas sa Xtend Auto LPG.

Simula naman kaninang alas-6:00 ng umaga, magpapatupad ang Solane ng 4.30 pesos na bawas presyo kada litro ng LPG.

Samantala, asahan na ang bawas sa presyo ng mga produktong petrolyo bukas.

Tinatayang 90 centavos hanggang piso (P1.00) ang mababawas sa kada kilo ng gasolina, 70 hanggang 80 centavos sa kada kilo ng diesel at 90 centavos hanggang piso ang kada litro ng kerosene.

Ang rollback ay bunsod ng pagbaba ng presyo ng LPG at iba pang produktong petrolyo sa world market.

By Rianne Briones   

Malawakang kilos protesta ang ilalarga ng iba’t ibang labor groups bilang pagdiriwang ng Labor Day ngayong araw na ito.

Kasado na ang rally sa iba’t ibang lugar sa Metro Manila at maging sa iba pang lugar sa bansa tulad ng Bacolod, Cebu, Cagayan de Oro, Iloilo, Tacloban at Davao.

Patuloy na isinisigaw ng mga manggagawa ang dagdag sahod, seguridad sa trabaho at pagpapatigil sa kontraktualisasyon.

Kasabay ng mga kilos protesta, maglulunsad naman ng nationwide job fair ng Department of Labor and Employment (DOLE).

Ayon kay Labor Secretary Silvestre Bello III, higit dalawang daang libong (200,000) mga trabaho mula iba’t ibang industriya tulad ng business process outsourcing, production, marketing at iba pa.

NCRPO

Samantala, nakahanda na ang mga tauhan ng NCRPO o National Capital Region Police Office para panatilihin ang seguridad at kaayusan sa isasagawang kilos protesta ngayong Mayo 1, Labor Day.

Ayon kay NCRPO Chief Director Oscar Albayalde, hindi bababa sa tatlong libong (3,000) pulis ang ipapakalat sa mga lugar na pagdarausan ng mga kilos protesta.

Dagdag pa rito ang apatnaraang (400) mga opisyal na magbabantay rin sa lugar.

Sinabi ni Albayalde na inirerespeto ng mga pulis ang karapatan ng mga militanteng grupo na magsagawa ng kilos protesta ngunit nakiusap na gawin itong mapayapa.

Inaasahan na mahigit sa tatlong libong (3,000) miyembro ng KMU o Kilusang Mayo Uno ang magsasagawa ng kilos protesta sa Maynila.

Habang limang libo (5,000) naman mula sa grupong KADAMAY ang mag-ra-rally sa Quezon City.

By Rianne Briones

Pinag-aaralan ngayon ng gobyerno ang bagong pension scheme para sa lahat ng uniformed personnel.

Ayon kay Finance Secretary Carlos Dominguez, nagsasagawa na ng actuarial study ang kanyang departamento at ang DBM o Department of Budget and Management para sa bagong pension system sa hanay ng militar.

Target aniya nilang matapos ang nasabing pag-aaral sa loob ng taong ito.

Sinabi ni Dominguez na pinag-aaralan din ng Department of Finance at DBM na isama ang uniformed personnel mula sa GSIS o Government Service Insurance System sa mga makikinabang sa bagong pension scheme.

By  Meann Tanbio  

Aprubado na ni Pangulong Rodrigo Duterte ang pagbiyahe ng BFAR o Bureau of Fisheries and Aquatic Resources sa Benham Rise sa Mayo 5 hanggang 7.

Ito ang kinumpirma ni Agriculture Secretary Manny Piñol makaraang makipagpulong sa Pangulo noong nakaraang Miyerkules.

Ayon kay Piñol, limang (5) government ship ang magtutungo sa Benham Rise.

Kabilang na rito ang M/V DA-BFAR at apat (4) na vessels.

Ang research fleet ay maglalayag mula Infanta sa Quezon hanggang sa pinakamababaw na bahagi ng Philippine Sea kung saan aalamin kung ano ang mga dapat gawing hakbang upang protektahan ang Benham Rise.

By  Meann Tanbio