July 2026

Bumisita kay Senador Leila de lima ang ilan sa kanyang mga kasamahan sa Minority Bloc sa Senado.

Kasama ni Liberal Party President Francis Pangilinan si Senador Risa Hontiveros na bumisita kay De Lima sa kanyang detention cell sa Camp Crame.

Maliban sa normal na pangungumusta, layon nina Pangilinan na makuha ang posisyon ni De Lima sa iba’t ibang issues at sa mga panukalang batas na nakahain sa Senado bilang miyembro ng minorya.

Bukas, Mayo 2 ang pagbabalik ng sesyon ng Senado matapos ang kanilang Holy Week break.

Senate deliberations

Nais ni Senador Leila de Lima na aktibo pa ring makalahok sa mga deliberasyon ng Senado kahit na nakakulong sa PNP detention facility sa Camp Crame.

Ayon kay De Lima, mayroon syang obligasyon na dapat gampanan sa mahigit labing apat (14) na milyong Pilipino na bumoto sa kanya bilang senador.

Sinabi ni De Lima na pinag-aaralan na ng kanyang mga abogado ang mga legal options kung paano sya makakalahok sa mga deliberastyon sa Senado kahit sa pamamagitan ng remote o electronic means.

Bukod anya sa kanyang mga karapatan bilang halal na senador, ipinaglalaban rin ni De Lima ang kanyang karapatan bilang political prisoner.

Noon anyang 1950 ay pinayagang makapagpiyansa si Senador Justiniano Montano para magampanan ang kanyang tungkulin bilang senador kahit pa non-bailable ang kanyang kasong multiple murder.

Samantala, sa pamamagitan naman ng teleconferencing ay pinayagan noon ng Aquino administration si Senador Antonio Trillanes na makalahok sa mga deliberasyon sa Senado.

Sa kabila ng pagkakakulong ay nagpapatuloy si De Lima sa paghahain ng kanyang mga panukalang batas.

Kaugnay nito, tututulan ng prosekusyon ang kahilingan ni Senador Leila de Lima na makalahok sa deliberasyon ng Senado kahit nakakulong sa Camp Crame.

Ayon sa prosekusyon, maituturing na special treatment sakaling payagan si De Lima na gumamit ng electronic gadgets para makalahok sa sesyon ng Senado.

Nagpahayag ng pangamba ang prosecution na humirit rin ang ibang bilanggo na payagan silang makagamit ng electronic gadgets.

By  Len Aguirre | with report from Cely Bueno (Patrol 19)

Photo Credit: Jonathan Andal (Patrol 31) 

Dalawa (2) pang bihag ng Abu Sayyaf ang nabawi na ng militar.

Napag-alamang nabulaga ang Abu Sayyaf sa biglang pagdating ng militar sa isang bahagi ng Patikul Sulu kayat iniwan nila ang kanilang mga bihag para takasan ang mga sundalo.

Sina Alidznur Halis, driver ng DPWH o Department of Public Works and Highways 1st District sa Sulu at helper na si Alijimar Ahari ay dinukot ng Abu Sayyaf noong tanghali ng Abril 29 ng taong ito sa highway ng Sitio Bauno Barangay Bangkal Patikul Sulu.

Nasa custody na ngayon ng Joint Task Force Sulu ang dalawang (2) biktima para sa medical examination at debriefing.

By  Len Aguirre | with report from Jonathan Andal (Patrol 31)  

Umaasa si Kilusang Mayo Uno (KMU) Chairman Elmer Labog na ang “sorpresa” ng Pangulong Rodrigo Duterte sa mga manggagawa ay ang pagtataas sa suweldo.

Ang sinasabing “sorpresa” ng Pangulo, ay kanyang iaanunsyo mamayang alas-4:00 ng hapon sa People’s Park sa Davao City.

Madalas kasi, aniyang, ang ibibibigay lamang ng pamahalaan sa mga manggagawa ay ang mga “labor package” na hindi naman natutugunan ang pangunahing problema ng mga obrero katulad ng mababang suweldo at ang kontraktwalisasyon.

“Ang tunay na nagpapababa sa sahod ng mga manggagawang Pilipino ay itong pleksibleng paggawa na ito nga yung malaganap na contractualization.” Ani Labog

Iginiit din ni Labog na isama sa mga dapat gawing regular na mga manggagawa ay yaong mga nasa pagawaan ng mga barko dahil hindi naman natatapos ang isang barko, sa loob lang ng isang buwan.

“Dapat na solusyunan ay yung malaganap na pag-contractualize sa mga posisyon na dapat ay nasa manggagawang regular, linawin yung batas at esensyal na usapan na tapusin na itong sistemang kontraktuwalisasyon tsaka na tayo mag-usap sa mga exceptions, halimbawa yung seasonal, ano ba ito?” Pahayag ni Labog

By  Katrina Valle | Balitang Todong Lakas (Interview)

Naglaan na ang UNICEF o United Nations Children’s Fund ng isa punto limang (1.5) milyong dolyar na pondo para sa technical assistance at supplies para sa pagbabakuna sa Pilipinas.

Bukod pa ito sa tatlumpu’t tatlong (33) milyong dolyar na halaga ng mga bakuna na kanilang binili para sa Pilipinas noong 2015 at 2016.

Sinabi ng UNICEF na bagamat matagumpay sa pagbabawas ng “under-five mortality rates” ang immunization program sa Pilipinas, kailangan pa rin ng Pilipinas na mas paigtingin ang kampanya, lalo na at marami paring bata sa mga liblib na lugar ang hindi nababakunahan.

Inaasahang sa 2018 ay magkakaroon na rin ng libreng bakuna kontra Japanese encephalitis.

By  Katrina Valle