June 2026

Inaalam ng NBI o National Bureau of Investigation ang mga pagkukulang ng ahensya sa pagtupad ng kanilang tungkulin.

Ayon kay NBI Director Virgilio Mendez, ito ang pinakatema ng pagdiriwang ng ika-79 na anibersaryo ng pagkakatatag sa NBI.

Mahalaga aniya na malaman ng NBI team kung saan sila nagkukulang upang malaman kung anong bahagi ng kanilang trabaho ang dapat nilang tutukan.

‘Tanim-bala’

Samantala, nanawagan ang NBI o National Bureau of Investigation sa mga biktima ng talaba o ‘tanim-laglag bala’ sa NAIA na dumulog sa kanilang ahensya.

Ayon kay NBI Director Virgilio Mendez, mas magkakaroon ng direksyon ang ginagawa nilang imbestigasyon kung makukuha ang panig ng lahat ng nagsasabing biktima sila ng talaba sa NAIA.

Posible aniyang mangailangan pa sila ng ilang araw bago ilabas ang resulta ng imbestigasyon dahil marami pang records ang hindi nila nakukuha mula sa NAIA.

By  Len Aguirre | Aya Yupangco (Patrol 5) 

Nabunyag ang di umano’y paniniktik ng militar sa lider ng Bagong Alyansang Makabayan o BAYAN.

Ipina-blotter na ni Dr. Carol Araullo, Chairperson ng BAYAN ang di umano’y halos isang linggo nang pagsunod sa kanya ng dalawa kataong sakay ng isang motorsiklo.

Nagkaroon pa umano ng insidente na nilapitan ng isa sa mga lalake ang driver ni Araullo at tinanong kung ang lider ba ng BAYAN ang kanyang sakay.

Nang itanggi di umano ito ng driver ay nagmumura pang umalis ang lalake.

Ayon sa BAYAN, isa lamang ang pagsunod kay Araullo sa mga surveillance operations laban sa mga miyembro at opisyal ng mga aktibistang grupo.

Una rito, nagkaroon na rin ng komprontasyon ang ilang miyembro ng grupong Courage sa mga hininalang intelligence agents na di umano’y nakabuntot sa kanila.

By Len Aguirre 

Nagsagawa ng clearing operations ang Metropolitan Manila Development Authority o MMDA sa bahagi ng Baclaran sa Parañaque.

Partikular na nilinis ng mga tauhan ng MMDA ang mga nagtitinda sa palibot ng simbahan ng Baclaran mula Roxas Blvd. paikot ng Redemptorist Road hanggang sa Quirino Avenue.

Ayon sa MMDA, kanilang ipatutupad ang zero vendor sa nasabing lugar na posibleng daanan ng mga delegado at heads of state na dadalo sa APEC Summit.

Ganito rin ang gagawin ng MMDA sa bahagi ng Pasay Rotonda kung saan, marami ring naglipanang street vendors na kailangan nilang ilipat ng puwesto.

By  Jaymark Dagala | Allan Francisco  

Walang magiging epekto ang hindi pagdalo ni Indonesian President Joko Widodo sa gagawing Asia Pacific Economic Cooperation o APEC Summit.

Inihayag ito ng palasyo kasunod ng abisong ipinadala ni Widodo sa Department of Foreign Affairs o DFA.

Ayon sa APEC National Organizing Council, may ipadadala namang kinatawan si Widodo kaya’t mapakikinggan naman ang lahat ng usaping matatalakay sa nasabing pulong.

Samantala, kinumpirma na rin ng Malakaniyang ang hindi pagdalo ni Russian President Vladimir Putin.

Ayon kay Deputy Presidential Spokesperson Abegail Valte, mismong ang Russian President ang tumawag kay Pangulong Noynoy Aquino para ipaabot ang kaniyang mensahe.

Naiindintihan naman ani Valte ng Pangulo ang biglaang pagbabago sa iskedyul ni Putin dahil sa nangyaring aksidente sa Russian Airliner na kailangan nitong tugunan.

Sa huli, sinabi ni Valte na nagpaabot ng pakikiramay ang Pangulong Noynoy Aquino sa mga nasawi sa nasabing trahedya.

By  Jaymark Dagala | Aileen Taliping (Patrol 23)