June 2026

Magpapatuloy ang deliberasyon ng Kongreso sa Bangsamoro Basic Law o BBL sa pagbabalik ng sesyon bukas, Nobyembre 3.

Ayon kay House Deputy Majority Leader at Quezon City Rep. Jorge Banal, gagawing prioridad ang pambansang budget sa 2016 bago ang ikasa ang debate at pagtalakay sa iba pang mga usapin.

Una nang itinakda ng kamara ang December 16 deadline para sa naturang panukalang batas.

Matatandaang tila naging usad-pagong ang BBL sa Kongreso matapos maganap ang madugong Mamasapano incident na ikinasawi ng 44 na miyembro ng PNP-Special Action Force noong Enero.

By Jelbert Perdez 

Apektado ng hanging amihan ang dulong hilagang Luzon habang ang easterlies naman ang nakakaapekto sa silangang bahagi ng ating bansa.

Makararanas ng maulap na papawirin na may pag-ulan pulo-pulong pagkidlat pagkulog ang CALABARZON, Bicol, Eastern at Central Visayas, Caraga, Davao at Aurora.

Bahagyang maulap na may mahinang pag-ulan naman ang posibleng maranasan sa Batanes, Calayan at Babuyan Group of Islands habang ang Metro Manila at nalalabing bahagi ng bansa ay magiging maulap na may pulo-pulong pagkulog at pagkidlat.

By  Mariboy Ysibido 

Muling nanawagan ang alyansa ng mga Yolanda survivor sa gobyerno na bilisan ang pagpapatayo ng mga permanenteng pabahay, mag-da-dalawang taon matapos ang pananalasa ng super-typhoon.

Ayon kay Marissa Cabaljao, Secretary-General ng Grupong People Surge, kasinungalingan lamang ang mga pangako ni Social Welfare Secretary Dinky Soliman na hindi na magkakaroon ng bunkhouses sa Tacloban City, Leyte sa katapusan ng Oktubre, ngayong taon.

Noon anyang sabado o huling araw ng Oktubre ay binisita nila ang Ipi bunkhouse sa Barangay Caibaan, subalit tumambad sa kanilang halos 300 pamilya na naninirahan pa rin sa temporary shelter.

Iginiit ni Cabaljao na simula pa noong Enero 2014 ay pinangakuan ang mga resident na matatapos ang permanent shelter sa loob lamang ng anim na buwan subalit mag-dadalawang taon na ay umaasa pa rin ang mga survivor.

Base sa datos ng National Housing Authority noong Setyembre, 534 lamang mula sa 13,800 at isa na targeted permanent house ang itinayo ng pamahalaan.

By  Drew Nacino

Ilang paaralan ang nagsuspinde na ng klase at trabaho ngayong Nobyembre 2, upang gunitain ang Araw ng mga Kaluluwa.

Ang mga nagsuspinde ng klase at office work ay ang Adamson University; De La Salle Araneta University; De La Salle-College of St. Benilde; De La Salle University – Manila;

Don Bosco Technical College-Mandaluyong; Far Eastern University – Diliman; FEATI University; University of Baguio at University of Santo Tomas.

Suspendido rin ang klase sa mga pampublikong paaralan sa bayan ng Rodriguez, Rizal ngayong araw.

Balik klase at trabaho naman ang mga kolehiyo at unibersidad, bukas.

By  Drew Nacino 

Hindi lahat ng pumila upang magpa-rehistro para sa 2016 elections ay makaboboto.

Ito ang nilinaw ni Commission on Elections (COMELEC) Spokesman James Jimenez kahit pa opisyal ng nagtapos noong Sabado ang registration.

Ayon kay Jimenez, ang paghahain ng application form of registration o AFR ay hindi otomatikong nangangahulugan na ang isang rehistradong botante ay makaboboto na sa susunod na halalan.

Daraan pa anya sa mabusising proseso ng Election Registration Board bago ma-rehistro ang mga pangalan sa official list of voters at tanging ang mga maaaprubahan ng ERB ang ikukunsiderang eligible na bumoto.

Dagdag ni Jimenez, hangga’t walang petisyon na inihahain laban sa AFR ay may tsansang maaprubahan agad ng board ang aplikasyon.

Inaasahang sa Pebrero 9 ilalabas ng poll body ang certified list of voters at posibleng umabot sa mahigit 50 milyong rehistradong botante ang makikibahagi sa May 2016 elections.

By Drew Nacino | Aya Yupangco  

Naging pangkalahatang mapayapa at maayos ang paggunita sa Undas sa bansa, ngayong taon.

Bagaman ngayon ang eksaktong araw ng mga kaluluwa, inihayag ni Philippine National Police (PNP) Spokesman Chief Supt. Wilben Mayor na wala namang naitalang untoward incidents maliban sa pagkaka-diskubre sa improvised explosive device sa isang sementeryo sa Sulu.

Maayos din aniya ang paggunita sa Undas sa ilan pang lalawigan maging sa mga lugar na sinalanta ng bagyong Lando kahit baha sa mga sementeryo.

“Sa pangkalahatan naman ay naging maayos at tahimik ang paggunita natin ng Undas, ngayon ay naka full alert pa kami hanggang bukas dahil karamihan sa ating mga kababayan ay pabalik pa lang sa kani-kanilang lugar,ang iba siguro papunta pa lang sa Metro Manila, nakaantabay pa rin ang ating mga (PNP) hanggang bukas, paunti-unti na rin po ang tao sa mga sementeryo pero hindi tayo bumaba sa pagtutok dito.” Pahayag ni Mayor.

By Drew Nacino | Ratsada Balita 

Kasalukuyan nang sinusuri ng Criminal Investigation and Detection Unit ng Quezon City Police District o QCPD ang cellphone ng napatay na DWIZ metro patrol volunteer na si Jose Bernardo.

Ito’y upang matukoy ang posibleng pagkakakilanlan ng nasa likod sa pagpatay dito

Batay sa paunang imbestigasyon ng QCPD, may katatagpuin sana ang biktima sa isang fast food chain sa bahagi ng Zabarte Road sa barangay kaligayahan sa naturang lungsod

Ayon sa salaysay ng security guard, iginagrahe na lamang ng biktima ang kaniyang motorsiklo nang biglang sumulpot ang mga suspek na pawang riding in tandem at saka pinaulanan ito ng bala.

Sugatan naman ang isa pang kawani ng fast food chain na kinilalang si Marlon Donio na agad namang dinala sa pagamutan

Bukod sa pagiging volunteer reporter ng DWIZ, nagsusulat din si bernardo sa pahayagang Bandera at nag-uulat din sa himpilang DWBL.

By: Jaymark Dagala