June 2026

Balak ni Senadora Miriam Defensor Santiago na lumahok sa gagawing debate sa senado na may kaugnayan sa Substitute Bill on the Bangsamoro Region.

Ito ang napag-alaman ng DWIZ mula sa kampo ng senadora bagama’t matagal na itong hindi pumapasok dahil sa kaniyang chronic fatigue syndrome gayundin sa aniya’y gumaling nang stage 4 lung cancer.

Nabatid na nagpa-iskedyul si Senador Santiago para sumalang sa interpellation sa Lunes ng susunod na linggo.

Magugunitang nagsagawa ng sariling pagdinig si Santiago bilang Chairperson ng Senate Committee on Constitutional Ammendments.

Gayunman, hindi pa batid kung makasisingit si Santiago kay Senate Minority Leader Juan Ponce Enrile na nakatakda namang ipagpatuloy ang kaniyang nasimulan nang interpellation dahil sa dami ng kaniyang nais itanong hinggil sa nasabing batas.

By  Jaymark Dagala | Cely Bueno (Patrol 19)  

Nahaharap sa 10 hanggang 18 taong pagkakakulong si dating Saranggani Governor Miguel Escobar.

Ito’y makaraang hatulan ng Sandiganbayan si Escobar gayundin ang dati nitong Agriculturist na si Romeo Miole sa kasong malversation of public funds.

Nag-ugat ang kaso kina Escobar at Miole sa umano’y maanomalyang pamamahagi ng halos 2,000 sako ng bigas na para sana sa mga nabiktima ng La Niña phenomenon noong 2002.

Ngunit nabisto na ipinamahagi ang mga nasabing bigas isang linggo bago ang barangay elections nang taon ding iyon

Bukod sa pagkakabilanggo, tinanggalan din ng Anti-Graft Court ng karapatan ang dalawa na maupo sa alinmang puwesto sa gobyerno at pinagbabayad ng multang hindi bababa sa P1.44 milyong piso.

By Jaymark Dagala | Jill Resontoc (Patrol 7)  

Sumugod sa tanggapan ng Department of Justice (DOJ) ang daan-daang mga katutubong Lumad kaninang umaga.

Ito’y upang ipanawagan sa pamahalaan ang pagpapanagot sa mga sundalo at para military group na pumatay sa marami nilang kasamahan.

May bitbit na plakards ang mga katutubo na may larawan ng mga nasawi nilang kasamahan na di umano’y pinaslang ng mga sundalo’t militia group.

Nanawagan din ng grupo na palutangin ng gobyerno ang mga wanted sa kanilang hanay na sila umanong pasimuno ng gulo ngayon sa kanilang komunidad.

By  Jaymark Dagala | Bert Mozo (Patrol 3)  

Umapela ang Malacañang sa mga militanteng grupo na huwag gamitin ang mga katutubong Lumad sa mga isasagawa nilang pagkilos sa panahon ng Asia Pacific Economic Cooperation o APEC Summit.

Sa harap na rin ito ng planong pagpapalawig sa pananatili ng mga Lumad sa Kamaynilaan hanggang sa sumapit ang nasabing pagtitipon.

Ayon kay Deputy Presidential Spokesperson Abegail Valte, hindi dapat gamitin ang mga katutubo para sa interes ng iilan.

Narinig na aniya ng gobyerno ang hinaing ng mga Lumad tulad ng ancestral domain at pagmimina kaya’t ibang usapan na kung gagamitin pa rin ang mga katutubo sa mga pagkilos kaalinsabay ng APEC.

By  Jaymark Dagala | Aileen Taliping (Patrol 23)

Arestado na ang tsuper ng trak na nakasagasa sa isang Pilipinang doktor sa Bahrain, 5 araw na ang nakalilipas.

Ayon sa Department of Foreign Affairs o DFA, agad nasawi ang naturang doktor na napag-alamang pediatrician matapos tatlong beses gulungan ng 16-wheeler truck.

Sasagutin naman ng employer ng naturang pediatrician ang gastusin para makauwi ang labi nito sa Pilipinas.

Inaasikaso na rin ng DFA ang pagpoproseso sa mga dokumentong kinakailangan at inabusuhan na rin ang pamilya nito rito sa Pilipinas.

By  Jaymark Dagala | Allan Francisco  

Sugatan ang isang pasahero ng Metro Rail Transit (MRT) dahil sa biglaang paghinto ng tren.

Ayon sa ulat, biglang pumreno ang tren ng MRT dahil sa faulty automatic train protection feature nito.

Nagtamo ng galos at pasa ang biktima na agad namang dinala sa ospital matapos ang insidente.

By Ralph Obina  

Nakiisa na si dating Akbayan Partylist Representative Walden Bello sa panawagang magbitiw na sa puwesto si Department of Transportation and Communications (DOTC) Secretary Joseph Emilio Abaya dahil sa ‘laglag-bala’ modus na bumibiktima sa mga pasahero sa Ninoy Aquino International Airport (NAIA).

Ayon kay Bello, malinaw na walang kakayahan para maging kalihim ng DOTC si Abaya dahil sa kawalang aksyon nito sa problema.

Binigyang diin ni Bello na dapat may management skills at may determinasyon na panagutin ang mga kriminal na sindikato ang mamuno sa DOTC upang wala aniyang pasahero ang maaagrabyado.

Una rito, ikinatwiran ni Abaya na maliit na porsyento lamang naman ng mga pasahero sa NAIA ang nahuhulihan ng bala.

Maliban dito, sinabi ni Abaya na ginagawa lamang aniyang isyu ang laglag bala para siraan ang administrasyong Aquino.

By  Ralph Obina 

Kumpiyansa si Senate President Franklin Drilon na maihahabol nila na maipasa ang 2016 national budget bago ang Christmas break.

Ayon kay Drilon kukunsultahin niya ang Chairman ng Senate Committee on Finance na si Senator Loren Legarda ukol sa panukalang mahigit P3 trilyong pisong national budget na inaasahang matatangap nila ngayong linggo mula sa Kamara de Representantes.

Tiwala ang senador na sa kanilang pagsisikap sa pagbabalik ng sesyon ay maihahabol na maaprubahan ang national budget sa unang linggo ng Disyembre.

Sa kabila ito ng pansamantalang pagkaantala ng kanilang debate ng tatlong araw simula November 17 hanggang 20 dahil sa gaganaping APEC Summit kung saan holiday at walang opisina.

Inaaasahan na sa ikatlong linggo ng Disyembre ay makakarating na kay Pangulong Noynoy Aquino ang pinal na budget upang pormal na lagdaan ito.

Sa ngayon, abala rin ang mga senador sa paghahabol na maisabatas ang Bangsamoro Basic Law (BBL).

By  Mariboy Ysibido 

Wala nang atrasan sa pagpapatupad ng Energy Regulatory Commission (ERC) ng tinatawag na Competitive Selection Process o CSP scheme.

Ito ay ang kontrobersiyal na power-industry reform policy na naglalayong masiguro na mabibili at maipapasa umano sa mga consumer ang power supply sa murang halaga.

Noong Oktubre ay naglabas ng resolusyon ang mga commissioner ng ERC upang mawakasan ang negotiated Power-Supply Agreements o PSAS sa pagitan ng mga distribution unit at power producers.

Pinaniniwalaang ito ang magiging daan para bumaba ang singil sa kuryente ng mga power company tulad ng MERALCO.

Subalit, una nang tinawag ni MERALCO Chairman Manuel Pangilinan na “illogical” ang CSP scheme dahil hindi umano ito nagpo-promote ng mababang halaga ng kuryente.

By  Jelbert Perdez