June 2026

Ibinabala ng PNP Highway Patrol Group ang posibleng pagtaas pa ng kaso ng aksidente sa mga kalsada ngayong papasok na BER months.

Ayon kay PNP-HPG Spokesperson Superintendent Oliver Tanseco, ang ber months ay panahon kung saan marami sa ating mga kababayan ang lumalabas at namimili kaya’t kapag rush hour ay di maiwasan ang pag-init ng ulo ng mga motorista.

Batay sa tala ng PNP-HPG, nito lamang Enero hanggang Hulyo, papalo na sa 11,000 ang naitatalang aksidente sa kalsada sa Metro Manila kung saan 500 katao ang naitalang nasawi sa disgrasya.

Ito’y kung saan nangungunang dahilan ng mga aksidente ay ang biglaang pagliko, sinundan ng overtaking at overspeeding.

Kaya payo ng PNP-HPG, magdoble-ingat at habaan ang pasensya sa pagmamaneho upang makaiwas sa disgrasya sa kalsada.

By  Ralph Obina | Jonathan Andal   

Posibleng talakayin na sa International Tribunal ang merito ng reklamong isinampa ng Pilipinas laban sa nine-dash line at iba pang aktibidad ng China sa West Philippine Sea sa susunod na taon.

Ayon kay Assistant Secretary Charles Jose, Spokesman ng Department of Foreign Affairs (DFA), inaasahan nilang papabor sa Pilipinas ang magiging desisyon ng Arbitral Tribunal of the Permanent Court of Arbitration sa The Hague.

Bago matapos ang taon ay ilalabas na ng PCA ang desisyon kung mayroon silang hurisdiksyon para dinggin ang kasong isinampa ng Pilipinas laban sa China.

Noong nakaraang Hulyo ay matatandaang tinapos na ng PCA ang oral arguments sa isyu ng hurisdiksyon ng korte sa kaso.

“Umaasa po tayo na hindi po aabutin ng ganun at mas maaga po silang maglalabas ng desisyon at kung pabor po sa atin ang desisyon meaning to say meron po silang jurisdiction, inaasahan po natin na iimbitahan tayo ulit sa The Hague for another round of oral arguments pero this time tungkol na po sa merit of the case.” Pahayag ni Jose.

By  Len Aguirre | Ratsada Balita  

Handang makipag-usap si Senador Ferdinand “Bongbong” Marcos sa Moro Islamic Liberation Front o MILF.

Ayon kay Marcos, isa-isa niyang ipapaliwanag sa liderato ng MILF kung bakit niya pinalitan ang maraming probisyon sa draft Bangsamoro Basic Law.

Sinabi ni Marcos na naunawaan niya kung bakit sinabi ng MILF na walang kaluluwa ang substitute BBL.

Sa ilalim aniya ng orihinal na panukalang batas, tanging ang MILF ang hahawak sa lahat ng posisyon at magpapatakbo sa bubuuing bagong Bangsamoro Basic Entity.

Gayunman, sa binuo niyang substitute BBL, lahat ng sektor na may interes sa Mindanao o sa bahagi ng ARMM ay bibigyan ng pagkakataong maging kinatawan sa parliyamento.

“Ang talagang gusto nila ay bumalik tayo sa draft BBL, sinabi nila na ang batas na ito’y walang kaluluwa, hindi naman ako papayag na ganun ang description ng batas dahil isinama nga namin lahat ng mga involve at stakeholders imbes na isang grupo lamang, kaya sa palagay ko mas nadagdagan ng buhay ‘yung magiging sistema ng gobyerno sa Bangsamoro Autonomous Region.” Ani Marcos.

Samantala, kumbinsido si Marcos na kayang ihabol ng senado ang pagpasa sa BBL sa kabila ng maraming trabahong nakalinya tulad ng pagpasa sa national budget.

Ang problema lamang aniya ay kung kakayanin pa ng COMELEC na ihabol ang plebisito sa nakatakdang eleksyon sa 2016.

“Sa palagay ko ay maaari pa rin naman, ‘yun lamang ay nagiging magulo ng konti kasi papasok na din tayo sa campaign period so dagdag ito sa COMELEC dahil magkakaroon ng plebisito, ang hinihingi nga nila 6 na buwan, eh kung matapat ‘yung pagkuha ng voter’s list sa eleksyon sa kampanya, hindi ko na lang alam kung kakayanin ng COMELEC, at napakalaking trabaho ‘yan.” Paliwanag ni Marcos.

By Len Aguirre | Kasangga Mo Ang Langit